國際大棋局專欄闊別癲狗一年有多,今日再同大家見面,事關有讀者連番要求筆者講講過去半個月波斯灣局勢。由於耐冇執筆,希望大家見諒。

確實,過去半個月波灣局勢係非常緊張,美伊兩國一直刷槍走火,幾乎去到正面交火階段。雖然近期局勢有所緩和,但好多讀者都想深究到底伊朗、伊拉克、以及美國三方到底有咩恩怨?但恕筆者直言,僅用一篇文章去講上述問題係無可能嘅事。因此本文會先講解伊朗少少上世紀同美國嘅關係,再講講自己對近期局勢嘅睇法,有機會再講講伊斯蘭教派對立對當前中東局勢嘅影響。

其實大家又知唔知伊朗喺1979年「伊斯蘭革命」前,掌權嘅巴列維王朝曾經係美國喺中東地區一個重要盟友。主要原因在於伊朗嘅石油資源豐富,以及為咗保持自己喺中東嘅影響力,令美國當時樂於支持「世俗化」嘅伊朗王朝。當時嘅伊朗國內相當開放,賭場、酒吧、夜場等應有盡有。當時伊朗同以色列嘅關係,係好到不得了,唔似得今日隔住咁多國家都要劍拔弩張。

但最終因為伊朗經濟貧富差距等問題,喺1979年爆發一場伊朗伊斯蘭革命,國王巴列維最終要出逃美國,伊朗人喺高美尼(Ruhollah Khomeini)帶領下成立伊朗伊斯蘭共和國,首都德黑蘭更爆發美國大使館人質事件,導致伊朗同美國反目成仇。而當時伊拉克係由遜尼派掌權,屬於「少數人管多數人」(伊拉克民眾主要為什葉派),宗教矛盾加上民族仇恨以及邊境糾紛,最終導致隔年爆發長達八年嘅兩伊戰爭。而美國喺兩伊戰爭期間,一直支持伊拉克侯賽因遜尼派政府,對抗伊朗什葉派。美國呢個舉動令雙方關係差無可差。

而踏入21世紀,美國喺2003年發動伊拉克戰爭,推翻侯賽因遜尼派政權,令到什葉派接管伊拉克政權,政治上開始靠向伊朗,再加上伊拉克喺推翻侯賽因政權後,國力一直處於虛弱狀態,好多地方根本同無政府狀態無分別。而阿拉伯之春更加令伊朗有機可乘,當時伊朗同伊拉克政府、敘利亞巴沙爾政府、黎巴嫩真主黨等伊斯蘭什葉派力量連成一線,其中伊拉克一直受到嚟自「伊斯蘭國」嘅蹂躪,加上宗教派別因素影響,自然向什葉派「一哥」伊朗求救,而伊朗喺同沙地為首嘅什葉派反面之後,一直苦侯時機去擴展自身喺中東嘅影響力(向世人展示,我哋雖然係信仰伊斯蘭教,但我哋唔係阿拉伯人),自然願意「落沓」。而早前被美軍炸死嘅伊朗革命衛隊「聖城軍」指揮官蘇利文尼(Qasem Suleimani),正正喺伊朗當時協助伊拉克對付「伊斯蘭國」嘅重要人物,更加同伊拉克政府支持嘅什葉派民兵組織「人民動員」(HASHED AL-SHAABI)係盟友,所以就解釋到點解美國一炸伊敘兩國多處親伊朗武裝組織據點,「人民動員」就即時動員去包圍美國駐伊拉克大使館。

美軍空襲伊敘兩國多處親伊朗武裝組織據點 至少25死50多人受傷

伊朗導彈炸美軍駐伊拉基地後隨即「打飛機」 表示炸死80名美軍

對於美國嚟講,咩教派矛盾佢唔會在意,美國喺中東只在乎能源,沙地阿拉伯喺今日為止始終係當前中東石油巨頭,加上美國過往同伊朗嘅恩怨、領導層換人(民主黨換共和黨)以及能源利益嘅驅使下,令到美國更加想儘快制止伊朗近年喺中東地區繼續擴張佢嘅影響力。所以,美國先會放棄2003年後原本扶植嘅伊拉克什葉派政府,更加不惜極為霸道咁喺伊拉克境內用無人機暗殺伊朗重要軍事指揮官。而伊拉克當前的確想飛起美國,繼續投向伊朗爸爸嘅懷抱,但佢又唔敢太得罪美國呢個世界唯一「強國」,所以而家伊拉克處境係極為尷尬,而且只會繼續淪為美伊兩國嘅衝突最前線。

伊拉克什葉派議員似足香港建制 國會強行通過決議 要求所有外國軍隊撤走

伊拉克要美軍走人 當勞侵:先還起空軍基地錢唔係祭出比伊朗更嚴厲制裁

雖然近一個星期因為烏克蘭客機事件,令局勢有所緩和,但伊朗確實再無咩籍口去射飛彈炸美軍駐伊拉克基地。事關嗰176人條人命伊朗當局無得唔孭鑊,國內民眾聲討最高領袖哈米尼(Ali khamenei),加上各國共同指責,伊朗無可能再好似之前咁有正當理由去話美國不是。而且,大家留意下,俄羅斯一直喺呢件事件上面默不作聲,反而總統普京早前喺敍利亞首都大馬士革高調露面,又去拜訪當地東正教教堂同牧首,對伊朗係隻字不提,令人不禁去諗普京係咪都覺得伊朗之前太串,而想「割蓆」,普京自己都深知肚明,想喺中東點串都得,但絕唔可以得罪美國。

烏克蘭國際航空客機伊朗德黑蘭墜毀176人全部罹難

我哋下期再講講宗教歷史,畀大家知道點解伊斯蘭教會出現大分裂,導致今日兩大教派嘅對立。伊朗雖然信仰伊斯蘭教,但教派同中東其他國家截然不同。伊朗嘅什葉派好多習慣都唔被遜尼派接受。只要你去過伊朗,週街都可以見到政治人物畫像,呢點同其他遜尼派國家唔崇拜任何人士或者畫像係好唔同。