英超賽事上演曼市打吡,曼聯主場兩球淨勝曼城。曼聯喺蘇斯克查帶領下,今季4戰3勝曼城,成為歐洲唯一一隊可以剋死曼城嘅球隊,認真威威!

對上3次主場鬥曼城都輸波嘅曼聯,今役有隊長兼後防重心哈利‧麥佳亞傷癒復出,為後防注下強心針。相反曼城方面,中場核心迪布尼因為背傷,繼續避戰。曼城早段反客為主,但欠缺射門,曼聯喺30分鐘把握一次罰球機會建功,新加盟嘅葡萄牙中場費南迪斯肋攻畀入楔禁區嘅馬斯亞,呢位法國前鋒窩利施射,門將艾達臣心神恍惚,明明雙手叉到但未能阻止入波。

換邊後曼城一度積極反撲,但阿古路嘅入球,被球證判越位在先。艾度臣喺加時最後一分鐘又犯錯,新仔麥湯文尼離門35碼射入空門成2 : 0。賽後曼城落後多打1場嘅榜首利物浦多達25分,「紅軍」只要下場擊敗水晶官,而曼城喺補賽輸畀阿仙奴,就可以首度棒起英超冠軍寶盃。

另外,車路士亦喺主場全取三分,4:0大勝「拖肥」愛華頓。上半場憑美臣蒙特以及柏度嘅入波,協助主隊領先兩球。換邊後,韋利安以及基奧特各入一球,賽後車仔29戰48分,保持爭奪來季歐聯希望。

天日凌晨4點英超將上演獨腳戲,由第三名「狐狸」李斯特城主場迎戰剛失落聯賽盃嘅阿士東維拉。

#癲狗日報 #癲狗波經 

更新時間 : 2020年3月9日(一)03:11
建立時間 : 2020年3月9日(一)02:57