武漢肺炎疫情導致歐洲主流聯賽暫停,復賽遙遙無期。但效力德國球會多蒙特的馬里奧‧古沙(Mario Götze證實,將喺今季完結之後再度離開「蜜蜂兵團」,回復自由身。

古沙接受多間德國傳媒訪問時表示,經過審慎考慮之後,決定為自己職業生涯作出改變,尋求新挑戰。外界目前盛傳佢可能會轉會到英超球會利物浦,同教練高普再續前緣。古沙僅表示,一直有同高普聯絡,對方喺自己17歲時由青年隊提拔上一隊,更教導他一切職業足球知識,大家至今經常聯絡。而據德國《天空電視台》報導,意甲球會AC米蘭以及羅馬都有意喺今夏轉會窗免費簽入古沙。另外,意大利傳媒報道,國際米蘭喺一月份簽入艾歷臣Christian Eriksen之前,都曾經表示對古沙有興趣。

現年27歲嘅古沙,喺多蒙特出道,協助球隊贏得兩屆聯賽冠軍,之後轉會到德甲霸拜仁慕尼黑,當時曾經引起轉會風波。古沙職業生涯共奪得過5次德甲、4次德國盃、1次世界盃、1次世冠盃、1次歐洲超級盃、以及1次德國超級盃冠軍。佢最為人所知係2014年世界盃對阿根廷嘅決賽入面,喺加時下半場射入奠定勝局嘅一球,幫助德國捧起大力神盃。不過,佢一直喺拜仁未能穩站正選,表現更不復當年勇,直到2016年重返多蒙特,今季就為「蜜蜂兵團」上陣19次,貢獻3球1助攻。但球隊「年青化」政策下導致未能企穩正選,加上狀態下滑,最終令古沙萌生去意。

 

#癲狗日報 #癲狗波經 

更新時間 : 2020年4月11日(六)21:28
建立時間 : 2020年4月11日(六)15:28