成日有人投訴我寫嘢寫得深,咁啱早排因為大聲公襲警事件,楊岳橋果句名言「Over my Dead Body」又拎黎比一眾網民抽水,正如以此作為範例,解釋比一眾政治小學雞知,究竟民主嘅基礙理念係乜。

不過正式開講之前,都不禁要申下冤,話說當我拋低一句:「喂其實七年前已有人因為向警察吹口哨而被判監半年啦,如果要講法治已死,七年前經已死咗啦,大家啱啱訓醒牙?」結果比人話我酸公民黨,唔抵得人地經已大幅進步、廣受支持云云。響度真係要大聲講句「冤枉」,老實抽楊岳橋抽得比我更勁嘅網民係大有人在;當中仲不乏飯民死忠添,基本上響嘲笑「Over my Dead Body」呢件事上面經已係全體黃絲普遍共識,幫楊岳橋護航反而係少數呀!

好勒言歸正傳。有護航飯粉話,楊岳橋講大咗呢句說話都好多年前啦,點解仲要日日提住?點解唔識欣賞下佢呢幾年嘅進步?拿響度我就解釋比大家聽,點解呢句嘢咁抵比人笑,甚至係抵嬲。

1. 「香港仲有獨立嘅司法系統,若果有人想搞佢,Over my dead body!」呢句說話係出自當日新東補選,楊岳橋響造勢大會上面所講嘅。基本上響呢個場合講得出,一般人都好自然會將佢視之為競選承諾、甚至係一句誓言。

問題係而家我地睇倒香港法治響呢幾年間已多番被極權政府所侵犯,但卻完全睇唔倒楊岳橋有做過乜嘢去實踐「Over my Dead Body」呢句承諾,咁當然可以等同於楊岳橋背棄誓言咁去看待。

2. 有曰楊岳橋經已響近排嘅港台節目上面自嘲,所以大家應該原諒、放過佢云云。喂自嘲不同於認錯,係咪如果今日林鄭響鏡頭面前自嘲幾句,大家就會放過佢?

而更重要一點係,楊岳橋直至今時今日,仍然無就點解無付諸實行「Over my Dead Body」作出過任何解釋同道歉。喂要人原諒你,最基本都要你自己覺得有錯先得掛?有乜理由當事人連Sorry都無一句,又無解釋過點解兌現唔倒承諾、又無提任何補救方向,然後由你班飯粉一句「唔好再提啦!」件事就算數下話?

3. 即係當今日有人走去嘲笑、批評楊岳橋時,竟然比班黃屍飯狗走去話呢啲人係「搞分化」,真係令我非常震驚。

知唔知民主制度一個最基礎嘅概念就係容許別人基於事實作出批評?即係唔該你班深黃傻粉走去問下你地啲偶像劉細良沈旭暉,佢地都會話你聽,反對派嘅價值就係指出公權力者嘅不是,然後建基於批評作出改進。

中共以往最鍾意講嘅一句政治語言,就係「極少數別有用心的人,蓄意製造動亂」,基本上而家你班深黃傻粉開口埋口講嘅「搞分化」,同中共「別有用心」係完全無分別。

4. 然後又有人會話:「而家最重要嘅時機就係9月選舉,有咩批評過咗9月至算,呢個時候仲內鬥就係分化!」

即係呢班人真係搞錯哂啦,就正正係臨近選舉,先至係對候選人提出質疑嘅最佳、甚至係唯一時機。「選舉近了」呢句說話唔係國師所發明,事實就係,全世界所有政客表現最積極、最願意聆聽民意嘅時刻,就係選舉前夕。即係當選舉完咗,當選嘅過咗海都神仙啦,真係睬你班蟻民有味啦!

政黨唔想比人中傷攻擊可以點做?即刻同你班政治小學雞上堂民主BB班:

A. 候選人真心向選民就過去一屆嘅無能同錯誤道歉、乞求選民原諒;(最簡單,承諾下屆捐哂議員份糧出黎資助抗爭者)

B. 於來屆選舉提出有效而令人信服嘅方法,改善過往缺點,以及設立有效制度接受選民監察(最簡單,承諾以後每次缺席會議都要寫請假信、向選民解釋原因;每個月搞網上直播接受選民質詢)

C. 如果選民仍然唔接受的話,就換馬參選

5. 「楊岳橋今時今日經已進步咗好多啦!就算你地白票黨點搞分化都好,佢都一定會當選架!」

首先,有無進步、進步咗幾多,唔係你班深黃傻粉話係就係的(相反,亦唔係我話係就係),選民信唔信你,咪響投票日見真章囉,如果真係咁有信心,又駛乜驚呢?
事實上所謂「白票黨」響呢個世界嘅民主社會亦無處不在,只不過唔係以「白票黨」三個字出現而已。好簡單之嘛,當選民發現所有名單上面嘅候選人都唔合意,咪唔出黎投票囉,投票率咪下降囉,「白票黨」根本無處不在,分別只在於佢講定唔講出口之嘛?

只不過成件事最令我噁心嘅卻係,深黃傻粉並唔係走去向呢班飯民候選人同政黨施壓,迫佢地持續改善去爭取更多支持(就算你爭取唔倒焦土派一票,至少都爭取倒白票黨一票丫),又或者踢走果班政棍垃圾換班真正決心響議會抗爭嘅人,只係不停催眠自己「總之楊岳橋已經進步咗好多所有人都唔准鬧佢!」

甚至乎將所有批評飯民各種事實嘅人打成「分化撚」,響美國如果有共和黨支持者走去批評特朗普,你話人地「分化撚」佢地只會當你ON9架咋!

再者,我又唔係公民黨成員,同佢又無簽咩聯盟協議,分乜撚嘢化?邊個同你講只有支持飯民先可以叫支持民主?而家民主個商標比飯民註冊咗唔通?全世界只有一種政體係會相信,支持某一指定選舉聯盟或者政黨先等同支持民主,果種叫獨裁政體呀白撚痴!

然後同你班深黃傻粉政治小學雞講,你地而家搞緊嘅,就係一套不容異見、不容批評嘅獨裁體系,他日真係比你班粉皮當政,都只係會出現令一個共產黨。唯一分別可能只在於《廿三條》會改名做《分化罪》咁囉。

作者:無神論者的巴別塔