今季德甲賽事有機會喺下週五(十五)起重燃戰火,成為武漢肺炎疫情下,首個恢復聯賽嘅歐洲國家以及歐洲五大聯賽,但將會禁止球迷入場,避免人群聚集。

德國總理默克爾聯同多名州長開會後宣布,放寬當地社交限制,德甲以及德乙可以喺5月下旬復賽,確實日期由賽會自行決定。據報賽會將參考英超中立場建議,喺疫情受控嘅南部州份完成今季餘下比賽。

據《圖片報》報道,5月15日復賽機會最大,但不來梅州政府表示反對。因為當地限聚令較嚴,只容許全體集訓7日,對身處該州嘅雲達不來梅以及緬恩斯等下游隊喺護級前景上十分不利,因此提出押後一週到5月22日重啟。最終復賽日期需由德國職業足球聯會決定。

德國球圈目前有10名職球員確診,其中德甲佔6人,包括3名科隆職球員,2名慕遜加柏職球員,其餘來自德乙。

今季德甲剩低九輪賽事,班霸拜仁慕尼黑目前以55分排喺榜首,領先次席的多蒙特4分,RB萊比錫有50分排第三。

#癲狗日報 #癲狗波經 

更新時間 : 2020年5月7日(四)16:08
建立時間 : 2020年5月7日(四)14:23