自李斯特城喺3月9日主場大勝阿士東維拉4球之後,英超就因為武漢肺炎疫情停擺,李斯特城包括領隊羅渣士在內有4名職球員中招。而英超20間球會繼早前復操後,原則上同意喺下月17日正式恢復比賽,所有賽事會閉門進行,並已公布相關比賽時間。

英超復賽首日將會上演兩場閉門賽事,分別係阿士東維拉對錫菲聯,以及曼城對阿仙奴。跟住喺39日內會盡早完成剩低92場比賽,而為避免疫情再度爆發,大部份復賽初期賽事或者會移師中立場舉行。而拋離次席曼城25分嘅「紅軍」利物浦,只要再贏兩場賽事,最快6月20號就可以首次封王,一嚐英超冠軍寶庭。賽會指一但聯賽最終被迫腰斬,各隊已有計平均得分定名次嘅共識。

英國《天空體育》報道指,賽會仍然要等政府發布有關復賽嘅安全指引,20間球會同意暫定喺7月25日完成球季。而英超一週7日都會有比賽,週中5日全部係夜場,週末會同平時一樣有晏畫同夜上幾個開賽時間。如無意外,英超會喺7月26日煞科,以配合歐聯淘汰賽進行。

另外,92場比賽入面,將會有29場免費電視直播,當局希望確保盡量球迷安在家中睇比賽,以防出現人多聚集情況。

與此同時,英格蘭足總亦公布咗足總盃復賽安排,預計6月底會重啟賽事,6月27-28號上演8強戰,而4強會喺7月18-19號喺溫布萊球場舉行,8月1號會上演決賽。

另外,除英超同埋已開賽兩週嘅德甲外,西甲亦預計最快喺6月8號可以復賽,而意大利體育部長亦表示意甲暫定喺6月20號重開,只係等埋意大利政府嘅批文。

#癲狗日報 #癲狗波經 

更新時間 : 2020年5月30日(六)19:46
建立時間 : 2020年5月30日(六)19:40