【癲狗波經】西甲終於返嚟啦!今日凌晨本港時間4點復賽首戰,將會上演南部西維爾市打吡戰,由西維爾主場迎戰今季表演飄忽嘅貝迪斯。

雖然西甲受疫情影響,今場打吡戰要閉門作賽。目前西維爾排聯賽第3,落後榜首嘅巴塞隆拿以及次名嘅皇家馬德里11分以及9分,雖然西維爾問鼎冠軍機會甚微,但停賽前已經畀3隊力迫三哥位置,只領先第4嘅皇家蘇斯達以及第5嘅基達菲僅1分,領先第6嘅馬德里體育會2分,一但稍有差池隨時跌出前四,失去來年歐聯小組賽資格。然而西維爾喺打吡戰上對賽往績較佳,對場41次,錄得20勝14和7負,包括近5次主場4勝1負,加上今季聯賽首循環作客贏2:1,佔盡上風。

貝迪斯去年曾經殺入歐霸淘汰賽,但今季表演強差人意,目前比降班區排尾三嘅升班馬馬略卡多8分,稍有差池隨時要護級,加上隊中主力中場威廉‧卡維奴繼續受肌肉傷勢困擾缺陣,而翼鋒占美利斯繼續養傷。自然畀人睇低一線。

德甲復賽後,隊隊踢法飄忽,除拜仁外,隊隊表現完全令人大跌眼鏡。所以今場西甲頭炮分分鐘爆冷都唔奇,事關貝迪斯出名神經刀,作客經常交出代表作。而另一焦點係雙方近6次交手,有5場開出3球或以上大,筆者一於捧中位數2.5球入球大。

週五4:00am 西甲 西維爾 Vs 貝迪斯 Now 632直播

筆者 : 天叔

#癲狗日報 #癲狗波經

更新時間 : 2020年6月12日(五)01:36
建立時間 : 2020年6月12日(五)01:13