戴妖特登響六月九日呢個對香港人咁重要嘅日子宣佈初選協調機制,為嘅就係要將全香港嘅注意力集中番響議席上面:總之咩都唔好搞唔好理住,35+就係唯一出路。

有樣嘢大家可能誤會咗我,無論上屆嘅雷動、今屆嘅初選協調,甚至泛民為咗某種目標團結Form成某種聯盟,我都係非常理解,甚至唔一定反對──問題只在於,我實在太理解飯民大台嘅腐敗、果班主事者嘅陰險程度經已無撚得救,所以任何動機良好嘅制度,最尾都一定會扭曲成包庇自己人、迫害異見者嘅工具。

呢個世界最恐怖嘅,從來都係外表誠實、談吐溫文,但手段奸詐嘅陰謀家:戴耀廷就正正係當中嘅典範。自從上屆垃圾會選舉,我見識過佢講到雷動計劃點樣無私、為咗爭取非建制派嘅目標點樣偉大,然而最後卻竟然用黎迫害李卓人馮檢基以幫村長黃浩銘上位、點樣借配票為名迫死黃毓民、公然為咗踢走黃洋達叫人全投快必令九東失咗關鍵一席,明知梁頌恆最大勝機卻叫人放棄,最後仲要無恥到直至今日,都仲未公開承諾會公開嘅雷動數據,呢條撚樣縱使佔中有功,但誠信卻早已破產。

相比起黎,今舖初選協調嘅陰招同埋無恥,就真係顯而易見,正常智力都無理由睇唔倒。首先戴妖響被記者問及有咩團體拒絕初選之時,竟然古古惑惑咁話:「直選入面只有熱血公民拒絕初選」;後來去到另一個記者再次追問,先至承認教協同樣拒絕初選。

公然雙重標準搬龍門,代表兩件事:

1. 如果你係熱狗呢類大台嗤之以鼻嘅異見者,當然係會比人批鬥到仆街,戴妖亦唔介意踩多一腳;

但只要後台夠硬、夠惡、資格夠老如教協,就係可以完全當戴妖個初選機制無到,自己鍾意唔搞初選就唔搞,而戴妖係連屁都唔敢放一個;

2. 戴妖對於地區直選就意見多多,又要跟足佢遊戲規則玩、又要實體票站又盛;但功能組別呢,就一副愛莫能助嘅衰樣,彷彿係局外人完全唔關佢事一樣。當日要求教育界進行初選嘅蔣旻正,係有請求過戴妖游說教協搵出一個配合初選嘅辦法出黎,但戴妖最尾卻只拋低一句:「教協就一定唔肯初選架勒,不如你直接參加選舉,同教協直接辯論咪得囉!」

Image for post

你當日搞得個初選機制,就係預咗違反機制嘅候選人會受到懲戒,而家你卻係連開名都唔撚敢,教協亂屈蔣旻正遲報名搞唔切參選,戴妖連一句澄清都唔幫口:喂大佬,全世界連初選提名期都未開始,教育界有乜撚嘢可能唔夠時間搞?唔係蔣旻正自己公開番個Whatsapp對話出黎證明教協由一開始已無心搞初選,佢咪要食撚哂隻死貓?做初選協調人做到你戴妖咁撚賤格都得嘅?

但更離譜嘅事仲黎緊:被問及之前35+提出嘅「共同政綱」,戴妖又係拋低一句:「為免比政府多一個DQ議員嘅藉口,所以我地唔會再強迫初選候選人簽共同政綱」,聽到呢度我真係呆撚咗:

一、如果你覺得個「共同政綱」係會增加DQ嘅風險,咁第一件事點解唔會係走去斟酌下「共同政綱」嘅字眼令佢降低風險,而係斬腳趾避沙蟲索性取消聯署一了百了?

二、你戴妖係咪唔撚記得咗最初35+嘅由來?係以沈國師為首果班「黃標KOL」講,話可以透過立法會過半、啟動財政預算案嘅否決程序黎迫使政府屈服架!如果飯民連「共同政綱」都唔撚簽,即係代表佢地入到垃圾會再無任何道德責任要投反對票,咁你個35+仲有乜撚嘢意義?搞個初選黎做乜撚?

三、即係當我見倒地區直選班候選人自行發動聯署諗住挽回選民信心,我好可以同你地講,咁做係無撚用架。無撚用嘅原因唔係因為民主黨同毛孟靜都無簽呢份聲明,但其實以葉建源為首果班功能組別垃圾會候選人,經已表明一定唔會簽署「共同政綱」,而有好幾個界別佢地仲要係唯一候選人。

再次提醒大家,35+嘅理論基礎就係黎自所有參選嘅飯民統一意志就住固定嘅條件共同進退;假若當中有人中途離隊倒戈,35+就可以宣佈玩完。

結果成件事好滑稽嘅係,明明初選機制經已比教協明目張膽破壞咗,仲要講到明拒絕簽署「共同政綱」,保留日後出賣市民嘅選擇,戴妖卻係好似覺得只係兩件無關重要嘅小事咁,繼續9噏佢果個垃圾會過半大計;而果班比飯民賣咗豬仔卻懵然不知嘅黃屍傻粉,仍然妄想透過初選機制選倒班過半飯民入去,就可以成功打嬴議會戰線。

好心你地班懵撚面對現實啦,而家個初選機制就好似當日特區政府送嘅《逃犯條例》修訂同廿三條、網絡廿三條等惡法一樣,你個制度經已壞撚咗架啦;除咗推倒重來、廢棄唔用以外根本無其他選擇;仲想透過呢個破破爛爛、包庇既得利益者、迫害異見者嘅初選黎爭取香港民主,同你相信修修補補呢個破爛嘅特區政府香港人就可以安居樂業無撚分別。

當然講到呢度又有人會問:「錦鯉又有乜高見?」我嘅高見從來簡單,就係既然初選選出黎嘅代表經已唔可信任佢地會走入議會為香港人抗爭,我地就應該推翻成個初選制度,將所有拒絕抗爭、或者往績惡劣嘅溫吞飯民全部列入杯葛名單,不惜攬炒都要迫佢地退選,讓番啲位出黎比真心會走入議會抗爭嘅候選人走入議會,大台拒絕接受呢個條件嘅話就全面焦土──飯民透過攬炒迫政府屈服,市民透過攬炒迫飯民屈服,成件事就係咁簡單。

作者:無神論者巴別塔


分化分化,多少黃屍借汝之名而行惡!(三)當日共產黨話人反革命,今日飯民屈人搞分化

分化分化,多少黃屍借汝之名而行惡!(二)從不停重提OVER MY DEAD BODY探討民主最基礎理念

更新時間: 2020年7月12日(日)16:11
建立時間: 2020年7月12日(日)15:06