利物浦正式舉起英超冠軍寶座。(Phil Noble / AP)

【癲狗波經】英格蘭超級足球聯賽上演第37輪賽事,一早奠定奪冠嘅利物浦喺今季最後一個主場賽事上演入球騷,最終以5比3擊敗車路士。賽後「紅軍」正式獲頒英超冠軍獎盃,但受武漢肺炎疫情影響,迎嚟唔一樣嘅奪冠儀式。

利物浦喺今場派以強陣出擊,務求今季最後一場主場賽事可以完美謝幕,前線繼續由沙拿(Mohamed Salah)、沙迪奧‧文尼(Sadio Mané)、以及費明奴(Roberto Firmino)三叉戟出擊,而中場拿比‧基達(Roberto Firmino)回歸正選。車路士就排出3-4-3陣式,大致沿用上場足總盃4強擊敗曼聯嘅陣形。

紅軍喺開賽初段先憑復出正選嘅基達(Naby Keïta)、以及阿歷山大‧阿奴(Alexander-Arnold)先後轟入2球世界波,再喺43分歲由韋拿度姆(Georginio Wijnaldum)藉一次角球攻勢建功,利物浦擴大優勢至3球,但完半場前,對手前鋒基奧特門前剷射「執雞」,為車路士追至1:3返更衣室。

兩隊喺下半場繼續上演入球騷,費明奴先喺55分鐘頂入一球。對手前鋒佩利錫一傳一射,為「藍戰士」一度追成3:4。但「紅軍」喺85分鐘由張伯倫射入奠定一球,鎖定5:3勝局。

Follow us: @MadDogDaily on Twitter | Mad Dog Daily on Facebook

車路士賽後全失3分,現時以63分排第4位,同第3位曼聯同分,多第5位李斯特城1分,由於今場「車仔」失分,失去奠定歐聯席位機會,最後一輪將會繼續3爭2,其中李斯特城主場迎戰曼聯,如果雙方和波,而車路士輸波,車路士將會無法參加下屆歐聯賽事。

賽後舉行頒獎儀式,由1990年帶領紅軍贏得當時英甲聯賽冠軍嘅名宿杜格利殊爵士(Sir Kenny Dalglish)擔任頒獎嘉賓,其中後備門將阿祖安(Adrián)因為季初上陣多場,可以獲頒發英超冠軍獎牌。而兩名青年軍鐘斯(Curtis Jones)以及威廉斯(Neco Williams)同樣上陣次數夠5次,均可獲頒發英超冠軍獎牌。最終由膝傷提早完季嘅隊長佐敦‧軒達臣(Jordan Henderson),代表球隊高舉英超冠軍獎盃。雖然今次因為疫情而要閉門慶祝,但球會已經表示,當疫情過後會喺當地舉行盛大嘅「三冠王」慶祝巡遊,屆時會帶同另外兩個獎盃同球迷見面,包括歐洲超級盃以及世界冠軍球會盃。

至於場外,有幾千名利物浦球迷無視社交禁令,慶祝愛隊奪取首個英超冠軍,有人放紅色煙花,又揮動利物浦會旗以及高唱「你永遠唔會獨行」(You’ll Never Walk Alone),雖然大批警員在場戒備,但無作出驅散。

#癲狗日報 #癲狗波經

更新時間 : 2020年7月23日(四)08:06
建立時間 : 2020年7月23日(四)05:41