【癲狗波經】今年嘅英格蘭超級聯賽升班附加賽決賽,將於明日凌晨喺溫布萊球場上演,由兩支倫敦球隊賓福特以及富咸上演另類「倫敦打吡」。無論今仗孰勝孰負,9月新一季英超都會再多一支倫敦球會。

賓福特以及富咸喺英冠聯賽同得81分﹑分列第3及第4位,兩隊先後喺附加賽4強分別淘汰史雲斯以及卡迪夫城,順利躋身英冠附加賽決賽,爭奪來季最後一個英超席位。其中賓福特爭取相距73年重返頂級聯賽以及首次登陸英超聯賽、而富咸就期望降班翌年後再度重返英超競逐。

賓福特喺季尾兩場比賽「發瘟」,導致分數無法超過亞軍西布朗,錯失以英冠亞軍身份直接升班嘅機會。教練法蘭克表示,雖然今屆聯賽賓福特「雙殺」富咸,但富咸無論名氣同埋決賽經驗都比球隊大、所以決賽係兩碼子嘅事。

至於富咸領隊兼英格蘭名宿史葛‧柏加表示,富咸自降班後喺英冠前路一直艱巨,但慶幸自己見到球員進步,有信心可以再次贏出,重返英超。

Follow us: @MadDogDaily on Twitter | Mad Dog Daily on Facebook

而呢場決賽除咗爭奪英超最後一個席位外,仲有一大筆豐厚潛在收入,絕對可以令球會「賺到笑」。根據《BBC體育》報道,富咸勝出將獲得至少1.35億英鎊;假如賓福特升超成功,更可獲得1.6億鎊。

#癲狗日報 #癲狗波經

更新時間 : 2020年8月4日(二)13:58
建立時間 : 2020年8月4日(二)13:36