拜仁憑住拿比上半場梅開二度以及利雲下半場一記頭鎚,3:0擊敗「黑馬」里昂,第9度殺入歐聯決賽。(Getty Images)

【癲狗波經】今日凌晨上演歐聯4強,由德甲拜仁慕尼黑與法甲里昂爭奪決賽最後一席位,最終拜仁憑住拿比(Serge Gnabry)上半場梅開二度,最終以3:0淘汰里昂,協助球會第9次殺入決賽,將會同法甲班霸巴黎聖耳門爭奪今季大耳盃寶盃。

法甲代表里昂踏入歐聯淘汰賽後打出超水準,連贏意甲班霸祖雲達斯及英超豪門曼城,事隔10年再闖4強;拜仁就歐聯9連勝,上場更血洗巴塞8:2令人咋舌。今場兩軍都乘勝追擊,排出同上場晉級嘅相同正選陣容。

Follow us: @MadDogDaily on Twitter | Mad Dog Daily on Facebook

開賽里昂有兩次入波機會,但先後畀迪比以及艾甘比浪費,錯失領先機會。直至18分鐘,拜仁成為領先一方,拿比喺右邊禁區角接應傳送,單人匹馬殺到禁區面對里昂一眾球員防守,左腳順便勁抽破網。其後佩利錫左路無人看管傳中,利雲杜夫斯基門前「失機」未能剷入,拿比即時巾上「執雞」,喺33分鐘協助拜仁領先到2:0。

里昂喺下半場加強攻力,但多番射門都畀門將紐亞一一撲出。拜仁更加喺完場前,由右閘甘美治喺右路開出罰球,利雲杜夫斯基力壓兩名中堅一頂入網。最終拜仁以3:0大炒里昂,「昂」首殺入決賽,將硬撼法甲班霸巴黎聖耳門。

決賽將於香港時間下週一(廿四)凌晨喺葡萄牙首都里斯本盧斯球場上演,拜仁在之前曾經8次殺入決賽,最終5次成功捧盃而歸,包括1974年、1975年、1976年、2001年、以及2013年。至於巴黎聖日門,今次係球會歷史上首次殺入歐聯決賽,PSG喺歐戰賽場上曾經先後贏得歐洲盃賽冠軍盃以及圖圖盃冠軍。

#癲狗日報 #癲狗波經

更新時間 : 2020年8月20日(四)05:25
建立時間 : 2020年8月20日(四)05:03