美斯自出道至今一直效力巴塞隆拿,如今係時候講拜拜?(Getty Images)

【癲狗波經】巴塞隆拿早前喺歐聯8強2:8慘遭拜仁慕尼黑血洗,恥辱性被淘汰出局,更成為球會史上一大敗仗,陣中「元老」美斯昨日(廿六)決定出「塞」,離隊他投。

據西班牙傳媒國家報(El País)報道,美斯已經向巴塞隆拿表示,佢要離開球會嘅決定,要求即時啟動合約入面自動解約條款。

至於美斯隊友蘇亞雷斯,已獲新領隊朗奴高文告知要求離隊。

另外,西班牙資深足球評論員艾費度·馬天尼斯(Alfredo Matínez)喺社交網站Twitter發文,指美斯唔會再為巴塞效力,呢位最佳球員要離開巴塞。其後又發文指,美斯唔會再出席呢個星期嘅球會訓練。

現年33歲嘅美斯出道至今職業生涯一直效力巴塞隆拿,並隨隊橫掃多項國內以至國際賽事冠軍,包括4次歐聯冠軍冠軍同10次西甲冠軍。同時佢又打破諸多個人紀錄,先後6次奪得歐洲金靴獎、6次歐聯神射手、6座金球獎、以及6次FIFA國際世界足球先生。

美斯個人以及球會生涯已達公認球王級數,惟國家隊生涯屢屢成「亞二」,美斯至今僅喺2008年中國北京奧運男子足球項目奪得金牌,除此之外一無所獲,其中2014年世界盃決賽喺加時0:1不敵德國,無緣捧起大力神盃。

Follow us: @MadDogDaily on Twitter | Mad Dog Daily on Facebook

#癲狗日報 #癲狗波經

更新時間 : 2020年8月26日(三)02:15
建立時間 : 2020年8月26日(三)02:01