奧斯威辛集中營是我一生中最難以忘記的地方之一,原本已消逝在風中的抽象歷史殘篇,在這刻骨銘心的旅程中,再度重現在腦海裡面。(William Luk攝)

2018年年初,我選擇一支公到訪波蘭,去到古城格勒古夫(又名克拉科夫,波蘭文:Kraków)之後,就順便參觀埋奧斯威辛集中營。呢個保留住二戰畀納粹德軍蹂躪嘅歷史建築,佢亦都係我背包客生涯入面,最刻骨銘心嘅旅程之一。

奧斯威辛集中營背景簡介

奧斯威辛集中營喺1940年建立,亦係當地三個集中營之一,直到1945年被蘇聯紅軍攻入。喺短短5年間,呢度處決過逾110萬人,包括猶太人、蘇聯戰俘、同性戀者、異見人士、知識份子等。時至今日,毒氣室入面嘅牆壁仲可以清楚睇到啲囚犯喺死前掙扎嘅抓痕。

集中營保安非常嚴密,入場參觀一定要輕裝上陣,如果有大背囊就要放喺儲物櫃寄放,之後仲要經過X光機,先畀入場。另外,入場參觀基本上一定要跟團,但如果提早或者可以畀你自己自由行。參觀團有多國語言選擇,但有人數限制。

Follow us: @MadDogDaily on Twitter | Mad Dog Daily on Facebook

事先聲明,部份地方會令你背脊發涼,因為有啲係死刑執行地點,當你聽住導遊講背後嘅故事你真係會忍唔住想喊出嚟。另外,當時每一個人入去集中營之後,隨身物品都會畀德軍全數沒收,而家集中營入面唔同建築物都有展示當時後收集到嘅物品,包括眼鏡、鞋,行李、梳、鏡等等。其中一個展館更會有一大堆嘅頭髮會展現喺參觀者眼前,係當時德軍會替每個囚犯剃頭所收集返嚟。 

中學上歷史堂,必定會講呢一段人類史上最大型之一嘅種族滅絕事件。原本已消逝喺風中嘅抽象歷史殘篇,喺呢段刻骨銘心嘅旅程,再度重現喺腦海入面。當時同團成員入面,有兩位猶太裔澳洲人,佢哋今次嚟波蘭旅行,就係順便搵下祖先係咪身處過呢度,佢哋只要一見到同名嘅囚犯相,就會即時用相機影低。佢哋同我講大伯當年就係喺度失蹤,至今都不知去向。

還記得離開營區時,我同團嘅1名英國呀姨不斷流下眼淚,佢係一名居住喺白禮頓嘅典型英格蘭人,當時我同佢講,「你望下個吊刑場,最後嗰個納粹營區管理將軍未係喺度執行咗絞刑,正義最終都係得到伸張」。

另外,我特登揀寒冬到訪,係因為想體驗到底當時身處呢度係會凍成點。因為當時啲囚犯,冬天都係得一件衫,連鞋都冇,好多都係捱唔到寒冬監生凍死。當時我着住件羽絨入奧斯威辛,感覺唔係太凍。但之後到訪二號營,即比克瑙集中營,就完全凍到講唔到嘢。當德軍喺1941年建立呢個營之後,就進行咗比奧斯威辛更大規模嘅屠殺。營入面有超過300間木排房,冬天好多人因為無足夠衣着凍死。而我喺之後係病住去烏克蘭,但呢啲係後話,有機會再作介紹。

最後,請各位緊記!奧斯威辛集中營,並非一個嬉皮笑臉嘅地方。請入場之後保持嚴肅,因為呢個係人類史上最令人髮指嘅殺戮場地之一。

下回待續

▼交通資訊懶人包▼

• 門票免費 (但4月至10月10:00-15:00 呢段時間入場,要強制畀導覽團費用)
• 建議安排朝早出去,晏畫去埋鹽礦,建議參加:奧斯威辛集中營一日遊
• 如果堅持自由行,有火車由Krakow火車站出發。另有巴士Krakow巴士站出發
• 第一營巴士站前有免費接駁巴士到第二區,見到巴士上顯示Birkenau就可以上車
• 建議大家去之前做好資料搜集,波蘭人英文口音出名重
• 園區禁止飲食,出發前記得食飽啲,奧斯威辛集中營停車場隔離只有一間Snack Bar

#奧斯威辛集中營 #二戰 #奧斯威辛 #納粹 #德軍 #猶太人 #克拉科夫 #格勒科夫 #文圖萬里 #世界遺產

 

作者簡介: William Luk,癲狗日報採訪主任,有時間就拎起背囊周圍走。Facebook專頁大不列癲狗,主要介紹各國世界遺產、風土人情、宗教文化。