英超上演戲劇性賽事,曼聯完場後獲VAR判罰十二碼,3:2客勝白禮頓。(衛報)

【本報訊】英超週六(廿六)早場,由白禮頓主場迎戰曼聯,上演戲劇性賽果,雙方一共炮製5個入波、5次中柱、兩球12碼、兩球詐糊、兩次吹完場雞。但幸運之福企咗喺曼聯一方,最終以3:2擊敗白禮頓,打開今季勝利之門!

白禮頓一開場就佔盡優勢,最終由前鋒慕比(Neal Maupay)喺40分鐘憑12碼打開紀錄,但完半場前中堅鄧克(Lewis Dunk)擺老烏,雙方1:1返更衣室。

下半場白禮頓喺開賽初段曾經獲得12碼,但其後畀VAR推翻,曼聯喺53分鐘拉舒福特(Rashford)入波,但又畀VAR判食詐糊,但2分鐘後拉舒福特禁區起腳省中上半場擺老烏嘅中堅鄧克入網,「紅魔」首度反超前2:1。

白禮頓喺落後之後奮起反擊,但一直久攻不下,要一直到補時階段,由蘇利馬治(Solly March)頭槌破網追成2:2。原以為雙方各領1分完場,但曼聯中圈開波後,隨即展開攻勢,喺最後一擊由隊長麥佳亞(Harry Maguire)施展頭鎚攻門被對方護空門後,球證即刻吹雞完場。

但球證喺耳機收到通知,随即翻睇VAR,發現白禮頓前鋒慕比犯手球,結果喺吹雞完場後改判12碼。曼聯由費南迪斯操刀一射破網,結果曼聯戲劇性贏3:2,全取3分。根據球例,只要球證未進開球場草地範圍,比賽仍然有效。

「紅魔」整體表現麻麻,幾個主力球員繼續發夢,其中普巴成為陣中最低分球員。曼聯再咁搞落去,領隊蘇斯克查真係有排頭痕。相反,白禮頓全場佔優,5次中柱,平咗英超單場中柱最多紀錄,其中翼鋒更3次中晒左中右門柱,認真黑仔。

Follow us: @MadDogDaily on Twitter | Mad Dog Daily on Facebook

#癲狗日報 #癲狗波經

更新時間 : 2020年9月28日(日)01:11
建立時間 : 2020年9月27日(六)23:48