英超今週上演多場精彩賽事,其中「狐狸」李斯特城作客5:2大炒曼城,前鋒華迪個人上演帽子戲法。(Getty Images)

【本報訊】英超今週繼續上演精彩賽事,繼昨日(二十七)曼聯完場後獲十二碼3:2客勝白禮頓後,「狐狸」李斯特城作客5:2大炒曼城,當中上屆聯賽神射手前鋒華迪(Jamie Vardy)個人上演帽子戲法。至於週薪逾130萬港紙嘅曼城領隊哥迪奧拿則錄得執教生涯其中一場最大敗仗。

曼城開場就取得優勢,由倒戈李城嘅馬列斯(Riyad Mahrez)喺開賽4分鐘把握對方解圍失誤,轟入領先一球。而馬列斯喺入波後面對舊東家,選擇大肆慶祝,卻不知之後會係曼城噩夢嘅開始。李斯特城喺其後半個鐘一直放棄控球權任由曼城猜波,直到第37分鐘,李斯特城一次快速突擊,巴利斯(Barnes)傳畀華迪,華迪喺禁區畀對方右閘獲加(Kyle Walket)拉跌,球證直指12碼點,華迪操刀勁射破網,幫助李城半場追和1:1。

換邊後初段,華迪喺4分鐘內梅開二度,包括一球12碼,成為繼美斯(Lionel Messi)後另一位單場對曼城射入3球嘅球員。其後傷癒復出兼簽新約嘅占士‧麥迪臣(James Maddison)射入一球世界波。隨後曼城由般尼茅夫加盟嘅中堅艾基(Nathan Aké)頂入一球,一度追近到4:2。

惟好景不常,曼城接近完場前再喺禁區犯下天條,中場泰利文斯(Youri Tielemans)毫不客氣幫「狐狸」射入今場第三個12碼,最終幫助李城取得大勝,更以得失球差壓過愛華頓,上升榜首。

Follow us: @MadDogDaily on Twitter | Mad Dog Daily on Facebook

至於2場早場賽事,頭場列斯聯苦戰下1:0擊敗錫菲聯,近況大勇嘅賓福特(Bamford)喺完場前頂入全場唯一入球。另一場紐卡素就作客1:1迫和熱刺,熱刺成為另一支被VAR以新球例判罰12碼嘅受害者。熱刺開場早早領先,盧卡斯‧莫拉(Lucas Moura)喺25分鐘接應哈利‧簡尼(Harry Kane)傳送搶先一步將皮球送入網。其後「喜鵲」一直處於捱打狀態,更加無任何中目標埋門,直至完場前卡路爾(Andy Carroll)喺禁區頭鎚省中熱刺中堅迪亞(Eric Dier)右手。球證翻睇VAR,並根據新球例直指十二碼點,「喜鵲」由威爾遜(Callum Wilson)操刀射入十二碼,最終迫和熱刺。而熱刺領隊魔連奴喺得知判罰12碼後,更加直接提早離場返回更衣室。

另外,香港時間今日(二十八)凌晨亦上演一場賽事,韋斯咸喺領隊莫耶斯缺陣下主場大勝狼隊4:0,打開今季勝利之門,睇怕中咗武肺嘅莫耶斯可以繼續安心休養。

英超今輪仲有兩場賽事,將喺明日(二十九)凌晨進行,分別由兩連敗嘅升班馬富咸對阿士東維拉以及應屆冠軍利物浦大戰阿仙奴。

 

#癲狗日報 #癲狗波經

更新時間 : 2020年9月28日(一)05:11
建立時間 : 2020年9月28日(一)02:13