英超一晚上演兩場大比數賽事,輸家都係傳統強隊,繼曼聯後,利物浦作客慘負阿士東維拉2:7。其中維拉前鋒屈堅斯(右)更喺上半場上演帽子戲法。(天空體育)

【癲狗波經】英超一晚上演兩場大比數賽事,繼曼聯主場慘敗熱刺1:6,應屆冠軍利物浦作客阿士東維拉竟然同樣爆冷2:7不敵對手,令人大跌眼鏡。

利物浦早前證實,陣中前鋒主力沙迪奧‧文尼確診武漢肺炎,係繼西班牙中場艾簡達拿後,隊中一週內內第2個確診球員,兩人都錯過今場賽事。

利物浦今場派出阿祖安頂替操練時受傷嘅正選門將艾里遜把關,但開賽僅4分鐘就成為失波罪人,佢喺後場短傳時交失,導致基亞利殊偷雞再橫傳無人看管嘅奧利‧屈堅斯射成1:0。唔知「紅軍」今場係心理問題定係再有球員中招,成隊表現極為「恐怖」。22分鐘,屈堅斯再同基亞利殊一次撞牆配合後,直接殺入禁區,再推大位壓過祖‧高美斯後鏟射破網,幫助維拉擴大比數至2:0。其後巴克利錯失一次黃金機會,如果唔係維拉唔夠30分鐘已經領先到3:0。33分鐘,利物浦憑沙拿門前補射追返1球,將比數拉迎近到1:2。

但僅喺2分鐘後,維拉憑住一次角球攻勢,祖‧高美斯頭槌解圍唔遠,麥堅即刻窩利勁射,但省中雲迪克右腳改變方向收死門將阿祖安,維拉拉開比數到3:1。利物浦班後防好似仲未瞓醒,維拉喺完場前再憑定位球攻勢入波,查斯古特先喺尾柱控定後再傳中,奧利‧屈堅斯完全無人看管下輕鬆頂入。呢位24歲嘅本土前鋒喺上半場完成帽子戲法,亦幫助維拉以4:1嘅優勢返更衣室。

Follow us: @MadDogDaily on Twitter | Mad Dog Daily on Facebook

下半場「紅軍」繼續頹勢,開場10分鐘再度失守,上半場多次失機嘅巴克利終於取得入球,但紅軍喺失波過程仍然黑仔,巴克利喺禁區頂轉身起腳施射,波竟然省中阿歷山大阿奴改變方向,笠死門將阿祖安,維拉出乎意料地領先到5:1。不過利物浦其後喺60分鐘追返一球,沙拿禁區攞近柱,追近比數到2:5。

然而,紅軍今場失誤多多,特別後中場經常無厘球交失或者攔截失誤,阿士東維拉喺66分鐘前場緊逼把握到紅軍失誤,再由基亞利殊推大位燙射,個波再次省中紅軍球員改變方向入網,維拉領先到6:1。但維拉仍然未入夠,75分鐘基亞利殊接應麥堅的直線,呢位人稱「維拉周柏豪」嘅隊長單刀匹馬跑足半場再一射入網。最終阿士東維拉爆冷以7:2擊敗利物浦,獲得寶貴3分,賽後以9分,壓過踢多1場嘅李斯特城同埋阿仙奴,升上聯賽榜次席。

#癲狗日報 #癲狗波經

更新時間 : 2020年10月5日(一)05:06
建立時間 : 2020年10月5日(一)04:12