【英超】曼市連續2週出現悲劇,曼聯主場1:6畀由摩連奴領軍嘅熱刺大炒。領隊蘇斯克查呢獲認真頭痕。

【癲狗波經】英超又再上演大比數賽事,受害者由曼城轉到同市球隊曼聯。「紅魔」喺開賽唔夠1分鐘就靠12碼領先熱刺,但最終因為打少一個人兼後防多次無厘頭犯錯,兵敗如山倒,慘敗熱刺1:6。熱刺領隊「寸王」摩連奴自上季季中接手後,領軍4次鬥英超舊東家,包括曼聯同車路士都只係得1和3負,今場贏波終於打破「倒戈魔咒」,吐氣揚眉。但「寸王」全場極為冷靜兼黑面,或者佢心底裡都知道,曼聯換邊個領隊都係一樣,球員先係問題所在。

雖然曼聯喺開波唔夠1分鐘借住12碼先打開紀錄,但後防球證不斷太錯,畀熱刺喺上半場連入4球反超前。其中孫興慜繼續勇態,喺熱刺落後唔夠7分鐘射入1球,協助球隊反超前。另外,馬迪爾喺29分鐘更被球證指喺禁區打咗拉美拿塊臉一下,最終直紅離場。曼聯1分鐘後防再犯錯,哈利‧簡尼射成3比1。第37分鐘,孫興慜再下一城,上半場最終爆出1:4大爆冷賽果,亦係曼聯英超史上首次半場畀對手入4球。

曼聯喺少打一人嘅情況下,下半場一開賽再失波,50分鐘熱刺喺中場組織,再傳畀殺入禁區嘅右閘奧里亞後上射入,最比數拉開成5:1。「紅魔」之後一直處於捱打局面,直至77分鐘普巴喺禁區對戴維斯犯下天條,球證直指一個12碼點,由哈利‧簡尼操刀一射破網,熱刺最終作客大炒6:1,亦係曼聯自2011年後,再次主場輸6球。

▼7個入球足本睇▼

曼聯主場咁樣輸波固然失禮,但同市宿敵曼城喺賽後雪上加霜,喺社交網站Twitter發文串曼聯。但有人喺下面留言,指「曼城唔係唔記得,上星期主場先慘敗李斯特城2:5掛?」

Follow us: @MadDogDaily on Twitter | Mad Dog Daily on Facebook

另外,英超上演3場賽事,上場大勇嘅李斯特城返到主場竟爆冷不敵韋斯咸0:3、阿仙奴主場2:1小勝錫菲聯、狼隊1:0擊敗「升班馬」富咸。賽後錫菲聯以及富咸同樣開咧4連敗,身陷降班漩渦。

#癲狗日報 #癲狗波經

更新時間 : 2020年10月5日(一)02:50
建立時間 : 2020年10月5日(一)01:24