馬體會前鋒迪亞高哥斯達9月確診武肺,而家後遺症纏身,再度缺席。(美國今日體育)

【癲狗波經】西甲球會馬德里體育會前鋒迪亞高哥斯達喺9月「開咧」前確診武漢肺炎,隔離後再測試結果呈陰性,趕及「開咧」戰中上陣,並射入1球。但呢位32歲老大哥喺上場擊敗巴塞隆拿後再次受傷。有外電報道,哥斯達傷患原因竟然係深層靜脈血管栓塞(deep vein thrombosis),擔心哥斯達係因為呢個武肺後遺症,需要長期服藥,或會影響表現。

馬德里體育會目前聯賽排第2,落後榜首皇家蘇斯達3分,但打少對方2場,亦係今季西甲目前唯一不敗之師。 哥斯達早前因傷缺陣3場聯賽,喺上賽球會擊敗巴塞隆拿比賽入面,下半場中段後備上陣,不過喺周中歐聯對莫斯科火車頭嘅比賽前,發現右腳有血塊又掛起免戰牌。

有多間西班牙體育傳媒都指,哥斯達出現深層靜脈血管栓塞。球會早前發聲明確認哥斯達患上此怪病,指「哥斯達嘅傷情並非上陣受傷或觸及舊患,有待醫療團隊作進一步處理。」

Follow us: @MadDogDaily on Twitter | Mad Dog Daily on Facebook

本報翻查資料,深層靜脈血管栓塞患者,最多要半年先好番。而西班牙衛生部門曾經表示,有一啲武肺患者,康復之後問題多多,其中有人患上深層靜脈血管栓塞。因為免疫系統出現過敏反應,為抵抗病毒製造凝血物質,引致血栓。根據當地統計顯示,有近3成死者,驗屍時都發現有血栓塞問題。

有香港醫生向本報表示,深層靜脈栓塞有機會導致血栓脫落流動到肺動脈或造成肺栓塞,嚴重有機會猝死。

#癲狗日報 #癲狗波經

更新時間 : 2020年11月28日(六)22:29
建立時間 : 2020年11月28日(六)21:56