多謝骨精鵬,如果唔係你單嘢,香港人呢年幾以來嘅鬱悶心情,又點會得短暫抒發。君不見這兩天,網上洗版,網民大談:何以一位擁有類似東廠錦衣衛權力、類似蓋世太保威風的國安處處長,會CHEAP到幫襯無牌按摩院?現在真相大白了,據《東方日報》昨日(五月十二日)深夜報道,「據了解,蔡有長期腰痛」。有腰痛,仲要係長期,就梗係要去揼骨啦。唔使葉太教我哋,我哋都知道:揼骨無罪,出火有理。不過,諗深一層,既然大條道理去揼骨,香港有咁多攞正牌嘅骨場唔去,點解偏偏要去啲無牌嘅。講到呢度,又要再次多謝骨精鵬,治絲益棼,佢單嘢愈解愈多破綻,又畀多幾日時間大家去取笑。其實,昨天PK鄧開記者會,我哋都好想問吓佢,骨精鵬當日去揼骨,間無牌按摩院有冇裝「安心出行」,冇的話,罪加一等;有的話,骨精鵬係嘟咗,定寫紙仔,寫嘅係唔係真實個人資料?其實有關方面應該研究吓,搞個「安心出火」APPS,等骨友知道邊啲骨場可以出火,以免好似骨精鵬咁誤墮陷阱。

Follow us: @MadDogDaily on Twitter | Mad Dog Daily on Facebook

總括起來,整件事有兩個關鍵要點,至今尚待追查:一)那間無牌按摩店的地址;二)邊條TEAM咁夠薑,查牌撞到錦衣衛阿頭都唔畀面,要落簿。這兩點也是關連的,知道第一條,就可推算是那個環頭的伙記參與行動(如果是跨環頭查無牌按摩店,甚至出動特別職務隊,那事情就更可疑了)。愚見認為,香港無牌按摩店雖多如牛毛,但若傳媒肯花時間,不難查。我甚至可推斷,爆料給《南華早報》的消息人士也掌握到這些資料。我反而擔心,那間無牌按摩店的老闆(娘)和招呼骨精鵬的骨女很快會「被失蹤」。

紙包不著火。昨日的所謂「記者會」,PK鄧表現徹底失敗,一問三不答,支吾其詞,連骨精強個名都係NOW嘅記者追問多次才 CONFIRM。如果連呢啲最基本資料都唔講,樣樣都以「正在調查中,不便透露」做擋箭牌,個記者會開嚟托咩。最好笑嘅係,PK鄧話骨精鵬停職無影響國安處工作。咁即係話,骨精強喺唔喺度都冇分別,咁做乜支咁大份人工畀佢,浪費公帑?愈唔坦白從寬,件事就愈難斷尾。

另一個枉作小人的是NOW新聞台主管陳鐵彪。件事昨日凌晨已經通晒天,佢仲以「官方未有回應」為借口,要已經出街的相關新聞下架。NOW前線採訪記者唯有再三追問PK鄧,不認不認還需認,到最後又係要確認事件主角係骨精鵬。有網民因此發起CUT NOW NOW(現在就CUT NOW)運動。NOW嘅老細係小超人,佢養一個咁嘅「新聞敗類」喺旗下電視台,實在損害形象。當然,我亦知道,強如小超人,有啲嘢唔輪到佢話事。

我説PK鄧、陳鐵彪枉作小人,是因為佢哋根本唔知道對手仲揸住幾多料。如果此事牽涉到各方勢力的政治鬥爭,好戲還在後頭,好睇過《寒戰lll》。另外,稍為嚴肅看這件事,應知有其必然性。國安處成立這麼倉卒,整個VETTING SYSTEM完全不能配合。骨精鵬仲有幾多精彩故事,港澳辦、中聯辦掌握了嗎?其他準備上位的人,又是否有未爆的「醜聞」?禮崩樂崩,得上高位只因靠阿諛奉承、出賣良知,這樣的「雞鳴狗盜」怎會有清白之身。單看一位局長憑著放當權者的肖像而上位,就知道整個公務員VETTING SYSTEM已經徹底崩潰。這樣的制度,沒有醜聞才怪。

梁錦祥