家下嘅時勢,講政治係票房毒藥。本來長篇累牘,已經冇人會睇,就算毓民日日聲嘶力竭,對準極權,爆粗鬧人,一樣係「聽者藐藐」。即使如此,闢邪辨佞、儆惡懲奸初衷不變,話之你係人係鬼,一旦有出賣港人言行,毓民必然口誅筆伐,一個都唔會放過。

Follow us: @MadDogDaily on Twitter | Mad Dog Daily on Facebook

中共單方面訂立嘅全新「立法會選舉」,即係假選舉,將會喺十二月十九日舉行,十月三十日開始接受提名;一個弄虛作假,預知結果嘅所謂立法會選舉,選舉委員會佔咗四十席,由一千五百個選委推選出來,而選委絕大部分係變相委任,毫無代表性,更加荒謬者乃是選委有提名權。至於功能組別三十席,則是一如既往之小圈子選舉,三百多萬登記選民投票選出嘅地區直選議席只有二十個,而且參選者要由共匪直接操縱嘅選委提名、國安委批准,通過資格審查先至可以成為候選人。

《基本法》規定之循序漸進式民主進程,此間泛民主派政黨曾幾何時奉為金科玉律,家下嘅新選制何只是民主倒退,簡直就係北韓同中國選舉嘅雜交產物也。作為泛民主政黨人物,稍有廉恥,都不應該心存僥倖,更不可好似啱啱喺禿頭植上假髪,改變形象咁話嘅馮檢基,講乜柒嘢:never say never,其實就係除定條褲,凖備被「入彀」,認真核突兼無恥!

成七十歲仲「植髪」改番個撚款,準備參加共匪「垂餌與入彀」閙劇嘅馮檢基,年前因為權力鬥爭成為輸家,被迫退出民協呢個佢有份創立嘅老牌泛民政團,反面收場,但係佢嘅政治投機本質喺民協仍然陰魂不散。

民協昨(十四)日召開特別會員大會,通過容許會員報名參選立法會,民協署理主席楊彧形容此乃「艱難的決定」,據了解,黨內暫時只有早前宣誓過關嘅黃大仙區議員,花名「老虎仔」嘅廖成利有意參選。「植髮基」同「老虎仔」兩個當年有份參加「臨時垃圾會」,而家「大小不良」繼續出賣香港人,毓民就算識咗佢哋兩個幾十年,一樣冇面畀,一於鏟到佢哋上天花板!

講起臨時垃圾會,廿五年前,毓民喺《快報》一個專欄用「花無情」呢個筆名,嬉笑怒罵皆文章,寫過一篇題為《恭喜基哥同民協》嘅「三及第」式短文,其中一段今日睇番,就好似晨早起身照鏡時一樣,好佩服我自己:「基哥喺籌委會投票反對成立臨時垃圾會,搞到畀白頭魯喊打喊殺,經過一段時間嘅痛切反省,終於幡然悔禍,重新回到『愛黨愛國愛港』嘅『三愛陣營』來,決定參選臨時垃圾會!⋯⋯社會主義祖國偉大嘅共產黨既往不咎,民怯由反動派變成舐共派,總算浪子回頭金不換,獲得黨同國家領導人嘅原諒,可以一齊喺回歸大業上攜手並肩。恭喜基哥,恭喜民怯,花無情唔係正言若反,係講真嘅!臨時垃圾會將來有咗民怯嘅成員,可以更加垃圾,名副其實矣!」

狗改不了吃屎,馮檢基同民協(怯)、背叛民主、出賣港人,一路走來,由頭到尾都係仆街!

講開「嬉笑怒罵皆文章」,長文冇乜人睇,咁一千字嘅《癲狗編輯室》,短小精悍,句句到肉,再加埋毓民聲演,大家係咪應該付費支持呢?

2021 Oct 15 癲狗編輯室
/黃毓民