十二月十九日嘅垃圾會選舉投票率必然係史上最低,正是信不信由你,反正我信了!支持「完善選舉制度,落實港人治港」嘅共匪走狗、奴才及一眾應聲蟲,個個戴定頭盔,眾口一詞「投票率低唔代表啲乜嘢」,做到人大常委嘅「痰尿盅」,忽生奇想:「選民如果認同所有候選人,唔使特登出嚟投票嘅」。挑,講呢啲,「他奶奶的」,真係唔想問候佢娘親都唔得!至於一啲所謂政治學者,「預測」什麼投票率不會超過三成,「阿媽係女人」,又何勞你哋去扮專家分析呢?看官可否記得,「完善選舉制度」出台後,「十九學者」蔡子強話新選制「安全系數」高,泛民冇乜著數,不過地區直選二十席應該可以穩佔一半⋯。為咗曝光可以柒得咁交關,「蔡子」你好嘢!

重有唔夠一個月就係「新香港」垃圾會選舉投票日,呢一場共匪可以完全操控嘅馬騮戲,除咗藍絲、腦殘、小粉紅,會有啲乜嘢人去投票呢?前年區議會選舉支持泛民主派及本土派年輕候選人嘅百九幾萬選民,你估佢哋會出嚟投票咩?有幾個乞到提名,又通過資格審查嘅「非建制派」老政棍,包括馮檢基、狄志遠、譚香文,三人票從何來?究竟會有啲乜嘢人,投票畀呢幾個人唔似人鬼唔似鬼政治瘀血呢?莫非主導成個假選舉嘅西環共匪黨棍,有辦法配到票,令到馮、譚二人可以在「雙議席單票制」嘅地區直選「凍蒜」,而一直係泛民主派票倉之功能組別社福界,狄志遠又可以低票過到骨,一圓三十年未遇嘅垃圾會席位美夢(「阿狄」一九九一年當選立法局議員,二OO八年參選社福界功能組別輸咗比張國柱)?

今日有消息話,「白鴿黨」向尋求支持嘅「非建制派」候選人發問卷,想話要了解下佢哋嘅政見喎。當中有九個問題,包括是否支持盡快普選特首、現時立法會是否小圈子選舉、未普選立法會前應否立「廿三條」、是否贊成訂立假新聞法、香港警權是否過大等等。事緣最近最少有四名自稱非建制派候選人,尋求「白鴿黨」或其成員以個人名義支持參選,其中一個係狄志遠,佢搵咗佢嘅「滙點」兄弟李華明以個人身份支持。「阿狄」表示尋求「肥仔明」支持係因為佢形象比較溫和理性,而且喺社福界活躍多時,「對我嘅形象建立有幫助」,而且以往同李華明喺民主黨同立法局合作多時,雙方「志同道合」。

講到二人「志同道合」,毓民登時上哂頭⋯。二十七年前,「滙點」三子狄志遠、李華明、黃偉賢喺立法局就劉慧卿「全面直選」私人草案投棄權票,拖慢香港民主進程,直頭係民主罪人,「肥仔明」當年出席亞視「龍門陣」節目時,畀我鏟到上天花板。事實證明,狗改不了吃屎,狄李二人出賣民主「合作無間」,一路走來,始終如一。

尋求「肥仔明」支持,可以攞到社福界啲票?眾所鳩知,註冊社工黃多過藍,如果黃嘅唔出嚟投,淨係靠西環配票,「阿狄」就算赢到都好樣衰,「肥仔明」出嚟撐下,唔通真係呃到票?

有得入閘屎到食,跪都跪咗,唔爭在跪多一個「白鴿黨」,如果得到舊黨友嘅支持,可以再次戴番個「泛民」面罩,「煽惑」啲黃絲社工投票;今時今日,「又要做妓女又要攞貞節牌坊」,呢個如意算盤又點會敲得響呢?

2021 Nov 22 癲狗編輯室
/黃毓民

b