0 Items

Category: 專欄

錢建榮:明代的忘年戀

廿一世紀社會,女性的經濟實力漸漸提昇,甚至有超越了男性的趨勢。社會上的兩性關係面臨轉變,女性的主導權愈來愈明顯。於是姊弟戀的故事屢見不鮮。不過,中國兩性的相交互動,忘年戀在古代亦值得深思。 明憲宗與萬貴妃就是,諱見深,明代第六代皇帝英宗的長子也。母貴妃周氏。初名見浚。其後英宗在土木之變投降,被蒙古族瓦剌俘虜。明皇太后命立為皇太子。可是在景泰三年,朱見浚被廢為沂王。直至後來,他的父親重奪帝位(天順元年),他才復立為皇太子,改名見深。 童年事情對皇帝的行為往往有極大的影響。成化皇帝三歲便立為太子(儲君)。可惜,其父親英宗於土木之變被擄。朝廷大臣商議迎其叔父郕王繼位,是為景帝。於是正統朝的太子在景帝身邊,岌岌可危,有朝不保夕,宮中上下,人際關係十分功利,現實。很多人鮮有與他交往以避禍。所以他只能與比他長十七歲的宮女萬貞兒接觸,由是令太子與後來萬貴妃共同產生一段刻骨銘心的經歷。成化皇帝即位後,專寵萬貴妃,甚至吳皇后因為打過萬貴妃,而被廢,打入冷宮。這充分顯出他的戀母心理。 明憲宗追求長生,喜歡房中術,於是方士懷著從各種妖書中抄錄而來的偏方和邪術,覲見皇帝。上有好者,下必千方百計迎合之。萬貴妃亦深諳自處之道,忘年戀一旦時間久了,彼此的關係是感恩多於於性感。而且男是皇帝,精力旺盛,於是她一邊讓皇帝與其他女子享受性愛之樂;另一邊即以太監和御醫為目,監視宮中各人,不許有懷龍孕者;懷者即設法把胎兒打掉。藉此鞏固個人地位。 後來有一宮女與皇帝發生關係後,設法躲起來。待孩子出生後,有六年時間都藏在宮廷的地窖裏生活,以避開萬貴妃的追殺,那就是後來的孝宗皇帝。 史書常言,成化皇帝增設西廠,以監察朝臣。其對明代政治的影響,實際是皇帝、萬貴妃、宦官和方士組成的集團,對士風的摧殘。<<明史。萬安傳>>便有下列的記載: 憲宗一日在宮中,接到一份奏摺,內容盡是言房中術。末尾的署名是”臣安進”。可見當時的士風開始敗壞。 更有趣的是,孝宗皇帝因為童年的經歷而變得十分專一。孝宗皇帝終其在位時間,沒有立妃,只有皇后。...

Read More

錢建榮:中國古代房中術的觀念主要受道教影響

房中術在古代是屬於方伎之一,即方士的技術。東漢時代,<<漢書。藝文志。方伎略>>便為此提出定義;”房中者, 性情之極,致道之制。” 不過,古代人對性愛的概念,比較具體和現實。性愛既要快樂,也能養生和繁衍後代。尋根究源,房中術起源於對生殖器官的崇拜。而女性的性器官有乳房和陰道。古人著重效果,在享受房中之樂,重視陰道為重。<<老子>>稱玄牝是天地之根。玄牝亦是古代女性陰道的稱呼。 <<老子>>是道家的經典,也是道教的重要著作。道教思想對古代中國人的思想影響很大。雖然中國人不是很多人正式入道;可是中國人的思想的深層卻受著道教思想。當然,有些人會提出道教是解決信眾生活難題的宗教,道教自身的宗教性就很多元化。這可能就是中國人的思想的特色,中國人很重視生命,所以養生是中國古代各階段都關注的事情,房中術是人之本能需要,道教指引古人以房中術來達到養生的目的。 道教反對禁慾。<<素女經>>便提出這樣的比喻:天地有開闔,陰陽有變化,人的生命效法陰陽,跟隨四時的變化而運行。男女之神氣不交接,便無法散發出去。東晉名士陶弘景在<<養生延命錄>>便引用古代人瑞,彭祖的說話(相傳彭祖有八百歲),凡男不可無女,女不可無男,若孤獨而思交接,損大壽,生百病。同時,道教提出節慾保精。他們認為精者乃先天之本。生命之源,而男人的精,是孕育生命之本。所以善養生者,必須保其精,精盈則氣盛,氣盛則神全,神全則體健。身強剛病少。性愛是需要的,不過要有節制,不要濫交。 男女交合時,也跟陰陽之道一樣,要在最適合的時機進行交合。<<素女經>>指出女陰男陽,要互相而進行交合。男的陽具感到堅強,而女之陰道則作不常規的蠕動而張開。這樣就能達到二氣交合,交液相通。而其效果就能樂而且強,壽即增延,男女的臉色就如美麗的花木。 其實,中國古代的性學發展,到了東漢已經完整。到了三國時候已經大行其道。唐代日本人丹波康賴於公元928年收錄了唐以前的房中術的著作,便達到20多種。可惜宋代以來,儒家的道德之學盛行。官方史書不再紀錄房中方伎。而士子也害羞於在公開場合言談房中之事。於是中國的性學便走入地下,成為了禁忌。...

Read More

2019年國際大事展望

「時光飛逝,光陰似箭」仲有唔夠半個鐘,2018年要同大家講ByeBye。嗱!嗰啲咩「新一年,新開始」呢類咁老土嘅說話,筆者就唔同大家講啦。其實,各位唔好以為喺2018年發生嘅大事小事會隨住2019年嘅到嚟而匆匆而逝。 反之,筆者相信喺2019年頭兩季,好多國際大事件都係承接2018年發生嘅大事小事。 • 2019年第一季 1.美中貿易戰 2019年3月1號就係美中兩國90日緩衝期嘅最後死線,而喺呢90日談判期間雙方都暫停新增任何貿易保護措施。雖然,近日美國總統當勞侵公開表示談判進程良好,但大家都知呢位狂人總統經常口裡不一。 一切還看下年3月,而筆者深信呢場貿易戰,對香港仍然會造成一定程度嘅影響。 2.英國脫歐 2019年3月29日英國將會正式脫離歐盟。同時,位處伊比利亞半島嘅英國海外屬土嘅直布羅陀亦會同時一齊脫歐。到底西班牙會唔會乘人之危,同全世界講西班牙,一點也不能少呢?而北愛同愛爾蘭嘅499公里嘅邊界又要點處理呢?另外,雙方到底係要互免簽證定係仍然保留自由流動待遇呢? 不過講到底,最關鍵都係到底英國係要「硬脫」定「軟脫」,一切都要睇下出年1月初脫歐議案喺下議院會搞成點。 3.非洲豬瘟 今年中國各地接二連三爆發非洲豬瘟,相信會係各位讀者最為擔心嘅議題。特別係近期廣東唔同鄰近香港嘅地區都接連爆發豬瘟疫情,雖則豬瘟唔會傳人,但中國供港豬肉已經令市民人心惶惶。相比一海之隔嘅臺灣政府,採取極為積極嘅檢疫措施,連嚟自港澳豬肉都列為禁止入境食品。相反,香港政府採取嘅政策極為消極,香港人唯有自求多福。 4.日皇退位 2019年4月30日將會係日本平成年號嘅最後一日,事關日皇明仁將會喺呢一日正式退位,成為光格天皇之後近202年嚟日本首位宣佈退位嘅日本天皇。爾後,皇太子德仁親王將會繼承皇位,咁至於新天皇個年號係咩呢?呢個要到時先知。 而筆者認為2019年對於日本嚟講都係充滿挑戰嘅一年,修憲、天皇交接、2020奧運準備等一系列工作。不過筆者又唔會有咩擔心呢個嚴謹至上嘅國家會喺處理呢啲事件上面有咩難題。 • 2019年第二季 1.歐洲議會選舉 今次英國脫歐將牽連到2019年5月嘅歐洲議會選舉。事關英國脫歐導致今次選舉席次嘅分配發生變化。最終決定咗今次選舉席次由上屆751席減到705席。另外,由於受到近年非法移民、恐怖主義等問題嘅影響。筆者認為今次歐洲議會選舉入面,一堆右翼代表會乘機崛起。 「國際局勢,瞬息萬變」國際大棋局仍然會喺下年同大家見面。而筆者認為2019年身處「後冷戰時期」呢個國際秩序嘅中後期,而喺呢類瓶頸位入面國際局勢絕對係千變萬化。當中,美中貿易戰必然會係香港人最為關注嘅關際議題。所以,香港人都係要保有「食花生」嘅精神,靜待連場好戲。 2018年12月31日香港...

Read More

南亞空污同中國有得Fight

空氣污染係目前全球所有國家都極為頭痛嘅問題,而各國都因為自身利益而一直喺各個相關大型會議上面採用「拖字闕」。喺世界各區域入面,亞洲嘅空氣污染絕對係名列前茅,人口基數、地理環境、工廠排放等都係一系列因素。而一眾讀者必定都知道目前東亞主要源頭係中國華北地區。但係,大家又知唔知其實南亞都係不遑多讓? 今次筆者喺尼泊爾首都加德滿都係完全體會到PM2.5嘅恐怖,本身喺香港已經有幾聲咳,嚟到尼泊爾搞搞下越嚟越大獲。直到有晚意大利朋友將美國駐當地大使館(美國大使館資料係最準確無誤)嘅資料傳畀我,筆者先知道咁大件事……..原來加德滿都平均PM2.5係200以上。 PM2.5其實對人體有極大傷害,由於PM2.5啲粒粒係極為細微,普通口罩個隔網、鼻哥窿啲纖毛同喉嚨啲黏液都過濾唔到。所以佢可以直接入到並癡住人嘅上下呼吸道、肺葉、肺泡入面,甚至入到血管再血液循環到全身,繼而引起鼻炎、支氣管炎呢類呼吸系統病症…. •加德滿都多不勝數嘅空污原因 1.交通排放 加德滿都其中一個造成空氣污染嘅原因就係馬路嘅廢氣同埋沙塵,巴士、的士、私家車同電單車塞滿條街,而且啲車好多都係香港上世紀7-80年代啲款,噴出嚟啲廢氣量極大,籠罩著住成個首都街頭。 2.地理環境 加德滿都嘅盆地地形都會令懸浮微粒子滯留時間拉長。特別係冬天嘅高壓回流,因為東風受到三面環山而形成一般下沉氣流,導致盆地入面嘅污染濃度迅速上升。 3.燒柴 冬天其實係加德滿都空污重災期,由於入夜後溫度會急降到6度以下,但係當地生活條件落後,唔少民眾係冇暖氣嘅情況下,唯有燒柴、紙皮等去圍爐取暖,加埋上面地理環境因素,令當地空氣污染問題雪上加霜。 4.燒屍 印度教傳統係規定人死後24個鐘頭入面一定要火化,而且尼泊爾人會使用露天火葬方式,當中會使用木材等燃料,從而助長空氣污染。而且加德滿都火葬場隔離就係首都機場,兩害相乘無得輕,令當地空氣污染百孔千瘡。 5.工業排放 工業排放係其中一個造成加德滿都盆地係目前世界上空氣最差地方之一。由於市中心有成過百間磚廠冒出來嘅煙霧。筆者喺加德滿都嘅住所附近,發現好多人都會有慢性支氣管炎或者其他形式嘅上呼吸道感染。有一個喺加德滿都住咗半年嘅印度人同我講「我就係知道出面啲空氣咁癡線,所以我基本上除咗出去買咖哩粉,我係足不出戶。」。   其實睇完上一篇文之後有讀者問筆者,尼泊爾究竟係親中定親印?如果你將信仰、歷史、文化語言呢類做對比,你好難將尼印呢兩國分開嚟講太多,不過筆者留意到大部分尼泊爾人其實對印度人一般,因為佢哋覺得成個國家畀印度控制曬,特別係生活物資。而且,筆者問過當地人,佢哋覺得印度嘅空氣污染先係真正搞到成個南亞咁多問題。 但拋開呢啲唔講,至少筆者認為,尼泊爾喺空污處理方法都極為「印度」。事關尼泊爾政府喺首都設立幾個空氣監察站,早喺九年前就對外講話要整,但時至今日仍然一啲消息都冇。唔係美國駐當地大使館有個咁「貼地」嘅數據,筆者可能仲日日吸廢氣。坦白講,筆者3年前喺北平都未見過咁嚴重嘅空氣污染,目測南亞嘅煙霞對比東亞嘅中國煙霞可以話係更加嚴重。筆者終於明白點解身邊啲尼泊爾朋友打死都唔想返去,相信空氣污染係其中一個關鍵原因。 南亞嘅變態煙霞,或者令筆者以後都唔會再踏足呢個全世界其中一個最落後嘅區域。係,筆者已經因為身體原因返咗香港休息,本來計劃嘅4個月行程「凍過水」。而尼泊爾同香港西醫一直查唔到我到底發生咩事,但感激中醫,目前筆者身體慢慢好轉,亦都同屋企人過聖誕同新年………….. ….. 2018年12月28號香港...

Read More

「高山王國」尼泊爾

“Ladies & Gentlemen, We’re approaching Kathmandu where the local time is 13:30. At this stage you should be in your seat with your seatbelt firmly………” 隨住呢段機長廣播,瞓到隻豬咁嘅我終於伸個懶腰再掹大對眼,一打開隔離個窗,映入眼簾嘅係喜馬拉雅山山脈,令筆者知道自己已經置身喺加德滿都盆地之中。 呼!!!!筆者終於嚟到嚮往已久嘅南亞。南亞初嚟報到:「高山王國」-尼泊爾 其實早喺入U早期,筆者就一直計劃嚟個南亞遊。但奈何各種因素令筆者一直都無時間去。 最終,筆者下定決心喺呢2年Gap year畀3個月自己慢慢探索南亞。而且揀12月出發絕對係要避開雨季。 但而家有好多嘢想睇都無得睇,因為尼泊爾喺2015年發生過一次大地震,當時有「山中天堂」之稱嘅首都加德滿都(Kathmandu)係重災區之一。 查實,今次飛尼泊爾可謂一波三折。事關筆者係經泰國曼谷轉機再到尼泊爾加德滿都。如果計飛行時間就已經用咗大約6個半鐘。再加埋喺泰國啲時間,筆者前前後後用咗幾日時間先嚟到尼泊爾。 有人可能會喺度問筆者,點解你要咁傻勁要先喺泰國轉機再飛過嚟尼泊爾。 因為,香港飛尼泊爾得國泰直航,貴都算(單程成$3500-5700),到埗時間成夜晚十點,一delay分分鐘真係喺個機場成個傻仔咁。 而且,筆者對國泰不嬲無好感。 另外,筆者習慣坐飛機都有咁早得咁早。因為唔想再發生一次喺土耳其嘅意外(2016年筆者喺伊斯坦堡坐飛機走嗰日就發生咗恐襲)。 所以,筆者就選擇咗一個比香港直航平7成,而又可以日光日白到埗嘅方案*。順便喺去南亞打大佬之前,留喺泰國叉返幾日電,主要目的係喺泰國買晒所有藥用品(平過香港好多)。 *以下係筆者飛尼泊爾嘅機票 (已計稅並以港紙計算) 澳門-曼谷 $171.3 曼谷-加德滿都 $1256 有人會問筆者點解飛南亞嘅機票咁貴。筆者認為地理係原因之一。因為北面西藏落嚟又多山、南接波濤洶湧嘅印度洋、東接緬甸邊境無咩人敢過、西面係全世界最危險之一嘅阿富汗。 所以,一張跨區嘅直航單程機票往往可以去到超過$2000一張。 但如果你好彩,可以搵到喺廉航度搵到$800-1200左右嘅價位。 因此,筆者推薦各位可以揀喺泰國或者馬來西亞轉機以減低交通成本。 •尼泊爾簡介 國歌  《尼泊爾王國國歌》 國花  杜鵑花 國獸  黃牛 面積  147181平方千米。 人口  1985萬(1992年)。 民族  超過30個 宗教 : 有大約88%信奉印度教,其他信奉佛教同埋伊斯蘭教。 語言 : 尼泊爾話 大部分旅客區通用英文 首都 : 加德滿都 貨幣 : 尼泊爾盧比 尼泊爾,之前叫做尼泊爾王國(Kingdom of Nepal )。佢以前都係英國殖民地。而家嘅正式國名係尼泊爾聯邦民主共和國(Federal Democratic Republic of Nepal)。以往嘅沙阿王朝(Kingdom of Gorkha)統治咗尼泊爾超過二百年。但因為十幾年前經歷一系列政變事件,最終喺2008年畀人推翻。同時令到南亞而家得返不丹仲有國王嘅存在。 時至今日,外界一致認為2001年由親美國印度以及親中國嘅王室成員之間嘅一次鬥爭所引發嘅王室槍擊事件係導致王室喺2008年畀人推翻嘅導火線。 筆者深信香港人一定聽過尼泊爾呢個國家,甚至身邊都可能有啲尼泊爾朋友。但好多人都唔知尼泊爾喺邊。 其實,尼泊爾係一個喺東亞同南亞地緣政治嘅緩衝區,因為佢位於中國同印度之間。而尼泊爾嘅國名喺尼泊爾話入面正正係等於位處中間嘅國家。 -地緣政治 呢度有人會問筆者點解尼泊爾會揀加德滿都作為首都。 呢點除咗歸究於上面提到夾喺中印兩國之間以外,歷史因素以及地理環境都係關鍵因素。 首先,10世紀已經有第一個以尼泊爾人為主嘅政體喺度定都。 其次,加德滿都嘅海拔高(約莫1350米),加上三面環山,有一個良好天然屏障。 另外,呢度同中印邊境距離均等,唔會過份傾斜任何一方。 此外,尼泊爾嘅時區,喺世界時區嚟講都係非常盞鬼。 大家都知時區一般都係整數上或者搭半,例如香港係GMT+8、日本係GMT+9、印度係GMT+5:30等等。 但尼泊爾係全世界上唯一採用GMT+5:45嘅國家,比起印度嘅GMT+5:30,仲要快3個字。而最好笑係一但你經尼泊爾走上西藏,個時間一下子快差唔多3個鐘。 筆者一路諗緊嗰15分鐘到底想點呢?其實呢點有一定程度上嘅政治考慮。 由於,尼泊爾喺國際上畀人認為佢係印度嘅細佬,所以希望盡可能喺唔同層面上同印度作個區分。 •入境經過 飛機係用硬着陸方式降落,而且筆者今之坐喺機轆上面十所以着陸嗰一下筆者個心係離一離。點都好,筆者最終都係安全嚟到尼泊爾。而呢個南亞小國係筆者到埗過嘅第62個國家。 但係筆者一落機,基本上係目瞪口呆。 點解? 首先,加德滿都機場係一個舊式機場,亦都係尼國唯一一個國際機場。佢係冇任何登機橋設施。所以,一離開個機艙係一定要行條樓梯。而同香港機場唔同嘅係,落機之後唔洗坐巴士,而係直接用行路方式穿過一條大路,行入機場客運大樓。(2014年筆者曾經去過緬甸曼德勒,同樣要徒步方式行去入境大堂) 筆者嚟到入境大樓之後都仲未可以即時入境住。事關筆者無事先申請簽證(香港其實可以去領事館申請,但其實無咩分別,仲要等兩日),所以要去搞落地簽證(Visa on arrival) 除咗印度之外,基本上所有國家去尼泊爾都要簽證。 但有啲國家係可以免簽證費,包括中華人民共和國公民(港澳特區護照者都有份)。 首先筆者就急急填好入境表格(Arrival Card),然後就見到隔離有遊客用一部機去填落地簽證機器,於是筆者就螢幕上輸入資料,以香港人嘅速度喺3分鐘以內入晒所有資料。...

Read More

Pin It on Pinterest