0 Items

Category: 國際大棋局 William Luk

2019年國際大事展望

「時光飛逝,光陰似箭」仲有唔夠半個鐘,2018年要同大家講ByeBye。嗱!嗰啲咩「新一年,新開始」呢類咁老土嘅說話,筆者就唔同大家講啦。其實,各位唔好以為喺2018年發生嘅大事小事會隨住2019年嘅到嚟而匆匆而逝。 反之,筆者相信喺2019年頭兩季,好多國際大事件都係承接2018年發生嘅大事小事。 • 2019年第一季 1.美中貿易戰 2019年3月1號就係美中兩國90日緩衝期嘅最後死線,而喺呢90日談判期間雙方都暫停新增任何貿易保護措施。雖然,近日美國總統當勞侵公開表示談判進程良好,但大家都知呢位狂人總統經常口裡不一。 一切還看下年3月,而筆者深信呢場貿易戰,對香港仍然會造成一定程度嘅影響。 2.英國脫歐 2019年3月29日英國將會正式脫離歐盟。同時,位處伊比利亞半島嘅英國海外屬土嘅直布羅陀亦會同時一齊脫歐。到底西班牙會唔會乘人之危,同全世界講西班牙,一點也不能少呢?而北愛同愛爾蘭嘅499公里嘅邊界又要點處理呢?另外,雙方到底係要互免簽證定係仍然保留自由流動待遇呢? 不過講到底,最關鍵都係到底英國係要「硬脫」定「軟脫」,一切都要睇下出年1月初脫歐議案喺下議院會搞成點。 3.非洲豬瘟 今年中國各地接二連三爆發非洲豬瘟,相信會係各位讀者最為擔心嘅議題。特別係近期廣東唔同鄰近香港嘅地區都接連爆發豬瘟疫情,雖則豬瘟唔會傳人,但中國供港豬肉已經令市民人心惶惶。相比一海之隔嘅臺灣政府,採取極為積極嘅檢疫措施,連嚟自港澳豬肉都列為禁止入境食品。相反,香港政府採取嘅政策極為消極,香港人唯有自求多福。 4.日皇退位 2019年4月30日將會係日本平成年號嘅最後一日,事關日皇明仁將會喺呢一日正式退位,成為光格天皇之後近202年嚟日本首位宣佈退位嘅日本天皇。爾後,皇太子德仁親王將會繼承皇位,咁至於新天皇個年號係咩呢?呢個要到時先知。 而筆者認為2019年對於日本嚟講都係充滿挑戰嘅一年,修憲、天皇交接、2020奧運準備等一系列工作。不過筆者又唔會有咩擔心呢個嚴謹至上嘅國家會喺處理呢啲事件上面有咩難題。 • 2019年第二季 1.歐洲議會選舉 今次英國脫歐將牽連到2019年5月嘅歐洲議會選舉。事關英國脫歐導致今次選舉席次嘅分配發生變化。最終決定咗今次選舉席次由上屆751席減到705席。另外,由於受到近年非法移民、恐怖主義等問題嘅影響。筆者認為今次歐洲議會選舉入面,一堆右翼代表會乘機崛起。 「國際局勢,瞬息萬變」國際大棋局仍然會喺下年同大家見面。而筆者認為2019年身處「後冷戰時期」呢個國際秩序嘅中後期,而喺呢類瓶頸位入面國際局勢絕對係千變萬化。當中,美中貿易戰必然會係香港人最為關注嘅關際議題。所以,香港人都係要保有「食花生」嘅精神,靜待連場好戲。 2018年12月31日香港...

Read More

南亞空污同中國有得Fight

空氣污染係目前全球所有國家都極為頭痛嘅問題,而各國都因為自身利益而一直喺各個相關大型會議上面採用「拖字闕」。喺世界各區域入面,亞洲嘅空氣污染絕對係名列前茅,人口基數、地理環境、工廠排放等都係一系列因素。而一眾讀者必定都知道目前東亞主要源頭係中國華北地區。但係,大家又知唔知其實南亞都係不遑多讓? 今次筆者喺尼泊爾首都加德滿都係完全體會到PM2.5嘅恐怖,本身喺香港已經有幾聲咳,嚟到尼泊爾搞搞下越嚟越大獲。直到有晚意大利朋友將美國駐當地大使館(美國大使館資料係最準確無誤)嘅資料傳畀我,筆者先知道咁大件事……..原來加德滿都平均PM2.5係200以上。 PM2.5其實對人體有極大傷害,由於PM2.5啲粒粒係極為細微,普通口罩個隔網、鼻哥窿啲纖毛同喉嚨啲黏液都過濾唔到。所以佢可以直接入到並癡住人嘅上下呼吸道、肺葉、肺泡入面,甚至入到血管再血液循環到全身,繼而引起鼻炎、支氣管炎呢類呼吸系統病症…. •加德滿都多不勝數嘅空污原因 1.交通排放 加德滿都其中一個造成空氣污染嘅原因就係馬路嘅廢氣同埋沙塵,巴士、的士、私家車同電單車塞滿條街,而且啲車好多都係香港上世紀7-80年代啲款,噴出嚟啲廢氣量極大,籠罩著住成個首都街頭。 2.地理環境 加德滿都嘅盆地地形都會令懸浮微粒子滯留時間拉長。特別係冬天嘅高壓回流,因為東風受到三面環山而形成一般下沉氣流,導致盆地入面嘅污染濃度迅速上升。 3.燒柴 冬天其實係加德滿都空污重災期,由於入夜後溫度會急降到6度以下,但係當地生活條件落後,唔少民眾係冇暖氣嘅情況下,唯有燒柴、紙皮等去圍爐取暖,加埋上面地理環境因素,令當地空氣污染問題雪上加霜。 4.燒屍 印度教傳統係規定人死後24個鐘頭入面一定要火化,而且尼泊爾人會使用露天火葬方式,當中會使用木材等燃料,從而助長空氣污染。而且加德滿都火葬場隔離就係首都機場,兩害相乘無得輕,令當地空氣污染百孔千瘡。 5.工業排放 工業排放係其中一個造成加德滿都盆地係目前世界上空氣最差地方之一。由於市中心有成過百間磚廠冒出來嘅煙霧。筆者喺加德滿都嘅住所附近,發現好多人都會有慢性支氣管炎或者其他形式嘅上呼吸道感染。有一個喺加德滿都住咗半年嘅印度人同我講「我就係知道出面啲空氣咁癡線,所以我基本上除咗出去買咖哩粉,我係足不出戶。」。   其實睇完上一篇文之後有讀者問筆者,尼泊爾究竟係親中定親印?如果你將信仰、歷史、文化語言呢類做對比,你好難將尼印呢兩國分開嚟講太多,不過筆者留意到大部分尼泊爾人其實對印度人一般,因為佢哋覺得成個國家畀印度控制曬,特別係生活物資。而且,筆者問過當地人,佢哋覺得印度嘅空氣污染先係真正搞到成個南亞咁多問題。 但拋開呢啲唔講,至少筆者認為,尼泊爾喺空污處理方法都極為「印度」。事關尼泊爾政府喺首都設立幾個空氣監察站,早喺九年前就對外講話要整,但時至今日仍然一啲消息都冇。唔係美國駐當地大使館有個咁「貼地」嘅數據,筆者可能仲日日吸廢氣。坦白講,筆者3年前喺北平都未見過咁嚴重嘅空氣污染,目測南亞嘅煙霞對比東亞嘅中國煙霞可以話係更加嚴重。筆者終於明白點解身邊啲尼泊爾朋友打死都唔想返去,相信空氣污染係其中一個關鍵原因。 南亞嘅變態煙霞,或者令筆者以後都唔會再踏足呢個全世界其中一個最落後嘅區域。係,筆者已經因為身體原因返咗香港休息,本來計劃嘅4個月行程「凍過水」。而尼泊爾同香港西醫一直查唔到我到底發生咩事,但感激中醫,目前筆者身體慢慢好轉,亦都同屋企人過聖誕同新年………….. ….. 2018年12月28號香港...

Read More

「高山王國」尼泊爾

“Ladies & Gentlemen, We’re approaching Kathmandu where the local time is 13:30. At this stage you should be in your seat with your seatbelt firmly………” 隨住呢段機長廣播,瞓到隻豬咁嘅我終於伸個懶腰再掹大對眼,一打開隔離個窗,映入眼簾嘅係喜馬拉雅山山脈,令筆者知道自己已經置身喺加德滿都盆地之中。 呼!!!!筆者終於嚟到嚮往已久嘅南亞。南亞初嚟報到:「高山王國」-尼泊爾 其實早喺入U早期,筆者就一直計劃嚟個南亞遊。但奈何各種因素令筆者一直都無時間去。 最終,筆者下定決心喺呢2年Gap year畀3個月自己慢慢探索南亞。而且揀12月出發絕對係要避開雨季。 但而家有好多嘢想睇都無得睇,因為尼泊爾喺2015年發生過一次大地震,當時有「山中天堂」之稱嘅首都加德滿都(Kathmandu)係重災區之一。 查實,今次飛尼泊爾可謂一波三折。事關筆者係經泰國曼谷轉機再到尼泊爾加德滿都。如果計飛行時間就已經用咗大約6個半鐘。再加埋喺泰國啲時間,筆者前前後後用咗幾日時間先嚟到尼泊爾。 有人可能會喺度問筆者,點解你要咁傻勁要先喺泰國轉機再飛過嚟尼泊爾。 因為,香港飛尼泊爾得國泰直航,貴都算(單程成$3500-5700),到埗時間成夜晚十點,一delay分分鐘真係喺個機場成個傻仔咁。 而且,筆者對國泰不嬲無好感。 另外,筆者習慣坐飛機都有咁早得咁早。因為唔想再發生一次喺土耳其嘅意外(2016年筆者喺伊斯坦堡坐飛機走嗰日就發生咗恐襲)。 所以,筆者就選擇咗一個比香港直航平7成,而又可以日光日白到埗嘅方案*。順便喺去南亞打大佬之前,留喺泰國叉返幾日電,主要目的係喺泰國買晒所有藥用品(平過香港好多)。 *以下係筆者飛尼泊爾嘅機票 (已計稅並以港紙計算) 澳門-曼谷 $171.3 曼谷-加德滿都 $1256 有人會問筆者點解飛南亞嘅機票咁貴。筆者認為地理係原因之一。因為北面西藏落嚟又多山、南接波濤洶湧嘅印度洋、東接緬甸邊境無咩人敢過、西面係全世界最危險之一嘅阿富汗。 所以,一張跨區嘅直航單程機票往往可以去到超過$2000一張。 但如果你好彩,可以搵到喺廉航度搵到$800-1200左右嘅價位。 因此,筆者推薦各位可以揀喺泰國或者馬來西亞轉機以減低交通成本。 •尼泊爾簡介 國歌  《尼泊爾王國國歌》 國花  杜鵑花 國獸  黃牛 面積  147181平方千米。 人口  1985萬(1992年)。 民族  超過30個 宗教 : 有大約88%信奉印度教,其他信奉佛教同埋伊斯蘭教。 語言 : 尼泊爾話 大部分旅客區通用英文 首都 : 加德滿都 貨幣 : 尼泊爾盧比 尼泊爾,之前叫做尼泊爾王國(Kingdom of Nepal )。佢以前都係英國殖民地。而家嘅正式國名係尼泊爾聯邦民主共和國(Federal Democratic Republic of Nepal)。以往嘅沙阿王朝(Kingdom of Gorkha)統治咗尼泊爾超過二百年。但因為十幾年前經歷一系列政變事件,最終喺2008年畀人推翻。同時令到南亞而家得返不丹仲有國王嘅存在。 時至今日,外界一致認為2001年由親美國印度以及親中國嘅王室成員之間嘅一次鬥爭所引發嘅王室槍擊事件係導致王室喺2008年畀人推翻嘅導火線。 筆者深信香港人一定聽過尼泊爾呢個國家,甚至身邊都可能有啲尼泊爾朋友。但好多人都唔知尼泊爾喺邊。 其實,尼泊爾係一個喺東亞同南亞地緣政治嘅緩衝區,因為佢位於中國同印度之間。而尼泊爾嘅國名喺尼泊爾話入面正正係等於位處中間嘅國家。 -地緣政治 呢度有人會問筆者點解尼泊爾會揀加德滿都作為首都。 呢點除咗歸究於上面提到夾喺中印兩國之間以外,歷史因素以及地理環境都係關鍵因素。 首先,10世紀已經有第一個以尼泊爾人為主嘅政體喺度定都。 其次,加德滿都嘅海拔高(約莫1350米),加上三面環山,有一個良好天然屏障。 另外,呢度同中印邊境距離均等,唔會過份傾斜任何一方。 此外,尼泊爾嘅時區,喺世界時區嚟講都係非常盞鬼。 大家都知時區一般都係整數上或者搭半,例如香港係GMT+8、日本係GMT+9、印度係GMT+5:30等等。 但尼泊爾係全世界上唯一採用GMT+5:45嘅國家,比起印度嘅GMT+5:30,仲要快3個字。而最好笑係一但你經尼泊爾走上西藏,個時間一下子快差唔多3個鐘。 筆者一路諗緊嗰15分鐘到底想點呢?其實呢點有一定程度上嘅政治考慮。 由於,尼泊爾喺國際上畀人認為佢係印度嘅細佬,所以希望盡可能喺唔同層面上同印度作個區分。 •入境經過 飛機係用硬着陸方式降落,而且筆者今之坐喺機轆上面十所以着陸嗰一下筆者個心係離一離。點都好,筆者最終都係安全嚟到尼泊爾。而呢個南亞小國係筆者到埗過嘅第62個國家。 但係筆者一落機,基本上係目瞪口呆。 點解? 首先,加德滿都機場係一個舊式機場,亦都係尼國唯一一個國際機場。佢係冇任何登機橋設施。所以,一離開個機艙係一定要行條樓梯。而同香港機場唔同嘅係,落機之後唔洗坐巴士,而係直接用行路方式穿過一條大路,行入機場客運大樓。(2014年筆者曾經去過緬甸曼德勒,同樣要徒步方式行去入境大堂) 筆者嚟到入境大樓之後都仲未可以即時入境住。事關筆者無事先申請簽證(香港其實可以去領事館申請,但其實無咩分別,仲要等兩日),所以要去搞落地簽證(Visa on arrival) 除咗印度之外,基本上所有國家去尼泊爾都要簽證。 但有啲國家係可以免簽證費,包括中華人民共和國公民(港澳特區護照者都有份)。 首先筆者就急急填好入境表格(Arrival Card),然後就見到隔離有遊客用一部機去填落地簽證機器,於是筆者就螢幕上輸入資料,以香港人嘅速度喺3分鐘以內入晒所有資料。...

Read More

ТУРНИРЫ ТЕНЕЙ 4:俄羅斯嘅遠東大博弈(下)

文/William Luk & 環球9up快線 上回我哋同大家講到俄羅斯由十五、十六世紀至第二次世界大戰期間喺遠東嘅博弈過程,呢次我哋進入冷戰至今嘅博弈階段,睇睇俄羅斯喺呢個階段嘅遠東博弈係點樣運作、同遠東重要國家嘅互動情況如何。 • 俄羅斯需要考慮啲咩因素?有咩對策? 第二次世界大戰徹底改變遠東格局:西歐殖民勢力退出造就咗一批新嘅博弈者(例如印度、越南、印尼)出現、日本亦由日俄戰爭以嚟喺遠東近乎獨當一面變成美國保護國、美國勢力進入朝鮮半島以及中華人民共和國(「新中國」)成立,呢一切都係莫斯科喺呢一輪博弈中需要考慮嘅因素;而「新中國」嘅出現及發展壯大亦令其成為俄羅斯喺遠東最大威脅及競爭對手。 「新中國」對俄羅斯嘅威脅:「新中國」嘅成立係蘇共扶植中共嘅客觀結果,兩國意識形態相近、新中國喺經濟同科技領域亦依賴蘇聯,理論上應該較為友好,實際上就面和心不和:兩國共產黨有革命路線同意識形態分歧、兩國對國際情勢有認知落差、兩國喺1960年代嘅領土衝突及後來蘇軍南下阿富汗都暴露咗兩國嘅競爭同矛盾;近年俄中關係嘅表面友好仍難掩呢種面和心不和嘅事實。 革命路線分歧:沙俄喺克里米亞戰爭之後發展本土工業,到十月革命時已經有足夠工人發動合乎馬克思理論嘅工人革命;但中國到二戰結束時仍然係農業國家,中共要成功就要靠農民革命;蘇共認為呢種經農民革命路線對亞洲人民係十分危險嘅示範,但中共就自high 係反帝解殖嘅經典傳奇。 意識形態分歧:1960年代,兩國共產黨對個人崇拜、人民公社、阿爾巴尼亞路線問題甚至臺海問題、核戰等發生激烈爭論;蘇聯指責中共係偽馬克思主義者、出賣國際工人運動,中共就指責蘇聯向南斯拉夫修正主義及美帝妥協係「從機會主義蛻變為投降主義」;咁最近美國列根號訪港又係咪等同中共向帝國主義投降? 對核戰嘅分歧:蘇共認為核戰會滅絕人類、令共產主義雖勝猶敗,只有同西方和平共處、以社會主義制度嘅優越性喺經濟競賽中戰勝資本主義;中共認為核戰唔會滅絕人類但會滅絕帝國主義,周恩來認為核戰會消滅「三億中國人」但世界仍會「剩下兩千萬美國人、五百萬英國人、五千萬俄國人和三億中國人」 。 勢力範圍之爭:如果兩國之間為咗現實利益合作,咁革命路線或意識形態其實who cares?但「勢傾則絕、利窮則散」,意識形態相同亦難阻兩國為現實利益反面收場: 阿富汗/中亞:蘇聯繼承沙俄南下印度洋戰略而發動對阿富汗嘅戰爭,而中共就同美國、巴基斯坦支持阿富汗嘅伊斯蘭抵抗運動;2013年9月習近平提出「一帶一路」,妄圖征服全世界、奴役全人類,作為俄羅斯後院嘅中亞、高加索更首當其衝;俄羅斯近幾年飽受西方經濟制裁之苦,難以抵擋中國銀彈攻勢,但近期積極重振獨聯體、聯同中亞國家、蒙古甚至日本軍演,就係出於抵制中國侵略野心。 亞洲、非洲:二戰後西方殖民勢力退出亞非兩洲,部份新獨立國家加入共產陣營,並隨著蘇中交惡而跟唔同「大佬」;通常蘇聯立場較審慎但中國就立場極端、會支持一啲好似赤柬咁嘅恐怖政權:赤柬喺1975至1979年間嘅大屠殺估計造成150萬至300萬人死亡,間接都係中共欠高綿人民嘅一筆血債;後來越南喺蘇聯支持下打敗赤柬、結束大屠殺。 目前俄越兩國仍然十分友好,近日俄羅斯總理梅德偉傑夫訪問越南,兩國繼續進行南海能源開發、基建及軍事合作,並強調根據國際法及1982年聯合國海洋公約解決南海爭爭議、保持南海航道暢通並儘快通過南海及東海行為準則;呢一系列表態都利好東南亞各國但不利中國。 近期俄羅斯積極聯繫北非國家(埃及、利比亞),並且喺蘇丹嘅核能項目同中國展開競爭,而安哥拉亦一直捧場買入俄製武器;但香港主流媒體既忽視非洲嘅重要性,亦力圖配合中國戰略需要、避免引起香港大眾對俄中關係持負面睇法,自然要低調處理相關消息。 領土衝突:1969年3月開始蘇中兩國先後喺烏蘇里江(Уссу́ри)嘅達曼斯基島(Дама́нский/珍寶島)、八岔島及中亞邊界發生軍事衝突;戈巴楚夫(Горбачёв )上臺後兩國關係緩和並重啟邊界談判,1991年蘇聯解體,其繼承國家:俄羅斯同部份中亞國家繼續同中國談判,2001年7月16日及2004年10月14日,俄中兩國先後簽署睦鄰友好合作條約及國界東段補充協定解決兩國全部邊界問題,但兩國民間都有人斥之為「賣國」「喪權辱國」;上個月殷敏鴻向中國外交部申請公開關於俄羅斯聯邦嘅圖瓦共和國(Респу́блика Тыва́/唐努烏梁海)歸屬問題文件體現中國民間強烈嘅「大中華沙文主義」、妄圖貪取同中國邊界唔再連接嘅俄羅斯領土,「大中華沙文主義」對中國嘅所有鄰國及世界和平構成嚴重威脅。 中共多年嚟一直意淫臺灣,韓戰爆發之前中共都有意一口氣侵奪臺澎金馬,但韓戰爆發令中共至今都只能意淫臺灣而未能侵吞臺灣;關於當年中共以抗美援朝志願軍名義參戰一事,亦有若干唔同講法流傳:一方面美軍名將麥克亞瑟想趁機一口氣攻入埋中國推翻中共政權,所以中共必須落水擋著美軍;另一傳言就係蘇聯希望中共將資源用於朝鮮半島而唔希望中共將資源用喺侵吞臺澎金馬;時至今日,俄臺關係其實亦未如一般香港人以為咁冷淡,今年9月臺灣開始試行比俄羅斯公民十四日來臺免簽證,而莫斯科嘅普希金最近首次喺臺北攪畫展,俄臺雙方將加強旅遊合作甚至下年有可能開通直飛包機航班;今日俄臺關係走近其實同上世紀蘇聯通過第三國際支持臺獨喺地緣戰略上可謂係一脈相承。 俄日關係、南千島群島、俄日韓之間嘅今後:二戰之後,圍繞俄日之間關係主要有兩大主題,一係南千島群島歸屬問題,一係近幾年經濟貿易合作;前者令到俄日兩國政治關係比較冷淡,但俄羅斯嘅能源同日本嘅技術、資金及兩國共同對中國擴張嘅憂慮又一次又一次咁拉近兩國嘅關係。 南千島群島、俄羅斯喺東海問題嘅立場:上個月月中,日本首相安倍晉三再次推動以1956年10月19日於莫斯科簽署及共同發佈嘅外交文書《蘇維埃社會主義共和國聯邦與日本國共同宣言(Совместная декларация Союза Советских Социалистических Республик и Японии/日本國とソヴィエト社會主義共和國連邦との共同宣言)》為基礎簽訂俄日二戰和約,重點係以蘇聯向日本移交哈博邁(Хабомаи/齒舞)群島及士閣灘(Шикота́н/色丹)島為前提簽訂正式和約。 大半個世紀以嚟,俄日雙方都就領土問題各自表述,你有你拎一大堆條約嚟引證、我有我繼續打法律觀點。。。但呢種打官司式論述都唔係問題嘅本質,問題嘅本質涉及俄方對南千島群島嘅實質控制、兩國民族尊嚴及軍事戰略考慮。 雖然安倍首相強調領回哈博邁群島及士閣灘島後唔會比美軍部署當地,但將來嘅事邊個知?再者,日本雖然想以兩地移交為前提發展正式和約,但又係咪等於日方放棄領回南千島群島其餘部份?南千島群島其餘部份嘅義篤島(Итуру́п/択捉島)同古勒舒涅島(Кунаши́р/國後島)涉及俄方對鄂賀次克海(Охо́тское мо́ре)嘅掌控,如果日方唔明言放棄對義篤島同古勒舒涅島嘅領土主張再加上一個懷有敵意嘅《美日安保條約》,咁俄方交出哈博邁群島及士閣灘島咪搵自己笨?至於領土問題又涉及兩國強烈民族主義立場,邊個讓(錯)步都好都係政治自殺。 其實俄方喺南千嘅長期軍事存在加上已經有一定數量俄人定居等事實,即使連中國都認同南千係日本領土,但美中兩國只係利用領土爭議做外交抽水,唔可能落水為俄日領土問題而同俄羅斯開大拖;日本自身實力所限,其實真正可以做嘅唔多,假如俄方連哈博邁群島及士閣灘島治權都無得傾,咁日本都無可奈何。 相比呢啲領土問題,俄方喺日中之間嘅東海問題上就似乎比較偏向日本立場;上文提及俄羅斯同越南就南海甚至東海問題嘅共同表態針對中國,而早喺2016 年六月發生三艘俄羅斯軍艦同一艘中國軍艦同時現身尖閣諸島鄰近嘅國際水域,日方向中國強烈抗議但對俄方就表現客氣,俄方亦強調涉事水域係國際水域、擺出置身事外態度,證實咗俄日兩國方喺日中嘅東海問題嘅默契:俄羅斯無論點都唔會撐中國同日本作對、而日本亦報以善意回應。 經貿合作、朝鮮問題:俄日之間冷淡嘅政治關係無可避免會成為兩國經貿文化交往嘅剎車掣,但俄屬遠東(除咗符拉捷窩斯托克)各樣發展嘅落後(特別係人口下降)同2014 年以嚟西方對俄經濟制裁令俄羅斯政府(特別係地方政府)更加急於吸納外國資金發展俄屬遠東。 俄中兩國政治關係表面上嘅高度發展自然便利中國資金進入俄羅斯各地及各種產業領域,但莫斯科明白唔可以一味依賴中國資金,所以亦積極吸納日韓資金投資俄屬遠東;相比之下南韓比日本積極,俄韓之間無領土問題,而且喺北韓核問題上南韓同俄羅斯互動良好,俄羅斯可以發揮其對北韓嘅影響力為雙方穿針引線,而日本同北韓之間好難做倒呢一點。 俄朝之間有一小段唔存在領土嘅邊界,隨著朝核問題緩和、北韓領袖金正恩開始想發展經濟,呢一小段邊界嘅各樣交通物流項目成為俄羅斯及南北韓三方共同開發嘅大機遇,由維堡(Вы́борг)到釜山廣域市(부산광역시)嘅交通物流前景可能唔再係天方夜談;當然呢個前景唔係日本同中國樂見,更加唔係俄羅斯嘅歐亞經濟計劃所追求嘅極致。 今年七月俄羅斯總統寶禎下令修築連接薩哈林島同俄羅斯本土嘅跨海大橋;此前俄方甚至想起一條連接薩哈林島同北海道嘅跨海大橋,概念雖然瘋狂,但其實號稱「日本最北」嘅稚內市(わっかないし),其港口稚內港(わっかないこう)有渡輪航線前往薩哈林島嘅葛涅沙葛夫(Корса́ков);而由稚內市嘅宗谷岬(そうやみさき)「日本最北端之地」紀念碑(日本最北端の地の碑)北望可以睇倒薩哈林島,當然前提係要天氣好啦,如果咁計,其實連接薩哈林島同北海道嘅跨海大橋係技術上可行嘅項目。 俄印關係與南洋:俄印關係性質類似俄越關係,都係出於防範中國而走近,而且俄印或俄越關係同俄日關係唔同:日本因為《美日安保條約》而不得不迎合美國,但印度同越南就無同美國簽訂呢類條約、外交上自由得多,並且隨著美中關係由Chinamerica 嘅利益共同體變成今日「新冷戰」,兩國喺成個遠東博弈中變得奇貨可居,成為俄羅斯同西方(包括日本同澳洲)競相爭取嘅對象。 印度同南洋多國對中國主要顧慮係領土/領海爭議,其中印度同越南曾經同中國交戰所以好重視發展軍事力量,而俄製武器嘅價格同品質俱佳,正如迎合印度或越南呢啲發展中國家嘅軍事需要及財政預算,而俄羅斯亦通過同各國軍火交易賺取可觀外匯收入;杜特提喺菲律賓執政後疏遠美國而走近俄羅斯同中國,菲律賓亦成為俄製武器新嘅銷售對象。 相比之下,俄越關係比起俄印關係較少「雜質」;首先如上文所講,俄越之間有開發南海能源合作項目,兩國都頂著咗來自中國嘅壓力而貫徹有關項目,俄羅斯甚至聯同越南就南海問題表態;其次,越南只係地區重要國家而未致於係一個大國,加上佢同俄羅斯地理上相距極遠,所以兩國絕無勢力範圍之爭。 但印度唔同,首先印度極重視其印度洋後院安全,中國勢力嘅滲入已經引起印度極大不安,印度出於制衡中國嘅需要,同時要爭取俄羅斯同西方合作,印度需要小心翼翼,既要買俄製武器(例如S400 系統)又要同美軍演習,今年9月同美軍演習嘅地點更係精心挑選:選擇離印中邊界大約100公里嘅喜馬拉雅山山腳而唔係接近巴基斯坦、阿富汗嘅北部山區,呢個地點嘅選擇一方面明示印度對中國嘅防範,另一方面巴基斯坦由伊姆蘭·汗領導嘅新政府既表達對東土耳其斯坦穆斯林待遇嘅關注、亦表示想改善同印度嘅關係,新德里自然都有來有往、回應伊斯蘭堡嘅善意而選擇遠離印巴邊界嘅另一地點進行同美軍聯合演習,同時亦係間接向莫斯科傳達新德里對北上中亞發展影響力嘅消極立場以釋除莫斯科疑慮。 事實上印度作為亞洲一個大國,話印度對北上中亞發展影響力無興趣又真係講出嚟都無人信,莫斯科對印度呢份可能存在嘅意圖都唔係完全無疑慮,呢份疑慮喺九一一反恐戰爭開始時的確甚囂塵上,只係由於2013 年中國提出「一帶一路」之後,中國積極搶奪俄羅斯嘅中亞後院愈加過份,俄印嘅針對焦點又落返中國身上,呢個又可以話係中國自己外交失誤,為自己製造愈來愈多敵人;而我哋香港人呢就但求兩餐溫飽,無謂同中國人一樣得罪人多啦。 今次我哋呢篇文就討論咗俄羅斯喺冷戰以嚟至今嘅遠東博弈,亦描述俄羅斯同遠東一啲重要國家嘅互動,例如越南、南韓、臺灣等等;其實關於俄羅斯嘅世界博弈,仲有北極問題可以探討,但筆者知識所限就唔再獻醜人前喇。當我哋愈益了解俄羅斯喺呢個世紀嘅博弈運作之後,到底應該以對中國嘅憎惡嚟憎惡俄羅斯?定係用另一種眼光嚟睇呢個以勇武堅毅聞名嘅戰鬥民族之國,就留待各位讀者思考判斷。 感謝各位讀者收睇呢個ТУРНИРЫ ТЕНЕЙ(影子競賽)系列以及癲狗日報刊登呢個ТУРНИРЫ ТЕНЕЙ 系列嘅文章。...

Read More

阿聯酋成全球最好用護照?笑大人個口咩?

文/William Luk 喺全球化浪潮底下,各國簽證政策日新月異。而最令筆者驚訝嘅係,中東國家阿聯酋擊敗嚿年排第一嘅星加坡成為2018年全球最好用護照嘅國家。 對於好多香港人嚟講,今次阿聯酋可以躋身成為最好用護照排名首位係絕對難以接受。事關喺嚿年,呢本以老鷹作為封面嘅藍色嘅阿拉伯護照甚至入唔到前10名。 今次阿聯酋做一哥嘅原因係在於呢2年嘅免簽證同落地簽證國家分別由93個大幅增加到113個以及由44個增加到54個,從而導致兩者加埋嘅總數壓過排第2嘅德國同星加坡。 而引發今次笑料嘅係加拿大嘅全球旅遊諮詢公司Arton Capital。但筆者一直認為成個統計方法係好有問題。 首先,Arton Capital只係將簽證類別分為免簽證、落地簽同埋預先簽證三種,只要你免簽同落地簽加埋夠多,你就係大贏家。今次阿聯酋嘅免簽證國家只係得113個,比第2位嘅德國同星加坡少13-14個。 然而,喺落地簽方面,阿聯酋係有54個國家,足足比上面兩個國家多13-14個。但其實落地簽證都係需要簽證入境,只係畀你喺機場或者海陸路邊境抵步之後再申請簽證,慳返去領事館申請嘅時間。 第三,簽證含金量。筆者認為免簽都要睇下係咩國家,阿聯酋公民至今去英美澳等國家都係仍然要申請簽證。相反,德國同星加坡公民去上述國家係享有自由流動或者免簽證待遇,高下立見。而且,阿聯酋好多免簽國都係一啲無咩人去嘅國家,例如乍得同布基納法索。因此,邊本護照好用啲,相信各位讀者心裡有數。 基本上排頭10嘅國家,除咗波蘭、阿聯酋、塞浦路斯、馬來西亞、保加利亞、克羅地亞同埋羅馬利亞,都享有去美國免簽或者ESTA待遇。 以下係2018年最好用護照排名(以被國際承認國家為準): 1.阿聯酋 2.德國以及星加坡 3.丹麥、瑞典、芬蘭、盧森堡、法國、意大利、荷蘭、西班牙、挪威、美國以及大韓民國 4.日本、希臘、瑞士、比利時、奧地利、葡萄牙、愛爾蘭、加拿大以及英國公民 5.捷克以及匈牙利 6.冰島、紐西蘭、馬耳他 7.澳洲、波蘭,馬來西亞、斯洛文尼亞、立陶宛、斯洛伐克以及拉脫維亞 8.愛沙尼亞 9.羅馬尼亞以及保加利亞 10.塞浦路斯以及列支敦士登 …….. …….. 12.巴西、智利、阿根廷、英國國民(海外) (113國免簽、42國落地簽、43國需簽證) 13.香港(特區護照) (115國免簽、35國落地簽、48國需簽證) ……. ……. ……. 28.中華民國(臺灣) (86國免簽、45國落地簽、67國需簽證) 29.澳門(特區護照) (91國免簽、38國落地簽、69國需簽證) ……. ……. ……. ……. 58.中華人民共和國(28國免簽、47國落地簽、123國需簽證) 最後,筆者認為目前阿聯酋有部分嚟自第三世界嘅人歸化做阿聯酋公民,甚至有一小部分人因為極端種教主義而被列入恐怖分子嫌疑名單。而且就算你有免簽,我都可以用各種原因拒絕你入境。 早喺幾年前,臺灣就以護照持有人被列入恐怖分子嫌疑名單為由,拒絕一個阿聯酋公民以電子簽證入境,甚至出動一堆荷槍實彈嘅警員由高雄機場押送佢到桃園機場離境。 所以,阿聯酋今次排喺第一位,相信有某啲國家都會極為擔心。而英美澳呢類國家基於宗教等問題點都唔會畀你免簽證入境。而阿聯酋外交部今次咁高調認叻,亦都突顯出阿拉伯人嗰種嘥命心態。最後,筆者深信喺當前嘅國際大棋局入面,一個國家如果國民質素好,國家信譽高,免簽自然到。 (文章純屬筆者意見,唔代表癲狗日報立場。) 全民俾LIKE 人人「些牙」! ...

Read More

Pin It on Pinterest