0 Items

Category: 國際大棋局 William Luk

國際區域組織-獨聯體

文/William Luk 隨住全球化日增月益,國與國之間喺經濟等層面上互相依賴令到國際區域組織日益增多,當中最為香港人熟悉嘅非歐盟莫屬。但其實除咗歐盟之外,目前嘅國際秩序入面仲有好多唔同嘅國際區域組織。例如中東嘅海灣聯盟(Gulf Cooperation Council)、東南亞嘅東盟(ASEAN)以及南亞嘅南亞區域合作聯盟(South Asian Association for Regional Cooperation)。 而唔同嘅國際區域組織內部都有好多互惠甚至統一關稅協議。以歐盟為例,利用統一貨幣同成員國公民之間自由流動等方法務求令到成員國之間可以有更加穩定嘅關係。另外,以中東為例,6個海灣合作委員會成員國(巴林、阿曼、卡塔、科威特、阿聯酋以及沙地阿拉伯)之間喺上年卡塔外交危機發生前,都係存在住類似歐盟嘅情況,人員互相來往。 然而,筆者今年4月去卡塔好好彩。事關2017年卡塔外交危機發生之前,因為好多海灣成員國公民都經多哈機場入境卡塔,所以喺多哈機場入境係要等成個鐘以上係見怪不怪嘅事。正正因為外交危機發生,令到筆者可以2分鐘就入境卡塔。而近期嘅非洲聯盟都一直倡議緊成員國之間相互免簽協議,務求透過人員來往加強非洲內部經濟增長。 不過筆者深信阻力會比歐盟大好多。因為非洲內部嘅貧富、宗教、文化差異甚至部落衝突都絕對會成為阻力。「任何嘢都無完美可言」,歐盟嘅自由流動雖然某程度上令歐洲格局發生一定嘅改變。但係呢個國際區域組織同時都令到歐洲飽受諸多問題困擾。筆者喺呢度唔想講太多呀媽係女人嘅嘢,今次主要同大家講下獨聯體,呢個筆者覺得幾近名存實亡嘅國際區域組織,但有邊個會諗到,一個跨國界嘅大湖,可能會令到佢起死回生。 •獨聯體係咪名存實亡? 獨聯體(俄文:СНГ) 全名係獨立國家聯合體(俄文:Содружество Независимых Государств),係一個類似英聯邦嘅國家聯盟。其實係由一班前蘇聯加盟國所組成。而所有嘅前蘇聯加盟共和國入面,只有波羅的海三國嘅立陶宛、拉脫維亞以及愛沙尼亞由始至終都拒絕加入呢個組織。因為波羅的海三國出於政治同歷史考慮,寧願加入歐盟同北約成為歐洲最前線,都唔想成為以俄羅斯為首嘅最前線。皆因佢地唔希望自身再發生國家歷史上嘅黑暗時期,同埋借入歐嚟加強國民嘅歐洲人意識。另外,「中亞朝鮮」土庫曼自2005年起由成員國改為聯繫國,呢點要歸咎於土庫曼嘅鎖國政策,有幾鎖國?佢係全球少數要求全球國民都是申請簽證入境嘅國家(包括獨聯體成員國),而且旅遊簽證只發放畀參加旅遊社嘅外國人,就算畀過境簽證你,條件都非常苛刻。 此外,獨聯體有一個無限期逗留(Неограниченный период),但同歐盟相比呢個無限期逗留又好奇怪。首先,佢無一個類似歐盟嘅神根區,而無限期逗留只局限於某啲簽咗相關協議嘅成員國,例如俄白聯盟(Union State),佢係俄羅斯同白羅斯喺1997年4月2日簽訂《俄羅斯和白俄羅斯聯盟條約》而設立嘅一個自由流動協議。兩國公民可以根據呢條條約喺俄白兩國之間自由生活同定居,無需申請任何簽證,者係類似歐盟神根區成員國之間嘅飛機,係等同於內陸航空去處理。另外,吉爾吉斯都對獨聯體成員國有一個無限期逗留,但仍然要進行出入境檢查,不過獨聯體成員國國民可以只帶國民身份證就可以入境。 獨聯體成立至今就嚟30年,但一直發揮唔到咩大作用,反而畀人感覺係一盤散沙。「政治理想同政治現實永念遠存在好大差距。」蘇聯解體其中一個原因正正因為加盟國之間唔同嘅文化、語言、宗教嘅差異,呢點同南斯拉夫好似。今日中亞諸國嘅伊斯蘭化同去俄化日益高漲、高加索三國入面已經有佐治亞喺2008年因為南奧塞梯問題而退出獨聯體; 亞美尼亞同亞塞拜疆因為領土同宗教原因由上世紀80年代尾一直處於交火狀態、而近期烏克蘭都正式因為2014年克里米亞事件而正式退出獨聯體、再加埋白羅斯有意取消同俄羅斯嘅自由流動協議。筆者認為目前獨聯體某程度上已經係處於名存實亡嘅階段。但係,就算大家點唔妥都好,如果有共同利益,只都會埋枱坐低,話知你信東正教、基督教、伊斯蘭教。 •獨聯體可以點翻身? 筆者認為目前唯一一個有效解決或者緩沖獨聯體徹底玩完嘅方法係裏海呢個經濟誘因,只要俄羅斯可以聯同呢班成員國共同開發裹海,自自然會拉攏返呢班成員國。呢點唔係亂講,而喺係今年普京頻頻同裹海有領土連接嘅獨聯體國家(伊朗除外)舉行會面就可以見到一定嘅端倪。 筆者喺今年3月底喺白羅斯旅行期間,喺Hostel識到一位俄裔哈薩克青年,佢同好多俄裔人士截然不同,英文極為流利。細問之下得知原來佢喺哈薩克一間能源公司位於裹海沿岸嘅分部做嘢,公司內部有好多外國人,自然英文都唔會失禮人。而且,筆者喺對話當中得知,呢間能源公司員工係有幾位蘇格蘭人,大家都知蘇格蘭附近有一個已經過氣嘅油田-北海油田。所以筆者估計呢班蘇格蘭人應該有相關經驗先會走嚟哈薩克做嘢,亦都見到哈薩克對裹海係虎視眈眈,但一直唔敢敲鑼打鼓咁開發,原因在於一點-俄羅斯。 先係度簡單講下裏海,佢係一個位處亞洲同歐洲交界嘅世界上最大湖。而且呢度係世界目前其中一個擁有大量能源而又未開發嘅地方。相傳最早到達裹海嘅唐人係甘英,當時佢為咗搵到大秦(羅馬帝國)而到達呢度,但最後畀安息人呃咗,最後無功而返。裹海有大量嘅原油、天然氣、魚類(裏海嘅魚係出名拎嚟做魚子醬),筆者相信絕對可以幫助呢班喺國際上一直都唔係主流嘅國家翻身。但係,裹海呢塊大餅都造成咗一系列嘅跨國邊界談判,特別係對於阿塞拜疆呢類內陸國家顯得格外重要,因為點樣搵到一個突破點對於內陸國家係一大關鍵。所以,同裹海有領土連接嘅國家,基本上都有駐軍。而且都係派出國家最精銳嘅軍隊駐紮喺度。 雖然喺呢一帶俄羅斯自然係大佬,但點樣分呢塊餅仔係普京目前最為頭痛嘅問題。正如筆者喺上幾段所講,普京今年頻頻對裹海有所動作,喺2018年8月12日,俄羅斯、哈薩克、亞塞拜疆、土庫曼幾個裏海沿岸獨聯體成員國(加埋伊朗),簽署咗一份關於裹海法律地位嘅公約。正式列明裏海沿岸國家嘅海岸線各自再向外延伸15海里,而其他水域嘅漁業資源將會由呢幾個國家共同擁有以及管理。 而「裹海計劃」一但成事,對於俄羅斯係一個雙贏局面。首先,可以拉攏返獨聯體一眾成員國,甚至對於哈薩克嚟講,可以更加鞏固自己喺中亞嘅「一哥」地位。其次,可以阻礙到中華人民共和國嘅「一帶一路」。因為裹海計劃牽涉嘅國家,正正係「一帶一路」目標國家。俄羅斯嘅目的好簡單,就係唔可以比中華人民共和國喺經濟等方面對裹海週邊國家嘅影響多過自己本身,因為呢度係俄佬嘅「後花園」。第三,有更多天然氣就可以同歐盟有更多拉鋸嘅成本。所以,喺政治現實角度嚟睇,獨聯體仲未完全散,但要睇下裹海呢塊大餅可唔可以拉攏返一部份前蘇聯國家。 2018年10月30日香港...

Read More

沙地記者遇害案 王子呢獲周身蟻

文/William Luk 近日,中東局勢再添變數。中東國家沙地阿拉伯一名《華盛頓郵報》專欄作者哈舒治(Jamal Ahmad Khashoggi),喺2018年10月2號進入沙地駐土耳其伊斯坦堡領使館之後失蹤,事件雖然仍然處於撲朔迷離嘅階段。但筆者深信向來要面嘅土耳其「強人」總統艾度簡(Recep Tayyip Erdoğan),絕對唔會就咁罷休。其實今次事件嘅背後牽涉好多嘢,沙土關係、沙地權力鬥爭、沙地貪污問題以及背後美國嘅取向。 •沙土關係簡介 現代沙土關係,係喺1932年沙地阿拉伯正式統一後正式建立。兩國早喺19世紀初,已經打咗一次大戰,當時鄂圖曼將成個沙地王國滅咗,令到沙地要再遲足百幾年先可以統一。所以,雙方一早有好大牙齒印。 另外,兩國雖然同樣信仰伊斯蘭教,而且教派同屬遜尼派。但土耳其自上世紀喺國父阿塔圖克(Mustafa Kemal Atatürk)嘅帶領下,喺宗教方面一早已經奉行世俗化政策。阿塔圖克希望此舉可以令國內一眾穆斯林可以更為現代化,令普羅大眾將國家、現代價值等凌架喺宗教之上,務求更加親近歐洲之餘更加可以同現代社會接軌,被世人所接受。相反,沙地係一個奉行瓦哈教派嘅神權政治國家,瓦哈教派係屬於近代伊斯蘭教復古主義派別之一。有人會問筆者沙地點樣極端?舉個例,任何穆斯林改宗其他宗教,即判以斬首之刑處死,甚至迫害國內少數嘅什葉派教徒。 近年沙土關係早喺2011年「阿拉伯之春」開始已經存在暗湧,包括埃及、利比亞、等政權陸續被民眾推翻。而艾度根當時曾經表明對於呢一浪嘅改革持歡迎態度,甚至同敍利亞反面。但對於沙地阿拉伯而言,「阿拉伯之春」係嚴重破壞中東地區局勢。一直到2017年嘅卡達外交危機,兩國關係就開始出現唔穩定因數。雖然兩國並無直接嘅地緣政治衝突,但土耳其喺卡塔外交危機之後一直支持卡塔。因為,土耳其喺卡塔有一系列自身利益,除咗經濟之外,土耳其亦喺卡塔有駐軍,而且今年土耳其宣佈將會增派駐軍人數。 因此,土耳其上述種種舉動自自然引起同卡塔交惡嘅沙地不滿,導致沙地阿拉伯一直威脅要對土耳其實施制裁,並且喺今年年初聯同阿聯酋就已經舉行過一個有關「土耳其擴張主義」問題嘅討論,令土耳其相當不滿,導致總統艾度簡一直指控沙地阿拉伯同阿聯酋企圖推翻以艾度簡為首嘅土耳其政府。 總括嚟講,目前嘅沙土關係已經處於搖搖欲墜嘅階段,斷唔斷交雖然言之尚早,但隨住今次沙地記者喺沙地駐伊斯坦堡領使館遇害,筆者深相兩國關係將會每況愈下,而且會令中東稍為穩定嘅局勢再添一大變數。 •哈舒治 哈舒治出生喺沙地一個名門家族,佢爺爺穆罕默德·哈舒治係土耳其裔,曾經擔任沙地前國王伊賓·沙地((Ibn Saud)嘅禦醫。而正因為哈舒治有突厥人血統嘅關係,佢同現任土耳其總統艾度簡關係相當好。 哈舒治喺早期記者生涯入面,對賓·拉登嘅一系列採訪令佢喺新聞界聲名大噪。當時嘅哈舒治更被外界認為佢係沙地同拉登嘅聯絡人,外界一直推測哈舒治好可能係目前唯一掌握沙地王室同拉登相關組織喺9·11襲擊入面存在關係嘅非王室成員。 其實,哈舒治一直同沙地關係良好。但直到2017年6月,穆罕默德·賓·沙拉曼成為沙地統一之後首位唔係以兄終弟及身份繼位嘅新王儲之後,哈舒治開始喺外交同內政兩大方面不斷批評沙地王室。首先,王儲上任後展開咗一連串國內反貪行動,將幾十位王室成員同過百位商人以貪污罪逮捕。當中涉及到同哈舒治關係密切嘅王室成員。另外,哈舒治一直批評沙地喺也門嘅軍事行動。一方面冇加強沙地國家安全以及穩定中東局勢,反而造成也門當地嘅重大傷亡,影響沙地國家安全。另外,佢仲披露沙地王室利用也門內戰向國際銀行借咗超過$110億美元貸款,但一直無公佈呢一筆錢嘅去向,呢一點喺佢《華盛頓郵報》嘅專欄以及一啲講座都經常提及。 最後,哈舒治喺美國《華盛頓郵報》擔任專欄記者期間,喺DC成立一個叫做阿拉伯世界實現民主(Democracy in the Arab World Now)嘅組織,希望藉呢個組織繼續揭發目前沙地更多嘅經濟社會情況。所以,筆者認為哈舒治覺得就算現任王儲打反貪同解禁女性嘅旗號,只係想遮掩自身利益集團喺沙地嘅腐敗問題同埋石油輸送利益,加上近日沙地宣佈擱置同日本軟庫(Soft Bank)一個超過2000億美金嘅合作項目,而項目本身已經進行前期工作,令人不禁懷疑哈舒治本身係咪掌握一定嘅證據去揭示呢類黑箱作業嘅項目。 由以上以上種種舉動可見,哈舒治確實由親沙地立場轉變為反沙地。而其中一個轉捩點正正係新任王儲沙拉曼。而哈舒治近年喺美國甚至全世界嘅行為同言論都已經激嬲咗目前沙地高層成員,高層唔單止王儲,甚至乎係同王儲有密切關係嘅人。而且佢確實掌握咗唔小沙地政壇嘅黑幕,筆者深信呢一系列嘅嘢都係今次事件嘅導火線。 •土耳其嘅動向 筆者相信,土耳其目前嘅動向基本上取決於總統艾度簡嘅態度。眾所周知,土耳其喺2016年政變後已經開始邁向一條獨裁之路。艾度簡對於哈舒治事件嘅高調關注,可以見到土耳其相喺呢次當中盡力取得平衡的努力。 首先,艾度簡公開承諾會全力調查事件真相,甚至為求可以對沙地施以龐大壓力,不昔打破外交慣例,將外交豁免權放喺次為,迫使沙地畀土耳其警方入內調查。而且,已經有種種證據表明,哈舒治確實係冇離開到沙地使館,甚至有鑑證人員發現使館內含有有毒物質。天坪其基上倒向艾度簡一方,而艾度簡嘅目的係平息國內輿論,加上哈舒治有土耳其血統,令向來以大突厥自居嘅艾度簡可以打正旗號。筆者深信一但艾度簡可以喺呢次事件拎到甜頭,可以更進一步鞏固佢喺土耳其嘅執政地位。甚至可以提升土耳其喺區內嘅影響力。 另一方面,艾度簡都會小心翼翼避免沙土關係會出現緊張升溫嘅情況。原因在於經濟層面,根據2017年土耳其出口貿易部嘅數據得知,沙地喺土耳其嗰年嘅投資高達10.36億美元,而佢嘅一班海灣盟友,包括巴林、阿曼、科威特同埋阿聯酋合共投資接近7億美元。由此可見,以沙地阿拉伯為首嘅海灣聯盟,係目前土耳其嘅海外重要投資國家之一。 雖然經濟重要,但艾度簡同時礙於面子,必然唔會就咁算數。而且,土耳其可以加強同伊朗、俄羅斯、甚至阿塞拜疆呢班裹海國家嘅關係,從而避免一但同沙地決裂,失去一大外匯收入,影響土耳其經濟。 •沙地嘅動向 目前輿論基本上一面倒遣責沙地阿拉伯,沙地目前確實處於被動階段。而且領事喺案發後離開土耳其,就算沙地宣稱佢只係因為違反某啲法例要返去畀沙地調查,但係目前嘅情況下,反而會被外界認為沙地係「身有屎」。 而喺文章推出嘅同日,沙地終於認咗哈舒治喺使館入面死亡。而土耳其調查人員喺使館係搵唔到哈舒治嘅遺體,相信遺體被棄置喺伊斯坦堡近郊。 點都好,筆者已經一口咬定呢單嘢係沙地事先預謀。點解咁講? 首先,15個暗殺成員嘅資料已經畀土耳其用擠牙膏方式咁公諸於世,15個暗殺成員都係用沙地普通Passport加電子簽證入境土耳其。筆者喺呢度要同大家講,外交人員應該係要用外交Passport入境土耳其,而唔係用普通Passport以旅客身份入境。另外,最令筆者覺得目瞪口呆嘅係其中一個成員返到沙地之後因為車禍身亡,令人覺得有滅口之嫌。 其次,根據閉路電視片段,15個暗殺隊成員喺哈舒治進入使館之前,提前1個鐘分批進入使館,並喺哈舒治進入使館1個鐘之後相繼離開使館經伊斯坦堡機場離境,呢段時間足以「處理」哈舒治。 最後,筆者認為今次事件雖然可以令哈舒治手上擁有對沙地部分王室成員不利嘅黑幕暫時唔可以公諸於世,但勢必會令沙地國內一班反王儲勢力蠢蠢欲動,一定會有人密謀將現任王儲拉落台,勢必令沙地亂上加亂。而沙地對外都只會不斷話呢單嘢屬於國家內政,唔容許外人說三道四,拖得就拖。 •美國嘅取捨 有人會問筆者,點解哈舒治嘅失蹤可以驚動到美國國務卿龐佩奧(Pompeo)出面斡旋,咁樣又會對目前中東政局造成咩影響? 筆者認為,始終土耳其同沙地阿拉伯都係美國喺北約同中東地區嘅重要棋子,而美國過往處理嘅手法必定想盡量息事寧人。我地喺美國先見沙地後見土耳其嘅先後程序,可以睇到後者會有一定利益。因為龐佩奧絕對會係同土耳其會面嘅時侯,向佢地透露一下沙地王儲嘅最新消息。但呢個先後動作,自自然會得罪沙地。正所謂「魚與熊掌,不可得兼」,美國今次一定有所取捨,事關沙地喺土耳其自家門前殺咗一位同艾度簡關係密切而且有土耳其血統嘅人,艾度簡絕對唔會就咁算數,筆者肯定佢一定會以北約成員國身份迫美國喺今次事件中表態。 而且,就算以Trump為首嘅美國點唔鐘意北約都好,土耳其始終係一個地緣政治關鍵點。首先,土耳其阻隔咗中東,而且控制咗俄羅斯由黑海出地中海嘅唯一要道。筆者深信美國必然會利用呢個機會先去拉攏返土耳其,事關過去2年美土關係跌到前所未見嘅谷底。而目前美國手上嘅籌碼正正係之前被土耳其拘禁嘅牧師安德魯·布倫森(Andrew Brunson)。而筆者相信美國會喺土耳其釋放呢個牧師之後,亦可以藉呢個機會解除對土耳其嘅經濟制裁,從而令土耳其里拉有返上升嘅空間,今日里拉對美金已經上升返2%,可見呢個做法有立竿見影效果。 而沙地阿拉伯,近年其實同美國關係都係轉差。喺17年前嘅911開始已經不在話下,再喺近年兩次沙地對外斷交事件入面,沙地都高調叫美國唔好介入佢對伊朗同卡塔嘅外交政策。但「關係唔好,生意照做」就算近年兩國關係轉差,基於美國自身利益,筆者預計美國係唔會對沙地過份追究,始終沙地喺美國全球戰略眼中,仍然佔有一席之地。美國喺呢件事件上面只會息事寧人。   (文章純屬筆者意見,不代表癲狗日報立場。) 全民俾LIKE 人人「些牙」! ...

Read More

【BNO】俄羅斯簽證申請教學

文/William Luk 今次主要會同大家講下成個俄羅斯簽證申請程序,雖然拎香港特區護照同澳門特區護照分別有14日以及30日免簽。但有關喺香港整俄羅斯簽證資料少之有少。所以,筆者今次特登寫一次喺香港整俄羅斯簽證嘅程序。 呢篇文嘅目的主要方便下BNO或者想留俄羅斯超過14日嘅香港特區護照持有人,西伯利亞鐵路為例,14日嘅免簽係唔多夠用。 老實講,俄羅斯簽證要求多多,筆者今年年初都嘥咗差唔多1個月時間先拎到簽證,拎完嗰刻真係喊出嚟呀!!!!! •俄羅斯簽證所需文件 1. Passport -有效期半年以上 2. 相 -一張35*45mm嘅相 -白色背景 -唔好笑 3. 香港或澳門身份證影印本 -參考呢個 https://hongkong.mid.ru/…/who-can-apply-for-a-russian-visa-… -俄國全球駐外使館講明,如果外國人冇嗰個外使館身處國嘅有效居住文件,一律唔接受申請。因為申請使館範圍包括港澳,所以要帶同香港或者澳門身份證影印本去證明閣下有香港或者澳門居留權。 4. Invitation Letter(邀請函) – 邀請函,係一啲簽證唔開放嘅國家刁難外國人嘅常見招數,包括伊朗、土庫曼呢類國家都係用呢一招。俄羅斯都唔例外,你要搵一間旅行社擔保你喺俄羅斯成個行程,去邊、住邊、留幾日都要喺呢張紙度清楚講明。筆者當時講明4月3號到10號會留喺俄羅斯,結果簽證出嚟真係畀到我10號,好彩筆者係坐11號凌晨1點嘅機走,喺10號12點前離境,先至無逾期逗留嘅問題。 另外,筆者留意到好多Travel Agency批嘅邀請函都有visa批唔到嘅cases。所以,請自己衡量搵邊一間去幫你做擔保,筆者私底下可以推薦一間。(因為怕畀人公開,麻煩請pm本人) -有人會問我Invitation Letter要original定係email copy? 我整Visa嗰時我問過駐港領事館,拎中華人民共和國發出嘅Passport (包括香港同澳門特區護照) 係需要original,者係要你畀多幾百蚊港紙搵DHL由俄羅斯寄嚟香港 但如果閣下係英國 (包括 BC/BNO/BOTC/BOC/BS/BPP) 或者加、美、澳、紐、臺灣、歐盟嘅Passport嘅持有人,咁剩係要print旅行社嘅email copy出嚟就得! 5. 訂房(你喺俄羅斯期間所有嘅行程住宿) -呢個步驟建議你搵咗Invitation先再訂,因為可以通知Travel Agency幫你改住宿地點。事關有啲人住Hostel,所以出邀請函果時未必出到你要住果間。因為你入境俄羅斯都要帶住張邀請函,所以一定要啱。因為俄羅斯差佬出名麻煩,一查到你唔係住呢間,雞同鴨講嘅情況下真係有排煩。 6. 機票(未必) -呢個睇下你國籍,6個英國國籍都唔使。相反,特區因為中國籍關係經常被要求出示機票。 7. 旅遊保險(未必) *如果你拎歐盟申根國家、愛爾蘭、中華人民共和國(包含香港同澳門)、澳洲、紐西蘭Passport,請先去買一個旅遊保險,再列印相關證明。詳見 http://russia.com.hk/…/vi…/requirements/english-tourist-visa 當你搞掂晒上面所有嘢就可以正式去申請俄羅斯簽證。 •申請簽證步驟 1. 上 https://visa.kdmid.ru/ 填online form -2017年1月26號開始,俄羅斯外交部已經規定所有申請人一定要上 https://visa.kdmid.ru/ 填好張申請表再列出嚟。所以,要填好呢張表之後PRINT OUT出嚟,到時連埋之前提到嘅文件交畀領使館職員。 *麻煩各位,喺填form最後一欄記住揀俄羅斯駐香港領使館,唔好揀簽證中心。因為,簽證中心會多收多$300蚊港紙。另外,如果係英籍,緊記一樣嘢就得。佢會問你有冇英國NI,通常住過英國嘅都會有呢樣嘢,有就填,冇就唔使理。最後,呢份網上Form係好長,有心理準備要填好耐。 2. 再上去 http://hongkong.kdmid.ru/queue-en/ 預約繳交簽證文件時間 -時間可以隨時改,只要你記住申請果時個code就得 -切記!唔好整多一個預約,否則會當無效 3. 去領事館交Passport *注意領事館只喺朝早 09:00-12:00 畀你整簽證 *簽證中心整證時間係朝早09:00-17:00,呢點正正係有人會揀簽證中心嘅原因。不過,額外收$300,而且效率一樣,你會點揀? 3.1 根據(2)嘅預定時間上去領事館 -地址: 灣仔新鴻基中心 21/F 3.2 申請流程 3.2.1 先去1號窗畀使館人員登記你本Passport,佢會根據你嘅Passport資料寫入一本記事簿度 3.2.2 再去3號窗畀晒所有我喺上面提到嘅文件畀個職員,佢會逐樣同你Check清楚,有咩要補交呢個時候會講畀你知 3.2.3 畀錢,香港使館講明只收港紙同埋唔收$1000金牛 3.2.4 職員再畀張收據你,會叫你喺指定日期以後返嚟拎 *呢一個步驟最緊要齊資料,因為俄羅斯人啲格係好難頂,你漏咗資料佢唔會同你解釋咁多,叫你重新預約時間再上嚟申請 *請注意,申請簽證嘅常規處理要5-7個工作日左右 *如果你想整特快,價錢會收多1倍左右,但係晏晝就可以拎返本Passport,不過建議大家都係等,因為快證成千蚊,夠你喺俄羅斯玩幾日。 總括而言,筆者要同大家講,俄羅斯仲係一個比較封閉國家,佢嘅免簽證好多都只係開畀獨聯體國家。但佢細佬白羅斯上年開始對好多國家開放免簽,呢點係大大力打咗普京一巴。但值得一提嘅係,只要你有今年世界盃Fans ID,今年可以隨時免簽入境俄羅斯。筆者相信普京都希望用另類免簽去刺激俄羅斯旅遊業,畢竟今次世界盃令到好多俄羅斯城市登上國際舞臺。 另外,就算你有簽證或者免簽,都唔代表你可以行晒成個俄羅斯。時至今日,俄羅斯好多地方都係唔畀外國人出入或者要再申請另一個入境許可。例如接近美國阿拉斯加嘅嘅楚科奇州(Чуко́тский)、接近車臣同佐治亞嘅阿蘭(Ала́ния)、近芬蘭果頭嘅州份或者擁有核設施嘅州份。 4. 拎簽證 麻煩各位拎咗簽證之後,記住即場檢查清楚所有資料正唔正確,筆者有個臺灣同學,喺拎完個簽證發現出生日期變咗1960年1月1日,即時要改。 由於俄羅斯簽證好多都係俄文,以下係簽證資料對譯: 1. 入境/Entries...

Read More

歐盟ETIAS唔等於簽證

文/William Luk 近期網上流傳歐盟宣布2021年起香港人去歐盟神根地區,都要申請一個所謂ETIAS嘅簽證,再無免簽證呢回事。筆者睇到唔同網上平台個上面個都爭先恐後,甚至主流傳媒都大肆宣傳。 筆者喺度要提醒各位讀者要先睇清楚內文同了解ETIAS功能,小心撞車。皆因網上流傳港人2021年起去歐洲要簽證,實屬大錯特錯。無論你用BNO、特區、加拿大Passport等,只要歐盟簽證政策唔變,2021年之後去歐盟都係繼續免簽證。咁到底咩係ETIAS? 筆者會利用呢篇文章解釋畀各位讀者聽。 首先,歐盟駐港澳辦事處發言人已經表明,呢個ETIAS(European Travel Information and Authorization System/歐盟旅遊資訊及許可系統)係一個針對18到70歲嘅全球歐盟免簽證國家國民嘅旅遊許可(Travel Authorisation),申請費係7蚊歐元,要用信用卡畀錢。而申請一經批核,有效期係3年,期間可以喺每半年內嘅90日自由出入神根地區入面26個成員國。 我地可以理解ETIAS係一個係類似而家美國ESTA同加拿大嘅ETA嘅旅遊許可,佢並唔係一個簽證。目的係類似美國同加拿大咁,透過呢個系統去協助促進歐盟神根區內嘅區域安全、防範非法入境同極端主義者。 另外,ETIAS 適用國家同地區唔止香港,佢係包括晒美國、臺灣、韓國、日本、澳洲、紐西蘭、加拿大等61個歐盟免簽證國家同地區。佢地喺2021年之後都要事先申請ETIAS先可以入境歐盟。 由此可見,佢係針對全球歐盟免簽證國家,類似一個「良民證」。因為,EITAS會利用申請人遞交嘅資料,由歐盟同國際刑警組織資料庫進行自動處理及分析。 第三,持有有效神根區簽證,係無需要辦理ETIAS,者係話需要簽證入境歐盟嘅國家,都無須要申請ETIAS。不過筆者好唔明白,通常先係高危範圍國家先多啲麻煩人,你唔搞佢地反而搞61個免簽國家,實屬奇怪。而且日防夜防,家賊難防。你成員國內部有啲公民都係極端主義者,你搞佢地唔掂就搵外人開刀? 不過,理性啲去諗。筆者覺得呢個ETIAS嘅推出,某程度上同美國對歐盟成員國簽證政策不公平有關,事關有部分歐盟成員國到今日都要申請簽證入境美國。例如波蘭、克羅地亞、保加利亞同埋羅馬尼亞。所以,歐盟推出呢個政策嚟到抗議美國呢項不公平嘅免簽政策。 綜合以上幾點,呢個ETIAS唔係針對中國呢類要簽證國家。呢單嘢根本唔關中國事,麻煩各位可唔可以睇清楚啲資料先。筆者唔係幫中國SPIN,而只係根據客觀事實去講。你要反唔係問題,但唔好人云亦云,欠缺批判性思考。 最後,如果你要前往幾個歐盟非神根區國家,例如保加利亞同羅馬尼亞。理論上係無需要申請ETIAS。 然而,有關於英國國民(海外)(BNO)嘅問題,歐盟已經畀咗明確答案,係要申請。不過,目前除咗英國公民(BC)之外,另外4個英國國籍同樣都要申請ETIAS。 至於英國公民,目前仍然都係得個迷。而且歐盟喺上圖用咗一句(紅線)” Currently, ETIAS is not required for nationals of the UK.” (「目前,英國公民係唔需要申請ETIAS。」)其實歐盟嘅用字又係有錯誤,根據英國國籍法,Citizen同National係兩個概念。 呢句出現嘅原因係因為英國目前進行緊脫歐程序,歐盟都仲未清楚英國公民以後入境歐盟嘅條件係咩。所以係開頭加咗”Currently”,恐防有變。 由此可見,筆者認為英國公民係咪要同BNO一樣,將來要用ETIAS系統進入歐盟,就要視乎 Brexit 搞成點。筆者深信只要確定脫歐細節,BC都同另外5個英國國籍一樣,喺2021年都要事先申請ETIAS進行歐盟神根區。 (文章純屬筆者意見,不代表癲狗日報立場。) 全民俾LIKE 人人「些牙」! ...

Read More

【BNO】斯里蘭卡ETA(電子簽證)申請步驟

文/William Luk 簽證,係一個國家嘅行政機關對他國公民所持嘅Passport上嘅簽注同扔印,以示允許佢可以出入本國國境嘅手續。由於簽證政策基本上同國際同區域政治關係掛勾。所以,筆者會喺度嘥一段時間介紹一啲需要申請簽證或者eVisa嘅國家,以方便各位讀者出入他國。 今次筆者會先介紹南亞國家斯里蘭卡(Sri Lanka)。位又知唔知日本電影千與千尋入面有一個場景係參考咗當地一個海岸鐵路呢?斯里蘭卡作為筆者一生人想去一次嘅國家之一。希望他朝一日有機會同大家寫下遊記介紹下我喺錫蘭嘅所見所聞。 以下係2018年申請斯里蘭斯里蘭卡又名錫蘭(Ceylon)係南亞一大島國,亦都係一個佛教國家,過去都係英國殖民地之一。喺9年前先至結束長達26年嘅內戰。而大家對錫蘭紅茶一定略有所聞,甚至乎因為佢嘅地緣政治令佢可以保持到佛教文化。但各卡ETA(電子簽證)嘅申請步驟。 •ETA 截止2018年10月15號,斯里蘭卡只係畀星加坡、塞舌爾同埋馬爾代夫呢三個國家有30-60日免簽證待遇。全球大部分國家嘅國民喺入境斯里蘭卡之前都要申請ETA。但據聞斯里蘭卡有意再開放更多免簽國家,但呢個仍然係構思階段,始終ETA係一門賺錢工具,以柬埔寨為例,靠eVisa一年嘅外匯收入係多不勝數。呢點都係佢只畀東盟同少數東亞國家免簽嘅原因。 目前BNO持有人係可以申請ETA去當地旅行或者經商。只要喺出發前90日起就可以登入官方網站 http://www.eta.gov.lk/slvisa/ 申請。 •ETA 所需資料 其實要準備嘅資料唔多,只係下面3樣: 入境同出境嗰時有效期都超過六個月嘅Passport 喺斯里蘭卡嘅住址(Hotel、Hostel、朋友屋企都無所謂) 有VISA/Master或者American Express功能嘅信用咭; •申請ETA步驟 -登入ETA官網 請先進入http://www.eta.gov.lk/slvisa/ 第一頁會有好多語言選擇,揀一個自己睇得明嘅。以下會以英文為標準。 -輸入個人資料 拎住本Passport入,一定要跟Passport入面嘅資料去輸入,錯一個字同坐飛機一樣成個ETA就作廢。 紅線順序係: 姓 名 稱謂 出生日期 性別 國籍 出生地 Passport號碼 Passport生效日 Passport到期日 -填寫入境資訊 紅線順序係: 入境日期 入境目的 居住國住址 斯里蘭卡住址 -對資料 *呢度最緊要,上面啲資料填錯可以返轉頭改。因為一錯資料又畀咗錢你就要重新畀一次。 -網上畀錢 一定要用信用卡畀錢,有VISA/Master或者American Express功能嘅信用咭都可以畀 -收Email 畀完錢之後會連去到圖上畫面,24小時內會經填寫咗嘅電郵收到審核簽證嘅情況。再將佢Print出嚟就得。 緊記,喺斯里蘭卡入境期間要帶埋呢張印好嘅ETA,冇帶嘅就麻煩再畀錢排隊去整多個VOA啦。 •ETA常見問題 -ETA批核時間 申請全世界各個國家eVisa都需要當地移民局用一定時間去審批。根據斯里蘭卡移民局嘅資料顯示ETA會喺申請之後24小時入面批核。 所以,筆者建議大家一定要預留充足時間去整ETA。但如果整唔切都唔緊要,因為首都機場班達拉拿也卡(Bandaranaike)係有提供VOA(落地簽證)服務。 不過,近年勁多旅客會經首都機場入境,排VOA條隊係非常之多人,加埋南亞人工作效率,所以會非常浪費時間。因此,都係整定ETA啦,大家都唔想因為咁而阻住自己個行程。 -簽證有效期以及延長逗留問題 斯里蘭卡ETA係自入境日起有效30日,入境官員會係你Passport癡上一張類似日本嘅入境貼紙並且喺附近扔上一個黑色長方形入境印。但如果讀者嘅入境次數喺30日入面多過2次,就一定要用事先去斯里蘭卡駐外使館申請貼紙簽證入境。 另外,有關延長逗留問題。斯里蘭卡移民局係官網表示任何外國人喺入境斯里蘭卡之後,可以喺首都科倫坡嘅各國出入境移民處申請簽證延期逗留,最多係6個月,同時要有一張相、離境機票同埋35蚊美金。(一定要本人親自去整) -小心假冒網站 由於近年各國電子簽證多不勝數,自自然出然有啲扮得維肖維妙嘅假簽證網。所以,筆者喺度要提醒大家一定要小心提防假冒網站。因為,你係用信用咭畀錢,一畀出去就基本上拎唔返。而且Passport資料好大機會落入不法份子手上。 最後,祝你旅途愉快 🙂 (文章純屬筆者意見,不代表癲狗日報立場。) 全民俾LIKE 人人「些牙」! ...

Read More

Pin It on Pinterest