0 Items

Category: 國際大棋局 William Luk

唔洗再「左右逢源」嘅白羅斯

喺上一篇文章,我漏咗講俄白關係。所以呢篇文章會全面闡述呢對曾經老友到攬頭攬頸嘅國家喺近年出咗啲咩問題。 白羅斯(*白俄羅斯)一直被認為係歐洲最封閉國家。時至今日,佢仍然係歐洲唯一一個執行死刑嘅國家,再加上國內人權、嚴苛嘅簽證制度、總統盧卡申高獨裁等問題。因此有「歐洲北韓」之稱。 但隨住上年2月,白羅斯「萬年總統」盧卡申高(Лукашэ́нка/Lukashenko)簽署有關80個國家5日免簽法令(必須經首都明斯克機場空入空出)。而白羅斯將會喺2019年舉辦歐洲運動會。呢個歐洲最封閉嘅國家正式開始畀世人所注視,最近連Google都開始可以正式喺白羅斯用(不過係得個定位,如果搵交通都係睇當哋俄文資料會好啲)。   • 緊張到仆直嘅入境過程 筆者就利用呢次東歐遊嘅機會,用5日免簽由烏克蘭基輔飛嚟白羅斯打個白鴿轉。不過入境果時,我就第一次體驗到佢入境係有幾嚴,甚至係我去過咁多國家裡面最嚴謹嗰個。 關員會拎住你本Passport驗屍咁驗,又用放大鏡又照紫外光。 最癡線係佢後尾見我有俄羅斯簽證問我係咪去完白羅斯就直飛俄羅斯,如果係嘅話我就唔可以用5日免簽。最後,我畀咗飛立陶宛嘅機票佢睇,關員就扔印落我護照度。 當你走入白羅斯首都明斯克(Мінск/Minsk),你會發覺呢度真係同其他歐洲國家格格不入。我諗緊自己係咪坐咗時光機返咗去蘇聯時代。 因為街道同地鐵入面充斥住一系列嘅紅色政治標語,共產主義雕塑,二戰紅軍畫像同埋蘇聯國徽。加上街道井井有條,乾淨企理。我彷彿覺得自己置身喺平壤街頭。只係差在金日成同金正日嘅畫像冇喺我週邊不斷出現。 呢個國家嘅消費係全東歐最貴,所以我餐餐都喺Hostel自己煮。 不過聽Hostel嘅人講,呢一年首都明斯克多咗好多英文指示牌。相信係要為下年喺明斯克舉行嘅歐洲運動會做好準備。 如果大家有留意開東歐嘅國際新聞,盧卡申高近年對外政策開始親歐,不禁令我諗起一個問題,唔通佢同長期盟友俄羅斯關係出現咗變數? 冇錯!近年俄白關係真係出現咗變數!閒話少講,以下我會綜合我喺白羅斯3日嘅所見所聞,再話畀大家知俄白兩國關係點解會出問題。   • 由當地語言去反思香港 白羅斯官方語言雖然係白羅斯文。但我發現,呢度啲人講俄文多過講白羅斯文。 隨住近年前蘇聯加盟國嘅一片去俄化浪潮,白羅斯政府喺近年都極力推行白羅斯文,不過成效唔大。 目前年輕人大多數都係講俄文為主。我點解會知?因為佢哋講唔該都係講Спасибо(俄文嘅唔該)而唔係講Дзякуй(白羅斯文嘅唔該)。 加上白羅斯同行友人有一位俄裔哈薩克人士,佢都話聽到白羅斯人講俄文多過白羅斯文。 我喺度諗身為白羅斯人連自己語言都講唔出。再諗返起香港而家好多人連廣東話都講唔到,你話係咪感同身受呢? •白羅斯嘅歐俄平衡外交將會打破 -喺地緣政治角度而言,白羅斯喺歐洲係極具地緣政治價值。因為白羅斯位於歐盟同俄羅斯嘅邊疆。特別係除烏克蘭以外其他周邊國家紛紛入歐之後顯得更為重要。 顯而易見,白羅斯已經成為俄羅斯同歐盟以及北約之間最後一道屏障。 盧卡申高喺早期實行親俄政策,同俄羅斯有往常密切嘅經濟同人員自由流動聯繫,兩國公民可以無限期逗留對方國家,呢點類似歐盟嘅Freedom of Movement。(**俄白協議) 但近年兩國關係出現一系列波動,天然氣問題一直係其中一個原因,而5日免簽正正係兩國能源問題之間嘅衍生物。 另外,烏克蘭局勢係另一個造成俄白關係波動嘅原因。 盧卡申高自己係烏克蘭族,對烏克蘭總會存在些少感情。而且作為一國之首,佢都怕白羅斯遲早會成為烏克蘭嘅翻版。 所以喺克里米亞事件之後,盧卡申高公開支持烏克蘭,反對烏東進行獨立公投同軍事衝突,呢次係佢在任總統以嚟首次公開反對俄羅斯對外政策。佢積極對俄羅斯同烏克蘭嘅衝突進行斡旋,喺上年成功邀請烏克蘭總統波羅申高同俄羅斯總統普京喺明斯克見面會談,促成一個無約束力嘅停火協議-《明斯克協議》。但至少都見到白羅斯被俄烏認同作為一個中間人去進行一定程度上嘅調解。 而舊年盧卡申高亦喺一個論壇度當面批評俄羅斯總統普京對美政策同埋輕視態度,係人都知普京高傲嘅性格,咁樣當眾批評佢你估普京會點諗? (Link: https://youtu.be/tJkKYPskRU0) 。 而今年傳出白羅斯會取消俄白兩國自由流動協定,再加上上述一系列因素。令人不禁猜測到底俄羅斯會唔會失去歐洲最後一個盟友。呢個對俄羅斯同普京絕對係一個致命嘅打擊。就算你幾好打都好,你喺國際比人孤立就注定仆街。   • 由白羅斯隨處可見嘅簡體中文睇中白關係 喺俄白關係鷸蚌相爭嘅同時,有一個國家正正喺度漁人得利緊。佢就係中華人民共和國。 近年中白關係可以用急速發展嚟形容,發展到點呢?睇上面張圖你就略知一二! 係!你冇睇錯,呢度確實係白羅斯一條高速公路入口。我由機場一出嚟到市中心,只要係啲指示牌,基本上都有簡體中文。你肯定會驚訝點解會有簡體中文。心諗唔通過咗羅湖橋以北? 事緣白羅斯首都明斯克15公里外有一個中華人民共和國-白羅斯工業園(Китайско-Белорусский индустриальный парк),佢係白羅斯少數嘅經濟特區,設有畀輕重工業、金融同科技研究等商業活動嘅設施,向中華人民共和國嘅投資者提供白羅斯總統法令所規定嘅一系列優惠同保障,從而吸引到大量中資企業進駐。呢個工業園係目前中白兩國最大的經貿合作項目,亦都係目前白羅斯吸引外資而設立嘅最大經濟項目。 另外,白羅斯政府同中國企業亦有公路擴建等項目合作。 所以就解釋到點解啲公路入口都標有簡體中文,因為呢度真係好多中國人做生意。至於英文,顯然係為咗下年歐洲運動會同方便歐洲旅客而設。 中白經貿急速發展始於2014年烏克蘭危機。但到底中白經貿急速發展成點?我哋睇以下近年一啲數據就略知一二。 2015年中華人民共和國已經成為白羅斯喺亞太地區最大嘅貿易伙伴,雙邊貿易額持續增長,對比2014年上升咗27.3%。 而近年中華人民共和國集中利用白羅斯作為同歐盟同其他非歐盟嘅歐洲國家進出口貿易嘅中轉站,喺2017年中華人民共和國通過白羅斯運去往歐盟同其他非歐盟嘅歐洲國家嘅貨箱運輸比2016年嘅約150次上升到300次以上,喺短短一年增加咗一倍。 其實,白羅斯同萬里之外嘅中華人民共和國有咁緊密嘅經濟合作,其中一個原因在於避免經濟單一依靠俄羅斯。大家都知道一個國家如果單一依靠另一國,一但被控制嘅話就插翼難飛。而中白兩國無地緣政治問題同歷史上從來無反過面,再加埋烏克蘭危機。所以盧卡申高寧願信中華人民共和國多過鄰國普京。 而喺2011-13年,白羅斯曾經經歷過一段立國以嚟最嚴重嘅經濟低潮期,國家貨幣不斷貶值同失業率高企,從而引發一連串嘅示威同埋明斯克地鐵爆炸案,差啲令到盧卡申高落臺。而當時盧卡申高曾經期望普京呢個好兄弟出手打救,但得唔到滿意嘅答覆同實際援助。 正正因為嚟自中華人民共和國嘅經濟援助,令當前白羅斯經濟有所改善。所以大部分白羅斯人對亞裔人士普遍友善,對比莫斯科啲俄佬真係差天共地。 另外,白羅斯因為人權等問題長年受歐洲制裁,盧卡申高好希望借中華人民共和國作為一個突破口,唔止打入東亞市場,佢更加想借中華人民共和國打入東盟市場。 再者,白羅斯一直希望加入世界貿易組織(WTO),所以一直希望借住以中華人民共和國貨品對歐洲嘅進出口質易方式令自己更加快入世。不過近日中美貿易戰開打,相信入世時間又將會拖上拖。 總括嚟講,而家白羅斯見到烏克蘭搞成咁,自己都一定怯,加埋而家所有獨聯體國家紛紛去俄化,盧卡申高必定順理成章跟埋一齊去俄化。 加上而家歐盟入面幾個大佬共同驅逐俄外交官出境,而白羅斯身處歐俄中間,可以食下花生,繼續頭搖又尾擺。 而開放歐盟免簽同取消俄羅斯自由流動,預示白羅斯可以唔使再沿用廿幾年嘅左右逢源政策,實現自主外交。如果今年真係如外界所講取消俄白協議,我諗俄白關係會跌入史無前例嘅谷底。 暫時咁睇,中華人民共和國又可以乘住俄白關係出現變數,繼續佔下便宜。但只係暫時,始終喺國際政治入面無永遠嘅敵人,亦都無永遠嘅朋友。 所以緊記,我呢刻唔係刷緊中國鞋。如果唔儘量理性去分析國際政治,你永遠冇辦法令自己進步。 作者: William Luk 2018年3月28日 白羅斯 明斯克 *2018年3月18日,白羅斯駐中華人民共和國大使館嘅官方網站建議其漢字名由「白俄羅斯」改為「白羅斯」。 **俄白聯盟(俄文:Сою́з Росси́и и Белору́ссии),一項喺1997年4月喺莫斯科簽署嘅條約,列明兩國公民可以自由來往並且唔受到出入境管制。...

Read More

「普驚」做一世?

「香江吠聲響不絕,癲狗已過萬重山。」筆者喺度祝癲狗日報蒸蒸日上! 多謝黃毓民先生同梁錦祥台長嘅信任,將《國際政治》一欄交由本人負責。筆者仍處於有志於學嘅階段,實在無法同其他專欄人士相比。 如有錯漏,望以指正。敬請多多見諒! 希望大家重拾鬥志,戰鬥到底! 「屌那媽,頂硬上!」     大雪過後嘅莫斯科街頭充斥住各種大選宣傳 (William Luk攝)   筆者喺2日前曾經喺俄羅斯首都莫斯科轉機逗留半日,適逢俄羅斯將喺2018年3月18日舉行總統大選,筆者趁長達8小時嘅轉機時間前往莫斯科市區打算一睹俄國大選風采。眼觀市內只得愛俄力陣營喺度為普京納喊助威,更有警員協助維持治安。而其餘候選人呢?去咗邊呢? 其實今次俄國大選嘅候選人多達8人,但喺選前已經出現DQ事件,將一啲被認為係普京嘅潛在威脅排除在外,畀人不禁質疑呢次選舉嘅公平制度。 加上自千禧年代起,俄羅斯喺普京執政後構成一種「選舉良權主義」。儘管是次俄國有大選嘅形式,但基於普京喺俄羅斯超高的地位以及俄國當前嘅政治氣候,其他候選人喺呢次俄羅斯總統大選中只會起出陪襯嘅作用。可見,今次大選入面唔可能會出現激烈角逐嘅情況,俄羅斯國內或者國際社會均普遍認為今次大選只係繼2012年之後再一場「有選無戰」嘅大選。 我喺度可以斬釘截鐵同大家講,今次大選又只會係普京叔叔嘅一次個人show。雖然普京喺連任嘅問題上幾乎冇任何懸念。但佢都面臨畀俄羅斯實現經濟轉型、人口增長、國民思維轉變等諸多挑戰。而美俄同中俄關係依然畀普京所睇重,或者因為經濟原因佢都可能會積極尋求同歐美國家改善一下關係。點都好,其實我哋可以喺俄國大選前面對嘅問題,估到俄國喺下半年嘅大致對外走向。     俄羅斯首都莫斯科街頭有關是次大選嘅呼籲 (William Luk攝) 1.俄烏關係 喺烏克蘭手上奪取克里米亞畀認為係普京喺過去六年任內嘅最大政績。 通過克里米亞,某程度上暫時解決咗蘇聯解體之後俄羅斯地緣政治嘅問題,喺一定程度上恢復自沙俄時期以嚟俄羅斯喺黑海地區嘅地緣政治環境-重奪一個黑海不凍港(略似19世紀中克里米亞戰爭前嘅形勢)。俄羅斯作為一個係領土方面充滿渴望嘅國家,呢個對普京嚟講係一件意義巨大的事情。 但同時重奪失去多時嘅克里米亞亦都畀俄羅斯完全失去咗烏克蘭呢個斯拉夫盟友,甚至國際社會嘅信任。由普京喺2003年上任後嘅對烏方針可以睇得出,他一直希望建設一個後蘇聯同盟圈,以應對歐美喺地緣政治上嘅夾擊,而烏克蘭係當中重要嘅一份子,作為對NATO同E.U嘅緩沖區。但自克里米亞危機之後國際社會對俄羅斯進行了一連串嘅國際制裁,同時都徹底失去烏克蘭呢個長久盟友,畀俄羅斯喺經濟等層面上面臨一系列嘅困境。 烏克蘭親歐方向已經無法阻止,普京又絕唔可能將克里米亞和烏東部分地區拱手相讓返烏克蘭人。所以筆者認為普京喺未來對烏克蘭嘅問題上,只能繼續僵持下去,甚至會出現 《明斯克協議-加強版I》,《明斯克協議-加強版II》等毫無約束力嘅協議,務求令烏克蘭疲於奔命嘅同時,又可以繼續同化目前畀親俄份子佔領嘅烏東地區,果一帶地區都係走重工業為主。假以時日,對俄國經濟將會起到舉足輕重嘅作用。 講起明斯克,我諗起舊年開始佢哋開放免簽畀西方國家同埋今年會取消同俄羅斯嘅國民自由流動協議。普京喺歐洲真係無咩朋友….   2.經濟問題 承上而言,取得克里米亞嘅同時都畀俄羅斯招致對佢自身經濟不利因素。因此,普京喺連任後應該會繼續致力改善俄國經濟。 其實普京喺過去執政其間已經多次提出俄羅斯經濟要進入世界前五強。佢喺2012年大選中曾經發表多篇有關經濟嘅競選綱領,對俄羅斯未來發展提出美好嘅規劃。 但係六年過去,回顧當時普京提出好多有關經濟領域嘅設想,基本上完全冇實現。 由上年嘅俄國經濟數據可以睇到目前俄羅斯已經喺世界綜合經濟國家中跌出前十,俄羅斯嘅經濟結構都冇好似佢當初所講咁有大幅度嘅轉變。單喺莫斯科嘅高科技產業產值喺俄國GDP中嘅比重並冇明顯提升就可睇得一清二楚,依然單一依賴能源。甚至每次面對西方封鎖,都只會拋出要停止供應天然氣,畀西方國家暫緩部分制裁,完全處於被動狀態。   3.起伏不定嘅英俄關係 「英俄關係,風起雲湧」喺大選前唔夠兩星期內發生兩宗身份敏感嘅俄裔英國公民暗殺事件。 事件引起英國朝野震驚,矛頭直指俄羅斯政府,繼而宣布驅逐23名俄羅斯外交官。俄羅斯稍後宣布驅逐23名英國外交官。呢種你打我一拳我還一下拖嘅風格,絕對合乎俄羅斯人以拳頭解決問題嘅性格。 撇開是次事件,一眾反普力量喺過去都會搵英國尋求政治庇護。而呢班人士經常喺公開場合媽叉普京呢樣果樣。 呢個都係令到英俄關一直處於唔穩定性,而普京或者想更一步穩定自身威權。近期出聲最多嘅俄羅斯官員都係外長拉夫諾夫,相反普京無咩出聲。或者我哋都係要等4月過後,普京坐穩返個位,睇下佢點樣開腔回應。 至於英國入面嘅英格蘭會唔會真係罷賽,我心諗有世界盃唔踢咩,4年一次喎!踢埋先算啦!不過王室唔出席世界盃就真係打破以往慣例。足以見到英國呢次擺明同你俄羅斯玩獲勁!   4.美俄關係嘅穩定性 美俄關係被認為係目前後冷戰時期嘅國際秩序入面不可或缺嘅部分。 但目前美國對俄羅斯嘅敵視態度非常強烈,即使美國總統特朗普想改善同俄羅斯嘅關係,但飽受「通俄門」事件同受到國內反對力量嘅牽制,即使普京採取主動,「侵侵」都只會置之不理,甚至有機會透過目前英俄關係上從中抽水。 而普京若想改善美俄關係,喺切入點上都係無從入手。因為美俄無論喺地緣政治上定係國內政治問題上,都存在住很強烈嘅結構性矛盾。 而喺俄國大選前的一個月,美俄喺敍利亞西北庫德地區爆發自冷戰時期以嚟最大規模嘅軍事衝突。雖然雙方都以冷處理方式應對(美方專注於朝鮮同國內糾紛,俄方專注於3月大選)。 但以俄方「犯我羅剎,雖遠必誅」呢種「自古以來」就存在嘅諗法,絕對唔會就咁罷休。 普京喺過去面對相似事件嘅做法係必定喺適當時機畀對方迎頭痛擊(參考土耳其擊落俄戰機事件)。 但礙於目前形勢,普京會唔會同侵侵找數?仍然有待觀察。因為美俄關係真係牽一髮動全身果隻,唔係講笑。   5.接班人問題 身為強人政治(Strongman)表表者嘅普京緊係唔會驚做一世,但佢都要顧及自身身體狀況。雖然普京已經年過花甲,但身體狀況和精神面貌都係畀人感覺風行草靡。 但強人政治其中一個問題係一但強人落臺或釘蓋後國內局勢會突發性失控。我哋喺過去南斯拉夫嘅鐵托到近期仆街嘅卡達菲同穆加比可以睇得一清二楚。 因此,普京都係時候要考慮一個能與之相比嘅接班人。但以目前俄國政治精英圈子嚟睇,似乎仲未搵到一個新普京。     總括而言,普京連任係意料中事。但喺未來執政中,普京都係會面臨好多喺過去任期所面臨嘅問題。 適逢7月世界盃喺俄羅斯歐洲地區舉行,普京能唔能夠利用呢次國際盛事嘅機會,改善俄國強差人意嘅國際形象呢?參考2014年索契嘅慘痛教訓同俄羅斯嘅治安問題。筆者認為俄國好難借是次國際盛事進行大翻身。 相反,世界盃舉行期間,可能會出現類似2016年歐洲國家盃,俄國球迷襲擊他國球迷事件,令主辦方俄羅斯嘅形象繼續跌無可跌。 但普京大叔從政多年,一直打出令人出乎意料嘅牌數。國民對比返之前嘅葉利欽嘅政績,簡直對普京愛不措手。所以對於呢位政治強人而言,能否見招拆招?我哋拭目以待啦! 作者: William Luk 2018年3月16日 波蘭...

Read More

Pin It on Pinterest