0 Items

Category: 陳浩天

陳浩天:支聯會每年一度嘅「國民教育」晚會

本來筆者都唔打算係六四問題之上多講,因為過往兩三年參與大大小小論壇,發現有關討論已經不斷重覆。不過係六四當日睇見大家嘅討論似乎不得要領,並冇命中支聯會舉辦嘅維園燭光晚會嘅核心問題。支聯會則繼續以唯一嘅「道路、真理、生命」自居,無理咁蔑視以至批評唔參與維園晚會嘅香港人,所以有必要再寫一篇文章解析有關「紀念六四」嘅爭論。 今年有關紀念六四嘅爭論不外乎「建設民主中國是否香港人責任」、「不悼念是否遺忘歷史」、「悼念是否行禮如儀」等等,當然少不免一大堆譴責學生唔去維園嘅言論。其實核心問題就係支聯會將中國民族主義同紀念六四綑綁埋一齊,變相為殖民者效力。支聯會多年來向六四晚會參加者灌輸大中華意識,以中國人嘅身份悼念六四大屠殺,並滲透濃烈嘅愛中國情懷,更可惡嘅係將晚會變相成為選舉活動,真正食人血饅頭! 當紀念唔再係純粹紀念,當紀念變成洗腦大會,當紀念變成選舉活動,香港人唔再參加又有何問題? 試問支聯會又有咩立腳點可以大條道理批評唔參加嘅人? 如果唔去維園晚會就要受批評,即係支聯會強迫香港人認自己係中國人,強迫香港人愛中國,所作所為根本係協助中國殖民香港,與「中國國歌法」、「國民教育」背後意圖同出一轍。 我哋以人權、自由、民主嘅角度去關心或者紀念世界各地嘅民主運動嘅時候,又點解必須要以「作為中國人」、「愛中國」嘅角度去睇中國嘅民主發展呢? 關心、紀念、悼念、聲討都係好事,我哋更唔應該忘記歷史,而問題係香港人關心其他地方嘅民主、人權時,唔應該受中國民族主義洗腦同限制。 陳浩天...

Read More

陳浩天:我們不是暴徒

係韓國電影《華麗的假期》入面,男主角最後一句對白就係:「我們不是暴徒!」。男主角隨即被韓國士兵以自動步槍掃射,因為原則同尊嚴而慘烈犧牲。「華麗的假期」係當年南韓軍方鎮壓光州民主運動嘅行動代號,2007年一部講述1980年光州民主運動嘅電影以呢個行動代號命名。 男主角起初反對自己讀緊高中嘅弟弟參與示威,後來親眼目睹軍方嘅暴力,弟弟亦被軍方射殺,於是拎起武器參與志願軍抵抗軍方。除左以軍隊屠殺市民,韓國政府同一時間以輿論機器不斷將光州民主運動抹黑成「共產主義者煽動嘅暴亂」,將爭取民主嘅市民抹黑成「暴徒」,企圖為暴力鎮壓民主運動製造正當性。 電影臨近尾聲,男主角從市政府大樓逃走,可惜遭到軍隊包圍,軍方發出最後通諜:「暴徒! 立即投降!」。本來男主角可以繳械投降苟且偷生,但佢無法接受大家為左捍衛家園,為左自由民主壯烈犧牲,竟然換來「暴徒」兩個字,於是寧願以死明志,發出最後的吶喊:「我們不是暴徒!」。 今日香港嘅抗爭者面對著同樣嘅打壓,為左自由為左捍衛家園,一方面係街頭被打被鎖,另一方面被抹黑成暴徒破壞社會安寧,最後被政治檢控關進黑獄。我哋依然係監獄外面嘅人,除左要繼承佢哋嘅理念同繼續佢地嘅抗爭之外,更加要還佢哋一個清白,佢哋唔係暴徒。港共、泛民聯同譴責抹黑抗爭者係暴徒,我哋作為戰友一定要為佢哋辯護。我哋唔係暴徒,我哋係捍衛家園追求自由嘅香港人。 陳浩天 香港民族黨召集人 . ....

Read More

台灣將成為中國包圍網嘅重要據點

過往美國相信現代化理論能應用係中國,即中國嘅經濟與社會發展,將帶來中國民主化。加上香港商人係美國發揮影響力積極游說,令美國對中國採取温和包容嘅態度,甚至提供協助,例如幫助中國加入世貿。美國嘅現代化理論同香港泛民嘅建設民主中國一脈相承,香港過往的確係美國倚重嘅一個對中據點。 過往廿幾年,中國雖然係經濟上急速發展,成為世界第二大經濟體,但民主與人權卻不斷倒退,而且向外擴張為世界和平帶來威脅。時至今日,建設民主中國已經被證實為不可能,美國亦不再相信現代化理論能應用在中國。面對中國為世界和平帶來嘅威脅,美國與一眾盟友嘅對中政策自然變為圍堵中國(Containment)。 台灣作為美國盟友,同時因為地緣上與中國相鄰,台灣將會成為堵中基地。近來美國政府嘅人事變動與及係台灣嘅動作就係最好嘅證據。例如美國在台協會大樓耗資四十億美元,並好有可能由美國海軍陸戰隊駐守。新上任嘅美國國家安全委員會高級顧問 John Bolton 以反對一中政策聞名,亦支持台灣加入聯合國,更主張派駐美軍在台守衞第一島鏈。 當中國包圍網漸漸成形,香港人嘅意願又係如何呢? 係參與包圍抑或係被包圍呢? 陳浩天...

Read More

中共從來都冇紅線

「唔好激嬲共產黨」、「唔好畀藉口中共」係泛民左膠社運圈嘅行動綱領,以致泛民左膠一直指責獨立派係「鬼」,為中共進行廿三條本地立法開路,令到香港冇民主。有記者問筆者,以上嘅講法對我係咪一種侮辱,我淡然回答:「係侮辱佢地自己嘅智慧啫。」 中國共產黨成立就快一百年,大量歷史文檔畀我地參考。如果有睇歷史,而頭腦冇俾大中華毒所污染,我地應該好了解中共嘅思維同套路。泛民天真以為只要唔好觸碰共產黨紅線,聽聽話話就會有民主自由人權,實際中共從來都只係諗點樣將香港完全變成中國,並冇所謂紅線或底線。中共嘅紅線只係泛民一廂情願幻想出嚟,「拉一派,打一派」、「團結大多數,打撃一小撮」、逐個擊破先係中共嘅行動原理。 泛民左膠以為香港獨立係中共嘅紅線,只要唔觸碰,甚至係幫手打擊港獨,就會有運行。當獨立派俾中共全力打擊,泛民覺得係我哋踩中共紅線咎由自取,自決派沾沾自喜,以為自己以巧妙企位避過中共嘅封殺。殊不知自決派隨即俾「DQ」冇得選,戴耀庭亦被標籤為港獨,泛民左膠除左高喊冤枉,就只有不斷退縮。 中共從來冇紅線冇底線,所謂紅線只係泛民嘅幻想,反而幫中共將進步派別污名化。如果大家都唔覺得香港獨立係罪名係禁忌,提倡獨立討論獨立又點樣成為「藉口」呢? 陳浩天...

Read More

Pin It on Pinterest