0 Items

Category: 癲狗世界杯手記

2018年俄羅斯世界盃D組:阿根廷首場失利 下場變陣更鋒利

文/William Luk 阿根廷打氣歌:”Vamos, vamos Argentina, Vamo’ a ganar, Vamos vamos Argentina Vamo’ a ganar, Yo te sigo a todas partes a donde vas, Cada vez te quiero mas…” 阿根廷足球代表隊(西班牙文:Selección de fútbol de Argentina) 世界排名:5 教練:森柏奧利( Jorge Sampaoli ) 今屆外圍賽成績:南美區第三名 歷屆出席世界盃決賽週次數:17次(1930年、1938年、1958年、1962年、1966年、1974年至今) 歷屆最佳成績:冠軍(1978年以及1986年) 外圍賽最佳射手:美斯(7球) 今屆訓練基地:布隆尼斯(俄文:Бро́нницы) 阿根廷喺5月14號公佈35人初選名單,並喺同月21號公佈23人大名單。但由於正選門將羅美路(Sergio Romero)因傷退隊,喺23號補入古斯文(Nahuel Guzmán)。 但係去到6月9號,蘭仙尼(Manuel Lanzini)因傷退隊,補入安素‧皮利斯(Enzo Pérez)。今屆阿根廷嘅最終23人先至塵埃落定。 當中有8個球員參加過上屆世盃,8位球員入面又有參加過2014年世盃,其中2位更加參加過2006年世界盃,包括美斯(Lionel Messi)同馬斯查蘭奴(Javier Mascherano),具有豐富大賽經驗。 至於較香港球迷熟悉嘅國際米蘭伊卡迪(Mauro Icardi)以及效力羅馬嘅柏洛迪(Diego Perotti )一同落選今屆23人名單之列。 阿根廷23人大名單如下: 門將:1.古斯文(老虎隊)、12.艾文尼(河床)、23.卡巴耶路(車路士) 後防:2. 加比爾‧梅卡度(西維爾)、3. 泰利亞費高(阿積士)、4.安沙迪(拖連奴)、6.法斯奧(羅馬)、8. 馬高斯‧艾肯拿(士砵亭)、16.盧祖(曼聯)、17.奧達文迪(曼城) 中場: 5.比基利亞(AC米蘭)、7.巴尼加(西維爾)、11.迪馬利亞(巴黎聖日門)、13.美沙(獨立隊)、 14.馬斯查蘭奴(河北華夏幸福)、15.皮利斯(河床)、18. 沙維奧(賓菲加)、20.盧些素(巴黎聖日門)、22. 柏雲(小保加) 前鋒: 9.希古恩(祖雲達斯)、10.美斯(巴塞隆拿) (c)、19.阿古路(曼城)、21.戴巴拿(祖雲達斯) ‧回顧 阿根廷喺近年一直沿用2008年北京奧運金牌嘅「黃金一代」,國民都對佢哋寄予厚望。但近年呢隊阿根廷變做名符其實嘅「亞軍廷」,先喺上屆世盃同大力神盃緣慳一面,再連續痛失兩次美洲國家盃冠軍,導致球隊內部曾經出演大混亂,美斯曾經退出國家隊,加上「黃金一代」逐漸老化,令人覺得呢隊「探戈軍團」未必再有力再度攀上世界巔峰。 其實阿根廷喺今屆南美洲區外圍賽入面係跌跌撞撞,令人擔驚受怕。同2010年外圍賽一樣,佢哋係好驚險嘅情況下先拎到出綫資格。成個外圍賽阿根廷攻守唔平衡,教練保沙(Edgardo Bauza)喺外圍賽尾段畀阿根廷足總解約,由森柏奧利接掌國家隊。最終阿根廷以7勝7和4負,入19球失16球排第三,拎到2018年俄羅斯世界盃決賽週參賽資格。以下係阿根廷今屆世盃外圍賽成績: 阿根廷0:2厄瓜多爾 巴拉圭0:0阿根廷 阿根廷1:1巴西 哥倫比亞0:1阿根廷 智利1:2阿根廷 阿根廷2:0玻利維亞 阿根廷1:0烏拉圭 委內瑞拉2:2阿根廷 秘魯2:2阿根廷 阿根廷0:1巴拉圭 巴西3:0阿根廷 阿根廷3:0哥倫比亞 阿根廷1:0智利 玻利維亞2:0阿根廷 烏拉圭0:0阿根廷 阿根廷1:1委內瑞拉 阿根廷0:0秘魯 厄瓜多爾1:3阿根廷 阿根廷目前正處於一個令人擔憂嘅動盪階段,呢幾年已經換過3位教頭。 現任教頭森柏奧利,喺2017年5月先至上任。呢位阿根廷教頭以往曾經帶領智利喺2015年美洲國家盃決賽互射12碼擊敗阿根廷。喺上季都帶領西甲西維爾拎到聯賽第四名,拎到今季歐聯小組賽參賽資格。 但係,森柏奧利喺呢一年執教阿根廷期間係諸多問題,特別係用人保守,呢點筆者唔多想講,因為呢樣嘢係街知巷聞。喺一系列熱身賽已經見到阿根廷連排陣都係令人費解,正選有近一半球員嘅表現係令人唔可以信服。 ‧球員分析 阿根廷今屆面對一個嚴峻問題– 球員平均年齡偏大,由龍門到前場平均年齡都29.09 歲,呢個情況令人十分擔憂。...

Read More

2018年俄羅斯世界盃C組:「童話王國」丹麥 做隻「黑馬」可以嗎?

文/William Luk & Clara Daugaard (居港丹麥人) 丹麥打氣歌:”Lo, Lo, lo, lo, Lo, lo, lo, lo, lo, lo, lo, lo, lo, Lo, lo, lo, lo, lo, lo, lo, lo, lo, Danmark!” 丹麥足球代表隊(丹麥文:Danmarks fodboldlandshold) 世界排名:12 教練:夏列迪(Åge Hareide) 今屆外圍賽成績:歐洲區外圍賽E組次名(附加賽兩回合5:1擊敗愛爾蘭晉級) 歷屆出席世界盃決賽週次數:5次(1986年、1998年、2002年、2010年以及2018年) 歷屆最佳成績:8強(1998年) 外圍賽最佳射手:基斯甸‧艾歷臣(8球) 今屆訓練基地:卡斯洛達安拿柏(俄文:Ана́па) 筆者無緣份見證「童話王國」丹麥最輝煌時期,好多都係聽啲老波牛口述當年丹麥有幾勁。上世紀90年代係佢哋足球黃金時期,最令香港球迷有印象係1992年歐國盃決賽週,當時因為南斯拉夫爆發內戰,導致南斯拉夫畀FIFA禁止參與所有國際賽事,導致當時外圍賽同南斯拉夫同組嘅丹麥,取代咗呢支歐洲班霸去到瑞典參加歐國盃決賽週。丹麥喺嗰屆表現令人刮目相看,先喺小組賽力壓英格蘭同法國兩支歐洲勁旅晉級4強,再喺互射十二碼淘汰衛冕冠軍荷蘭,殺入決賽。丹麥喺決賽以2:0擊敗德國,拎到丹麥目前唯一一個歐洲國家盃冠軍。 丹麥喺缺席一屆世盃之後,今屆重返世盃決賽週,到底呢支「童話王國」可唔可以再寫下一頁安徒生童話?我哋拭目以待啦! Clara印像中第一次睇丹麥應該係1998年法國世界盃。嗰年Clara仲係小學五年班,佢同老豆一齊去法國現場睇波。第一場就喺8強淘汰賽,一場現實對童話嘅淘汰賽,雖然最後丹麥2:3不敵巴西。但都係呢場比賽,令Clara對自己國家足球開始有所瞭解,起碼都知道勞特立兄弟同大舒米高係邊個先。 Clara因為出嚟做嘢前時間比較充裕,所以最熟悉丹麥嘅係正正係千禧年代,先經歷低谷,再到而家新嘅黃金一代。Clara記得大學有一年去咗香港某間大學做交流生,撞正2010年世界盃日本對丹麥,因為居港丹麥人唔多,所以自己膽粗粗第一次去香港酒吧睇波,不過香港人睇波氣氛真係一般。Clara身邊幫丹麥打氣啲香港人,都係落咗注喺丹麥度,最終丹麥1:3不敵日本,小組賽出局,不過Clara諗返都幾有意思。 丹麥足球喺之前十年出現青黃不接問題,老將一個接一個掛靴,特別係湯馬臣(Jon Dahl Tomasson)嘅退役令Clara感到好傷心。丹麥足球開始蟄伏,隨也有大本的驚世駭俗,但近年北歐國家表現令人歎為觀止,連冰島都威到痺,但係終究未有丹麥份。 最終,艾歷臣健康嘅成長,畀我哋睇到一絲希望,由荷甲到熱刺就能知道佢係一個用腦踢波嘅球員,呢種中場大師嘅氣質,從唔盲目,從唔自大,亦令佢經常為熱刺喺英超賽場作出關鍵性嘅貢獻。當然,近年丹麥青訓出產好多「妖人」,Clara都對丹麥足球未來依然保有希望。今次大炒愛爾蘭5:1殺入世盃決賽週,我呢個丹麥人絕對要歡呼,雀躍同大肆慶祝,莫斯科我哋嚟啦!我都買咗機票同波飛飛去俄羅斯撐丹麥! 丹麥喺5月14號公佈35人大名單,並喺同月27號減到27人。而最終23人大名單喺6月3號正式出爐,有2位球員曾經出席過2010年世界盃決賽週,分別係隊長卡查(Simon Kjær)同老將基域斯(William Kvist)。 由龍門到前鋒都有好多香港球迷熟悉嘅面孔,包括「狐狸」李斯特城門將卡斯柏‧舒米高(Kasper Schmeichel)、車路士中堅安達斯‧基斯坦臣(Andreas Christensen)、雲達不來梅中場湯馬士‧迪蘭尼(Thomas Delaney)、熱刺中場核心艾歷臣(Christian Eriksen)同埋RB萊比錫前鋒尤素夫‧保臣(Yussuf Poulsen)。 但係「Lord賓」賓特拿(Nicklas Bendtner)最後因傷落選,而同「Lord賓」一齊落選嘅仲有效力英冠嘅中堅比蘭特(Andreas Bjelland)。仲有一位球員筆者都想講下,效力西甲切爾達嘅翼鋒丹尼爾·華斯(Daniel Wass)竟然一同落選,呢位右翼喺切爾達交足功課,能傳能射,筆者諗極都唔明點解佢無份入選。 丹麥23人大名單: 門將:1.卡斯柏‧舒米高(李斯特城)、16.約拿斯·羅素(哈特斯菲)、22.費達歷·朗奴(邦比) 後防:3.維斯達加特(慕遜加柏)、4. 卡查 (西維爾)(C)、5.盧特臣(葉士域治)、6.安達斯‧基斯坦臣(車路士)、13.馬菲斯‧佐真臣(哈特斯菲)、14.達斯加特(賓福特), 17.贊斯‧拿臣(烏甸尼斯)  中場:  2.米高‧高朗-達利(拉科魯尼亞)、7.基域斯(哥本哈根)、8.湯馬士‧迪蘭尼(雲達不萊梅)、10.基斯甸‧艾歷臣(熱刺)、18.拿拉加(波爾多)、19.舒安尼(阿積士) 前鋒:  9.佐真遜(飛燕諾)、11.巴拉夫韋迪(波爾多) 、12.杜貝治(阿積士)、15.費舒查(哥本哈根)、20.尤素夫‧保臣(萊比錫)、21.哥尼利奧斯(亞特蘭大)、23.史斯度(切爾達) ‧回顧 丹麥自2010年世盃出局之後,往後喺各項大賽同外圍賽表現都令人失望。執教丹麥15年嘅摩頓·奧臣(Morten Olsen)喺2015年毅然決定離開丹麥,但足見北歐人嗰種耐性係超乎大家想像,唔會亂咁炒教頭。 現任教頭夏列迪喺今屆世界盃外圍賽開始前正式上任,呢位縱橫北歐多年嘅名牌教頭喺世盃外圍賽頭幾場試用唔同陣式,導致丹麥戰績一度未如理想。由於丹麥中堅球員多不勝數,令到夏列迪執教初期經常排出3中堅陣式,導致丹麥經常失波,攻守都顧此失彼。最終夏列迪決定用返結4人防線,喺做返攻守平衡下終於穩返隊波。往後就決定用4-3-3呢個陣容嚟做主打。最終喺外圍賽E組僅次波蘭,壓過黑山以小組次名參加附加賽,以下係丹麥喺今屆世盃外圍賽成績: -歐洲區外圍賽E組: 丹麥1:0亞美尼亞 波蘭3:2丹麥 丹麥0:1黑山 丹麥4:1哈薩克 羅馬利亞0:0丹麥 哈薩克1:3丹麥 丹麥4:0波蘭 亞美尼亞1:4丹麥 黑山0:1丹麥 丹麥1:1羅馬尼亞 -附加賽 丹麥0:0愛爾蘭 愛爾蘭1:5丹麥 (兩回合計5:1愛爾蘭) •主力分析 丹麥首席門將卡斯柏‧舒米高(Kasper Schmeichel),佢正正係代表丹麥出席1998年法國世界盃嘅鋼龍彼得‧舒米高(Peter Schmeichel)嘅大仔。今屆「細米」將會創造世界盃歷史另一個子承父業嘅紀錄,「大米」喺98世盃帶領丹麥殺入8強,最終不敵巴西。今屆世盃「細米」誓要超越老豆,相信好多人都好期待「細米」可唔可以打破老豆當年嘅成績。 細米效力英超李斯特城,擔任「狐狸」正選門將已經有7個球季,先後幫助「李城」拎咗英冠同英超冠軍。佢撲救反應快,封位同佢老豆樣咁勁。 但佢都有一個問題,處理快速長傳落點往往強差人意,而且有時會有啲無厘頭犯錯,呢樣嘢喺佢效力李斯特城期間經常出現。筆者怕佢因為背負住老豆嘅聲望,今屆壓力會好大。 講到丹麥最核心球員,非基斯甸·艾歷臣(Christian Eriksen)莫屬。呢位攻擊中場出身自有「青訓搖籃」之稱既阿積士,喺荷甲效力時一直都有唔少人將佢同兩位阿積士嘅前輩史尼達(Wesley Sneijder)以及雲達華治(Rafael...

Read More

2018年俄羅斯世界盃C組:秘魯首場贏勢輸波 剩低兩場命運如何

文/William Luk 秘魯打氣歌:”Oh vamos Peruanos! Que esta noche, Tenemos que ganar” 秘魯足球代表隊(西班牙文:Selección de fútbol de Perú) 世界排名:11 教練:列卡度‧加利卡(Ricardo Gareca) 今屆外圍賽成績:南美區第五名(洲際附加賽兩回合2:0擊敗紐西蘭晉級) 歷屆出席世界盃決賽週次數:5次(1974年、2006年、2010年、2014年以及2018年) 歷屆最佳成績:8強(1970年以及1978年) 外圍賽最佳射手:古里路& 科利斯(5球) 今屆訓練基地:莫斯科 一講起秘魯,香港人總會諗起馬丘比丘呢個靚爆鏡嘅世界遺產。呢個16世紀南美強國-印加帝國,有住悠久同埋迷一般嘅歷史,亦係1930年第一屆世界盃13支參賽國家之一。筆者相信80-90後嘅球迷一定未見過秘魯踢世界盃決賽週,甚至對呢支國家隊比較陌生。其實,秘魯過去曾經4度打入世盃決賽週,更加喺1970年同1978年兩度殺入8強。最終,呢支「美洲羊駱」喺經歷咗36年嘅等待之後,終於重返世界盃決賽週32強。 秘魯喺5月16號公佈24人名單,並喺5月30號公佈最終名單,但隨後一日又因為古里路停賽緩刑而又暫時擱置。最終,喺6月4號正式公佈今屆世界盃決賽週23人大名單。 而23人大名單入面,當中4位外流歐洲而又出名嘅球員入面,只得效力英超屈福特嘅安達‧卡里路(André Carrillo)以及效力俄超莫斯科火車頭嘅(Jefferson Farfán)較香港球迷認識。 秘魯23人大名單: 門將:1.加列斯(韋拉告魯斯)、12.卡些達(慕尼斯帕爾)、21.卡華路(卡查馬卡大學) 後衛:2.阿拔圖‧洛迪古斯(巴蘭基亞青年)、3. 艾度‧哥素(秘魯體育大學)、4.辛達馬利亞(普巴拉)、5.阿拉烏祖(利馬聯盟)、6.查烏高(法林明高)、15.基斯甸‧拉莫斯(韋拉告魯斯)、17. 路爾斯‧艾雲古拿(普巴拉)、 22.洛約拉(梅爾加)、 中場:7.靴達度(維多利亞)、8.古華(聖保羅)、13.達比亞(飛燕諾)、14.保路(波特蘭伐木者)、16.卡達真拿(韋拉告魯斯)、19. 約斯馬‧約頓(奧蘭多城)、23.阿基諾(普巴拉) 前鋒:9.古里路(法林明高)、10.法芬(莫斯科火車頭)、11. 魯爾‧雷迪亞斯(莫里利亞)、18. 安達‧卡里路(屈福特)、 20.科利斯(阿爾堡) •回顧 今屆秘魯晉級之路係相當崎嶇,因為佢身處列強所以地南美洲賽區。所以,秘魯每屆都要同巴西、智利、阿根廷、烏拉圭同哥倫比亞一眾強敵競爭,但最後奇蹟咁喺今屆外圍賽最後一輪搶到今屆決賽週入場券。而「印加大軍」喺在南美洲外圍賽最後一輪,以1:1逼和哥倫比亞,並乘住智利失分,以得失球差壓過智利排喺第5,拎到洲際附加賽資格,亦都向智利都報咗1998年外圍賽失利嘅一箭之仇。 而喺洲際附加賽,兩回合對大洋洲紐西蘭戰情極為膠著,首回合作客0:0,最後成功喺主場2:0擊敗紐西蘭,晉身今屆世盃決賽週。 另外,都要講講今屆秘魯教頭列卡度‧加利卡(Ricardo Gareca)。呢位阿根廷籍教頭喺2015年接手呢隊「美洲羊駝」,佢帶領呢隻「美洲羊駝」主打南美華麗踢法,並搵古里路同法芬兩個老將「以老帶新」,再加埋團體性夠強,令秘魯可觀性極高。 而值得一提嘅係加利卡同秘魯隊淵源唔淺,早喺1986年西班牙世界盃南美洲區外圍賽,仲係球員嘅加利卡喺對秘魯比賽入面,喺81分鐘嘅入球,間接斷送咗秘魯直接晉級世界盃決賽週嘅機會,令到呢隻羊駝喺往後36年都只可以喺世界盃外圍賽徘徊不斷。不過秘魯喺加利卡領軍下,球隊成績日益進步,最後殺入今屆世盃決賽週。以下係秘魯喺今屆世界盃戰績: -南美洲區外圍 賽 哥倫比亞2:0秘魯 秘魯3:4智利 秘魯1:0烏拉圭 巴西3:0秘魯 秘魯2:2委內瑞拉 烏拉圭1:0秘魯 玻利維亞0:3秘魯 秘魯2:1厄瓜多爾 秘魯2:2阿根廷 智利2:1秘魯 巴拉圭1:4秘魯 秘魯0:2巴西 委內瑞拉2:2秘魯 秘魯2:1烏拉圭 秘魯2:1玻利維亞 厄瓜多爾1:2秘魯 阿根廷0:0秘魯 秘魯1:1哥倫比亞 -洲際附加賽 紐西蘭0:0秘魯 秘魯2:0紐西蘭 •主力分析 34歲隊長古里路(Paolo Guerrero)絕對係今次秘魯晉身世界盃決賽週一大功臣,佢球員最高鋒時期曾經效力德國嘅漢堡。呢位秘魯核心球員頭鎚了得之餘把握力高,經常喺關鍵時刻作出貢獻。但因為先前誤飲含有禁藥提煉物嘅茶葉被FIFA判罰停賽,無得踢今屆世盃。但最後經過上訴同埋各國選手為佢求情之後,暫時獲得FIFA特赦,停賽會喺今屆世盃完結之後執行,直接幫助秘魯打咗一支強心針。 法芬(Jefferson Farfán),相信各位德甲球一定記得呢位33歲球員。佢曾經喺史浩克04效力多年,曾經有好多歐洲豪門想買佢,但佢最後選擇到中東掘金。佢近年去咗俄超,踢莫斯科火車頭。 法芬絕對係踢法全面嘅前場球員,一嚟速度快、二嚟控波好、三嚟罰球技術有料到,是非常好用的球員之一。唯一要擔心係年紀大所帶嚟嘅體能問題。 卡里路(André Carrillo)呢位效力英超屈福特嘅27歲翼鋒,係秘魯今屆世盃一大殺著,皆因呢位球員速度快,控波一流。而且喺屈福特就已經見到佢係一個好積極回防嘅球員。只係略嫌體能一般。 •小組分析 秘魯喺今屆世界盃分組抽籤入面運氣唔錯,因為FIFA排名高,喺抽籤排到第2檔,成功避開咗身處喺第二檔嘅英格蘭、西班牙等列強,同澳洲、丹麥以及冠軍熱門法國同處C組。 筆者本來預計秘魯呢支相隔36年後重返世界盃嘅南美國家隊,絕對會係今屆其中一支「黑馬」。皆因秘魯近況唔錯,而且係南美一隊有素來有良好默契同技術嘅國家,再加埋加利卡調兵遣將能力,絕對係今屆世盃焦點之一。 點知佢哋喺小組首場迎戰丹麥嘅賽事,慘遭滑鐵盧。上半場秘魯全場佔優,一面倒圍攻丹麥。上半場臨完場前,秘魯翼鋒古華(Christian Cueva)喺丹麥禁區入面畀返嚟幫手回防嘅丹麥前鋒保臣踢跌而獲得12碼,但佢親自主射竟然一飛衝天直上看台。 而丹麥最終喺驚濤駭浪之下,由艾歷臣喺下半場發動嘅一次反擊,將波交畀「上半場罪人」保臣射入全場唯一入波,最終以1:0險勝全場圍攻佢哋嘅秘魯。 C組第一輪過後,法國因為得球較佳而暫列榜首,至於丹麥就位居次席,而贏勢輸波嘅秘魯因得失球差唔及澳洲好而暫時敬陪末席。 由第一輪兩場比數同實力嚟睇,法國基本上喺呢組鎖定咗一個出綫名額。而秘魯輸咗一場之後,唯一一個目標自然係博盡餘下兩場,爭取另一個16強出綫名額。由牌面實力嚟睇,最難打嘅自然係法國嗰場。呢隻「美洲羊駝」喺小組賽下一場比賽,將會面對星光熠熠嘅「高盧雄雞」法國,到時秘魯唯一可以用嘅係防反戰術,因為法國都希望頭兩輪全勝,鎖定首名。如果秘魯可以喺法國身上拎到分,咁秘魯可以係小組出綫入面佔返少少甜頭。之但係,最後一場同澳洲嘅比賽都唔易打,話曬澳洲都係喺今屆外圍賽附加賽入面突圍而出嘅國家隊,兩隊可以話係「難兄難弟」。而且一但澳洲第二輪贏咗丹麥,呢場就係兩隊嘅博鎚大戰,兩隊只能活一隊,和波就一齊執行李返屋企。而且對於以華麗技術為主嘅秘魯嚟講,今屆3場小組賽最難打嘅絕對係打身體同體能壓迫嘅澳洲。 總而言之,秘魯最後一輪同澳洲嘅比賽好大機會係五五開,邊個贏晉級機會都好大。其實「羊駝」打「袋鼠」,唔使打都知邊個佔優。當然,贏嗰隊都要寄望下法國可唔可以贏到丹麥。 由以上可見,目前秘魯最大機會C組次名晉級。筆者順便喺度假設,秘魯一但殺入淘汰賽可能遇到嘅對手。假設秘魯最後可以小組次名出綫,咁秘魯好大機會遇上阿根廷。所以,筆者肯定16強已經係呢隊嘅極限,我哋喺小組賽第一場已經見到秘魯把握力好差,一去到淘汰賽又欠缺經驗就真係係咁先。 •秘魯世界盃小組賽賽程表: C 組 6月17號  00:00秘魯VS丹麥  摩度維亞球場  6月21 號 23:00法國VS秘魯   葉卡捷琳堡中央球場 ...

Read More

2018年俄羅斯世界盃C組:「袋鼠軍團」澳洲 前景仲係樂觀

文/William Luk 澳洲著名打氣歌:”Come on Aussie come on, Come on, Come on Aussie come on, Come on..” 澳洲足球代表隊(英文: Australia national soccer team) 世界排名:36 教練:雲馬維克(Bert van Marwijk) 今屆外圍賽成績:亞洲區第三圈B組第三名(附加賽先後擊敗敍利亞同洪都拉斯晉級) 歷屆出席世界盃決賽週次數:5次(1974年、2006年、2010年、2014年以及2018年) 歷屆最佳成績:16強(2006年) 外圍賽最佳射手:卡希爾(11球) 今屆訓練基地:韃靼斯坦共和國喀山 「袋鼠軍團」澳洲地理位置雖然處於大洋洲,但目前係亞洲足協嘅成員國之一。其實過去澳洲曾經隸屬大洋洲足總,但為咗提升國家足球競爭力以及提升直接出綫世界盃嘅機會,於是喺2006年時申請離開轉投亞洲足協,再喺2015年拎到亞洲盃冠軍,令到澳洲成為史無前例成為第一個喺兩個唔同洲際競賽入面拎到冠軍嘅國家。 澳洲喺上兩屆世界盃三戰皆負,但係佢哋喺球場上表現出嘅戰術水平同鬥志堪稱亞洲四隊之首。 今屆俄羅斯世界盃,佢哋嘅小組形勢唔錯,雖然有實力高強嘅法國隊,但秘魯同丹麥喺實力上都稍遜一籌,而且澳洲高Q大棍加壓迫型踢法絕對可以剋死佢哋,所以澳洲如果可以拎出8年前果股氣勢,有機會幫亞洲球隊喺今屆世盃拎到佳績。 澳洲喺奧地利4:0擊敗捷克之後,喺6月3號正式公佈咗2018年俄羅斯世界盃決賽週23人名單。陣中只得5位球員目前效力歐洲頂級聯賽,其中「無業漢」38歲老將卡希爾(Tim Cahill)榜上有名,呢位「四朝元老」連續4屆入選23人名單之餘更有機會連續喺四屆世界盃決賽週取得入球。另外,未滿20歲嘅伊朗裔球員阿沙尼(Daniel Arzani)都入選咗大名單。 但係卡拉錫(Fran Karacic)、杜羅奧斯(James Troisi)、比蘭特(Josh Brillante)以及魯卡維斯亞(Nikita Rudavytsya),呢班澳洲較為著名球員並無入選到今屆23人名單。 澳大利亞世界盃最終23人名單: 守門員: 1. 馬菲·賴恩(白禮頓)、12. 巴特·鍾斯(飛燕諾)、18. 丹尼·胡高域(亨克) 後衛:2.迪根尼克(橫濱水手)、3.美迪列夫(米禾爾)、6.​​祖文(水原三星藍翼)、16.比希治(貝沙)、19.列斯當(西雪梨流浪者)、20.沙恩斯貝利(蘇黎世草蜢) 中場: 5.米利根(阿艾阿里)、10.羅比·告斯(波琴)、8.盧安高(昆士柏流浪)、13.摩爾(哈特斯菲)、15. 積甸拿克(阿士東維拉)(C)、22.艾雲尼(侯城)、23.洛積(些路迪) 前鋒:4.卡希爾(自由身)、7. 馬菲·歷奇(哈化柏林)、9.祖歷(琉森)、11.拿保治(浦和紅鑽)、17. 阿沙尼(墨爾本城)、21.柏達圖斯(紐卡素噴射機)、22. 占美·麥卡倫(達斯泰特) ‧回顧 澳洲喺1974年德國世界杯第一次拎到出席決賽週資格,但喺小組賽以一和兩負成績被淘汰出局,之後經歷一段連續七屆世界杯未能進入會內賽的黑暗期。而澳洲歷屆世盃參賽成績最好係2006年德國世界盃由荷蘭「神奇教頭」希丁克帶領嗰一次,澳洲憑住身材同體能優勢,加埋防守戰術,喺16強鬥到最後一刻先輸畀嗰屆冠軍意大利。 此後,澳洲喺2010年同2014年兩屆世界盃,都係喺小組賽就鎩羽而歸。特別喺上屆世界盃決賽週前夕,澳洲教練普斯迪哥路(Angelos Postecoglou)一直強調「袋鼠軍團」將會以控球同高壓為基礎嘅進攻風格去面對任何對手。 結果,佢將呢套戰術帶到對智利、荷蘭同西班牙嘅比賽入面,結果……澳洲輸到甩轆,慘不容睹,3戰全敗,入3失9,喺B組墊底出局。 澳洲係今屆世界盃最後隊晉級32強嘅國家,過程可以話係一波三折。先喺第2圈輕鬆晉級,然後喺亞洲區第三圈12強B組嘅十場比賽入面雖然只輸一場,取得5勝4和1負成績。但係由2016年底到2017年初嘅四場比賽竟然四連和,最終導致沙地阿拉伯以得失球差壓過澳洲直接出綫,澳洲只可以排喺B組第三,要同A組第三名嘅敘利亞踢兩回合嘅亞洲區附加賽。 而喺亞洲區附加賽入面,首回合雙方喺中立場馬來西亞踢成1:1,次回合返到澳洲,「袋鼠軍團」開賽初段失波之後靠「四朝元老」卡希爾連入兩球,以總比數3:2擊敗敘利亞晉級下一輪跨洲份附加賽。 澳洲喺跨洲份附加賽嘅對手係中北美洲傳統勁旅洪都拉斯,澳洲先喺首回合作客同洪都拉斯踢成0:0,次回合憑住隊長積甸拿克(Mile Jedinak)戴帽以3: 1擊敗對手,終於以總比數3:1拎到今屆世盃決賽週最後一席。但係已經帶領澳洲參加過2014年世界盃決賽週嘅澳洲教練普斯迪哥路卻喺賽後一段時間之後宣佈遲職。 其實普斯迪哥路過去5年對澳洲嘅改造係起到一定效果。首先重新起用曾經效力外國球會嘅球員,且喺澳洲聯賽提拔唔少可造之才,呢一招其實喺2015年亞洲盃已經起到作用,「袋鼠軍團」最終奪取該屆亞洲盃冠軍。而另一方面,普斯迪哥路希望青黃不接近7年嘅澳洲可以逐步年輕化。但同時仍然確立由卡希爾以及積甸拿克呢班具有豐富大賽經驗老將,「以老帶新」去壓陣,令到班新人唔會太怯場。以下係澳洲喺今屆外圍賽成績: -亞洲區第二圈B組: 吉爾吉斯1:2澳洲 澳洲5:0孟加拉 塔吉克0:3澳洲 約旦2:0澳洲 澳洲3:0吉爾吉斯 孟加拉0:4澳洲 澳洲7:0塔吉克 澳洲5:1約旦 -亞洲區第三圈B組: 澳洲2:0伊拉克 阿聯酋0:1澳洲 沙地阿拉伯2:2澳洲 澳洲1:1日本 泰國2:2澳洲 伊拉克1:1澳洲 澳洲2:0阿聯酋 澳洲3:2沙地阿拉伯 日本2:0澳洲 澳洲2:1泰國 -亞洲區附加賽 敍利亞1:1澳洲 澳洲2:1敍利亞 -跨洲份附加賽 洪都拉斯0:0澳洲 澳洲3:1洪都拉斯 (兩回合計3:1) 筆者有啲澳洲老友認為今次換教練係澳洲足球一個分水嶺時刻,因為澳洲終於可以喺世界舞台上再次擺脫咗作為二流足球國家嘅自卑感覺。 而接任嘅荷蘭籍教頭雲馬維克執教風格求穩,者係先求唔失波再講。所以,佢係極鐘意用4-2-3-1陣型,希望做好防守戰術。因為雲馬維克明白,以澳洲目前嘅實力,係連2006年「黃金一代」都不如。如果唔做好全體防守呢個團體戰術,冇可能同目前一眾世界強隊一決生死。 ‧主力分析 32歲老將米利根(Mark Milligan)今屆將會第四度出戰世界盃決賽週,佢嘅角色已經由後生時嘅防守中場轉變成中堅,筆者喺佢效力中超上海申花已經留意過佢,不過表現一直浮浮沉沉。米利根目前效力沙地阿拉伯聯賽班霸艾阿里,並開始慢慢轉型到中堅位置。雖然年紀漸大,已經無咗當年嘅速度同體能。但豐富嘅大賽經驗相信足以彌補到呢一點。 33歲嘅隊長積甸拿克,早年夕夕無名。直到喺2011年轉會到當時英冠嘅水晶宮,開始迎來職業生涯轉捩點,佢以隊長身份帶領球隊成功升上英超聯賽,開始喺球圈漸露頭角。...

Read More

2018年俄羅斯世界盃C組:「高盧雄雞」法國 勢要一騷廿年之癢

文/William Luk & 天叔 法國足球代表隊(法文: Équipe de France de football) 世界排名:7 教練:迪甘斯(Didier Deschamps) 今屆外圍賽成績:歐洲區A組首名 歷屆出席世界盃決賽週次數:15次 (1930年、1934年、1938年、1954年、1958年、1966年、1978年、1982年、1986年、1998年、2002年、2006年、2010年、2014年以及2018年) 歷屆最佳成績:冠軍(1998年) 外圍賽最佳射手:基奧特 & 基斯文(4球) 今屆訓練基地:莫斯科伊斯特拉(Istra) 今晚6點C組將會上演首輪賽事,由法國對陣澳洲。法國喺1998年成功以東道主身份奪取大力神盃,但往後多年法國足球一直浮浮沉沉,至今未嘗一冠。 法國係今屆其中一隊最早宣佈23人名單嘅32強之一,早喺5月17號就公佈今屆俄羅斯世界盃決賽週23人名單。而皮耶(Dimitri Payet)、賓施馬(Karim Benzema)、賓耶達(Wissam Ben Yedder)馬斯亞(Anthony Martial)、拿卡錫迪(Alexandre Lacazette)拉比奧特(Adrien Rabiot)以及京士利·高文(Kingsley Coman)都無入選到今次23人大名單。 法國23人大軍名單: 門將: 1.羅列斯(熱刺)、16.文丹達(馬賽)、23.艾利奧拿(巴黎聖日門) 後衛: 2.柏華特(史特加)、3.甘賓比(巴黎聖日門)、4.華拉尼(皇家馬德里)、5.安迪堤(巴塞隆拿)、17.艾迪‧拉美(馬賽)、19.斯迪比(摩納哥)、21.盧卡斯‧靴南迪斯(馬德里體育會)、2.班捷文·文迪(曼城) 中場: 6.保羅‧普巴(曼聯)、8.湯馬士‧林馬(摩納哥)、12.杜利素(拜仁慕尼黑)、13.簡迪(車路士)、14.馬度迪(祖雲達斯)、15.尼桑斯(西維爾) 前鋒: 7.基斯文(馬德里體育會)、9.基奧特(車路士)、10.基利安‧麥巴比(巴黎聖日門)、11.奧斯文‧丹比利(巴塞隆拿)、18.費基亞(里昂)、20.泰奧雲(馬賽) •回顧 2016年喺全國人民面前痛失歐國盃,或者令到法國上下更有決心去打好今屆世界盃。外圍賽佢哋處於A組,同組較強嘅對手有荷蘭同瑞典。法國喺呢組最終以7勝2和1負,入18球失6球嘅成績首名出綫。兩勝荷蘭絕對係佢哋今屆外圍賽可以首名出綫嘅關鍵,同時亦都將「橙衫軍團」踢出局。 以下係佢地外圍賽嘅成績: 白俄羅斯 0: 0法國 法國 4:1 保加利亞 荷蘭 0:1 法國 法國 2:1 瑞典 盧森堡 1:3 法國 瑞典 2:1 法國 法國 4:0 荷蘭 法國 0:0 盧森堡 保加利亞 0:1 法國 法國 2:1 白俄羅斯 -教練 迪甘斯,由2012年7月已經開始帶領法國隊,到而家已經接近六個年頭,上屆世界盃在八強敗予當屆冠軍德國,而歐國盃更打入決賽,表現可說是不過不失。其實近幾年,法國隊可以講係有點「幸福嘅煩惱」。繼「89黃金一代」後,近幾年不斷湧現有潛力嘅新人,配以原有班底,可以話係法國近年穩步上揚嘅主因。而今屆嘅點兵,基本上佢都以球員嘅狀態先行,放棄喺曼聯表演時好時壞嘅馬斯亞(Anthony Martial)以及有「契仔」之稱嘅梅沙‧施素高(Moussa Sissoko)等。 踢法上,迪甘斯都偏好使用4-4-2陣式,基奧特同基斯文可以話佢嘅陣中必然正選。不過筆者個人覺得迪甘斯嘅戰術咁多年嚟頗為單一,有時候過份依賴基奧特呢類柱躉中鋒為其他球員開路,當基奧特唔喺陣時,其他前鋒球員就變成各有各踢,只靠個人能力搵食。而面對一啲防守性強,「泊大巴」嘅球隊更加苦無對策,好似喺外圍賽入面,法國主場都曾經俾所謂嘅「魚腩」盧森堡逼和0:0,即管睇下迪甘斯喺今屆比賽會唔會有啲咩新嘅招數啦。 •主力分析 -門將 守門員黎講,羅列斯(Hugo Lloris)反應算快,但見佢今屆喺熱刺,偶然也會有啲大意失誤,而且一直畀人嘅感覺無咩霸氣,壓唔到場。所以,始終唔能夠將佢同紐亞以及迪基亞呢啲一級門將相提並論。不過作為法國隊隊長,羅列斯就一定係必然正選。 筆者相信同上屆一樣,兩位後備門將文丹達(Steve Mandanda)同艾利奧拿(Alphonse Areola) 都應該無咩機會落場予。 -後衛 唔知係咪法國隊班中堅有啲黑仔,上個大賽有華拉尼(Raphaël Varane)因傷缺陣,今次就到阿仙奴隊長高斯尼(Laurent Koscielny)緣盡世盃。 不過唔緊要,法國有嘅係人材,效力巴塞嘅安迪堤(Samuel Umtiti)呢兩年表現一直穩步上揚,已經成為巴塞絕對正選,預計佢將會拍住皇馬嘅華拉尼為法國扼守中路。呢兩位中堅有身形,有速度,法國隊嘅球迷基本上都唔需要太擔心。 至於左閘人選方面,可能係法國隊其中一個值得討論嘅位置。喺近兩年嘅外圍賽,左閘正選大多數時間由巴黎聖日耳門嘅古沙華出任正選,可惜季尾大部分時間受傷,最後都無份去俄羅斯。 而今次兩位有份入選嘅左閘球員分別係文迪(Benjamin Mendy)同盧卡斯‧靴南迪斯(Lucas Hernández)。文迪季前以破紀錄轉會費加盟曼城,可惜開季無耐就因為十字韌帶重創而長抖,直到4月尾先復出。而盧卡斯‧靴南迪斯,雖然佢最佳位置應該係中堅,但因為左腳仔嘅關係,好多時都被安排出任左閘,今季幫助馬體會贏得歐霸盃冠軍。雖然盧卡斯‧靴南迪斯今年3月先第一次入選法國大國腳,但始乎佢穩健嘅作風都深得迪甘斯愛戴,相信佢打正選嘅機會比長抖完嘅文迪高。 -中場 一對中場中,天叔預計會由普巴(Paul Pogba)同簡迪(N’Golo Kanté)出任正選。普巴今季喺曼聯嘅表演時好時壞,亦都曾經被曼聯領隊摩連奴眨為後備,今季歐聯16強對西維爾次回合仲試過傳出一腳超垃圾傳波,令佢近期被日本傳入香港嘅「佛系文化」惡搞一輪。...

Read More

Pin It on Pinterest