Category: 32強逐個睇

文/William Luk & Cham 比利時足球代表隊 (法文：Équipe de Belgique de football/德文：Belgische Fußballnationalmannschaft/荷蘭文：Belgisch voetbalelftal) 世界排名：3 教練：馬天尼斯(Roberto Martínez) 今屆外圍賽成績：歐洲區H組首名 出席世界盃決賽週次數：13次 (1930年、1934年、1938年、1954年、1970年、1982年、1986年、1990年、1994年、1998年、2002年、2014年以及2018年) 歷屆最佳成績：殿軍 (1986年) 外圍賽最佳射手：盧卡古(11球) 今屆訓練基地：莫斯科 歐洲「紅魔鬼」比利時喺5月21號公佈28人初選名單，最終喺6月4號公佈最終23人大名單。 23人大名單中入面有15位球員參加過2014年巴西世界盃，具有相當豐富嘅大賽經驗。 另外，名單入面有好多香港球迷耳熟能詳嘅球員，包括門將古圖奧斯(Thibaut Courtois)、中堅華美倫(Thomas Vermaelen)、維頓漢(Jan Vertonghen)同艾達韋列特(Toby Alderweireld)，中場維素(Axel Witsel)、迪布尼(Kevin De Bruyne)、費蘭尼(Marouane Fellaini)、夏薩特(Eden Hazard)同埋前鋒盧卡古(Romelu Lukaku)。但效力水晶宮嘅賓迪基(Christian Beneteke)就落選大名單，佢喺今季其實表現唔錯，幫助水晶宮護級成功。另外，今季長期受傷嘅甘賓尼(Vincent Kompany)仍然在陣。 比利時23人大名單： 門將： 1. 古圖奧斯 (車路士)、12.米奴列 (利物浦)、13. 卡斯迪爾斯(禾夫斯堡) 後衛： 2.艾達韋列特 (熱刺) 3.華美倫 (巴塞隆拿)、4.甘賓尼 (曼城)、5.維頓漢 (熱刺)、 15.蒙尼亞 (巴黎聖日門)、20.保耶達 (些路迪) 中場： 6.維素 (天津權建)、7.迪布尼 (曼城)、8.費蘭尼 (曼聯), 10.夏薩特(車路士)(C)、11.卡拉斯高 (大連一方)、16.杜根‧夏薩特  (慕遜加柏)、14.梅頓斯(拿玻里)、17.泰文文斯 (摩納哥)、18.贊奴沙 (皇家蘇斯達)、19.丹比利 (熱刺)、23.丹當斯卡 (安德烈治) 前鋒： 9. 盧卡古 (曼聯)、21.巴舒亞伊 (多蒙特)、22.沙迪利 (西布朗) •回顧 馬天尼斯喺2016年8月被任命為比利時教練，之前執教比利時4年嘅馬克·韋莫斯(Marc Wilmots)因為「紅魔鬼」喺2016年歐國盃表現不濟而被炒魷。 馬天尼斯所帶領嘅比利時喺成個世界盃外圍賽係輕鬆過關，10戰9贏1和入43球失6球。 但考慮到目前「紅魔鬼」目前嘅實力，出綫係意料中事。但其實比利時足總任命對西班牙籍嘅馬天尼斯被當時比利時上下批評，特別係佢他之前執教愛華頓極度失敗，但成個外圍賽令到大家睇到佢點樣善用每一位黃金時代嘅球員。以下係比利時今屆世盃外圍賽成績： 塞浦路斯0：3比利時 比利時4：0波斯尼亞 直布羅陀0：6比利時 比利時8：1愛沙尼亞 比利時1：1希臘 愛沙尼亞0：2比利時 比利時9：0直布羅陀 希臘1：2比利時 波斯尼亞3：4比利時 比利時4：0塞浦路斯 •今屆世盃之路 今屆比利時抽籤運氣唔錯，令人羨慕。佢哋被分到G組，同組對手有英格蘭、巴拿馬同突尼西亞。以實力計，除咗英格蘭之外，基本上另外兩隊都無可能威脅到比利時。而頭兩場比賽比利時都輕鬆過關，場場開大。 去到第三輪對英格蘭嘅比賽，筆者原以為出盡副選嘅比利時會以和波次名出綫為目標，因為比利時賽前同英格蘭同分兼同樣得失球差，加上公平競技分低過英格蘭。所以，只要呢場和波拎次名，就可以避開上綫法國、巴西、葡萄牙、烏拉圭等具實力嘅國家隊。 但人算不如天算，比利時一眾後備球員表現出色，最終憑住贊奴沙(Adnan Januzaj)喺下半場嘅入波，以1：0擊敗同樣出副選嘅英格蘭。最終，英格蘭走綫成功，比利時落入上線，將要面對一系列挑戰。 此外，喺分組賽3場比賽入面，因為國家隊之間實力過於懸殊，教練馬天尼斯試過起用唔同球員去試陣，為淘汰賽做準備，正正係呢類試陣，令到比利時可以喺8強同16強闖關成功。 值得一提係，第二前鋒巴舒亞伊(Michy Batshuayi)嘅級數已經係分組賽表露無遺，前線無咗盧卡古，比利時如失一臂。所以，盧卡古必定會係今屆比利時餘下賽事成為比利時不可或缺嘅前鋒球員。 比利時係今屆世盃淘汰賽頭2場可以用有驚無險嚟形容。首先，佢哋喺16強對日本嘅比賽有驚無險以3：2反勝呢支亞洲勁旅。其實呢場比賽日本嘅前場壓迫戰術導致比利時中場無法組織之外，教練馬天尼斯排陣都有問題，特別係卡拉斯高嘅位置，上半場已經表露無遺，「應交唔交，應射唔射」，完全拖慢晒比利時嘅快速進攻套路。 最終，喺下半場中段落後兩球嘅情況下，馬天尼斯當機立斷，即時收起今場表現平平嘅美頓斯同卡拉斯高，換入制空能力極強嘅費蘭尼同埋速度型嘅沙迪利(Nacer Chadli)，令到比利時嘅高空轟炸戰術即時立竿見影。 最後，憑住後備入替嘅沙迪利喺下半場加時最後一分鐘射入奠定勝局嘅一球，而呢個入球大家可以留意一下盧卡古嘅走位，佢嘅跑位拉空咗日本防線，導致後上嘅沙迪利有機可乘。...

文/William Luk & Derrick Tam 日本足球代表隊(日文：サッカー日本代表) 世界排名：61 教練：西野朗(Akira Nishino) 今屆外圍賽成績：亞洲區第三圈B組首名 出席世界盃決賽週次數：6次(1998年、2002年、2006年、2010年、2014年以及2018年) 歷屆最佳成績：16強(2002年& 2010年) 外圍賽最佳射手：本田圭佑(7球) 今屆訓練基地：喀山   日本喺5月18號公佈今屆世盃27人初選名單。直到5月31號正式公佈23人大名單。今屆23人中日本徵召咗15名效力海外聯賽球員，當中有香港球迷最為熟悉嘅本田圭佑同埋香川真司。但喺日職表現出色嘅三竿健鬥、青山敏弘同埋井手口陽介以及23歲超新星淺野拓磨都落選最終23人大名單。 另外，23人大名單入面有11位球員參加過2014年巴西世界盃，當中有6位球員更參加過2010年南非世界盃，具有相當豐富嘅大賽經驗。 日本23人大名單： 門將： 1.川島永嗣(梅斯)、12.東口順昭(大阪飛腳)、23.中村航輔(柏雷素爾) 後衛： 2.植田直通(鹿島鹿角)、3.昌子源(鹿島鹿角)、5.長友佑都(加拉塔沙雷)、6.遠藤航(浦和紅鑽)、19.酒井宏樹(馬賽) 、20.槙野智章(浦和紅鑽)、21.酒井高德(漢堡)、22.吉田麻也(修咸頓) 中場： 4.本田圭佑(帕丘卡)、7.柴崎岳(基達菲)、8.原口元氣(杜塞爾多夫)、10.香川真司(多特蒙德)、11.宇佐美貴史(杜塞爾多夫) 、14.乾貴士(艾巴)、 16.山口螢(大阪櫻花)、17.長谷部誠(法蘭克福)(C)、18.大島僚太(川崎前鋒) 前鋒： 9.岡崎慎司(李斯特城)、13.武藤嘉紀(緬因斯)、15.大迫勇也(科隆) •回顧 日本隊喺亞洲絕對係列強，不過一去到世界盃呢類大賽，除咗2002年同2010年小組出線16強，其餘幾屆都未能小組出線。特別係上屆，表現令人失望，球隊內鬨係導致上屆日本失敗嘅主因。 4年後呢支「藍武士」捲土重來，先喺亞洲區外圍賽第二圈E組以8戰7勝1和入27球0失球嘅佳績殺入第三圈12強。再喺第三圈B組以10戰6勝2和2負入17球失7球嘅成績，力壓沙地同澳洲以小組首名晉身2018年俄羅斯世界盃決賽週。 但今屆日本隊面臨年紀偏大問題(平均年紀為28.26)，而且喺世界杯開賽之前嘅4月將教頭夏利荷錫(Vahid Halilhodžić)突然解僱，導致國家隊喺磨合時間少咗以及軍心不穩。有傳夏利荷錫被炒原因係控制唔到更衣室班球員，但新帥西野朗就可以憑住自己人嘅優勢喺一定程度上舒緩呢個問題，以下係日本喺今屆世盃外圍賽成績： -亞洲區外圍賽第二圈E組： 日本0：0星加坡 日本3：0柬埔寨 阿富汗0：6日本 敍利亞0：3日本 星加坡0：3日本 柬埔寨0：2日本 日本5：0阿富汗 日本5：0敍利亞 -亞洲區外圍賽第三圈B組： 日本1：2阿聯酋 泰國0：2日本 日本2：1伊拉克 澳洲1：1日本 日本2：1沙地阿拉伯 阿聯酋0：2日本 日本4：0泰國 伊拉克1：1日本 日本2：0澳洲 沙地阿拉伯1：0日本 •球員分析 隊長長谷部誠、龍門川島永嗣、左閘長友佑都、中堅吉田麻也、中場乾貴士、香川真司、本田圭佑同埋前鋒岡崎慎司。呢班主力今年都年過29歲，如無意外今屆會是他們最後一屆世界盃，他們的戰意絕對不用質疑。本田圭佑今屆能入選大名單，外界普遍認為佢逼走前教練哈利洛域，而哈利的愛將久保裕都正正同本田類似，今屆本田會點樣證明自己？而其他老將又會如何發揮？如何以老帶幼？呢個係今屆日本最大看點。 川島永嗣喺2010年南非世界盃決賽週正式坐正，協助國家隊殺入16強，最終互射12碼不敵巴拉圭。其後川島開始佢嘅留歐生涯，先後到比利時、蘇格蘭同法國聯賽效力。 用神經刀去形容川島永嗣係最貼切不過，呢位35歲門將雖然一直係「藍武士」嘅正選門將，經常有啲無厘頭犯錯，但又成日做出一啲神級撲救。相信今屆會係川島最後一次以球員身份參加世界盃決賽週，希望佢唔好派「膠」就得。 -後防 吉田麻也身高達到1米89，係日本近年罕見嘅高大中堅。佢目前效力英超修咸頓，佢唔單止可以踢中堅，仲可以擔當右閘。呢兩點正正係佢可以成為唯一一個可以喺英超立足嘅日本人的。 吉田喺英超累積嘅經驗令佢有住一定嘅高空能力，喺對澳洲嘅外圍賽就正正係吉田幫助國家隊頂住澳洲嘅高空轟炸。另外，佢長傳好耍家，係防反戰術嘅重要成員。 長友佑都係近年日本最出色嘅右閘球員，2010年南非世界盃嘅出色表現令佢開始流歐生涯。喺國際米蘭效力期間一直係球隊主力球員，雖然已經31歲，但仍然係一位當打球員。 長友佑都作為一個閘位球員，擁有跑唔完嘅體能同埋一定嘅後上能力，佢可以成場比賽不斷來回奔跑，喺國米效力嗰時佢就經常後上助攻。而且佢左右腳都耍家，令到佢可以勝任左右兩個閘位，令到球隊係調動用人上面可以更為靈活。 至於中場方面，可以話係日本最具份量嘅位置，包括香川真司、本田圭佑同埋隊長長谷部誠呢班外流兵悉數入選。 留歐10年嘅本田圭佑今季已經加盟墨西哥帕丘卡，雖然聯賽實力自然無意甲咁好，但佢上陣29場攻入10球。過去佢效力過俄超班霸中央陸軍同埋意甲AC米蘭，係日本近年好出色嘅球員之一。 本田最煞食係佢嘅罰球同角球能力，筆者喺2010年世盃就識過佢嘅罰球功架。不過上屆世盃日本成績不濟，其中一個原因係球員集體不滿本田喺更衣室扮大佬，特別喺日本人圈子，本田一定要放低「大哥」心態，先可以帶領日本走得更遠。 香川真司，呢位出身自大阪櫻花嘅進攻中場，過去喺多蒙特表現搶眼，幫助「蜜蜂軍團」拎過2011-12德甲雙冠王。及後加盟英超豪門曼聯，幫助「紅魔鬼」拎過英超同社區盾冠軍。但近季香川喺曼聯回流多蒙特之後表現一般，一直未能搵返昔日頂尖狀態。 所以好多球迷都話香川巔峰期已過，但筆者認為香川喺日本仍然係超班。佢盤扭技術一流，加上傳球視野唔錯，絕對係日本進攻發電力。只係筆者擔心香川嘅體能，事關香川嘅體能喺咁多年一直係佢無法有所突破嘅關鍵。 身高只有1米69嘅乾貴士係日本中場其中一個主力球員，佢同時可以兼任左中場同翼位。近年喺德甲同西甲嘅經驗令佢唔會怯場。 乾貴士雖然入球數字一直唔多，但射門技術一流。而且喺盤扭、反應同埋速度都係頂級​​行列。日本要爭取入波，乾貴士會係其中一個關鍵，而筆者相信再配合埋長友佑都嘅後上助攻，乾貴士將會有更大嘅空間發揮。 今屆日本3位鋒線球員都係效力海外聯賽，包括世盃結束後會由德甲科隆轉會到雲達不萊梅嘅大迫勇也、德甲緬恩斯嘅武藤嘉紀同埋英超李斯特城嘅岡崎慎司。 今屆世盃由於岡崎慎司有傷在身，相信大迫勇也絕對會擔當日本主力前鋒。 呢位28歲前鋒近年喺德甲發展不俗，近年喺科隆雖然唔算得上絕對主力球員，但偶有佳作，上季最後一場對緬因斯嘅比場，正正大迫勇也入波幫助科隆鎖定聯賽第五名，直接殺入今季歐霸盃分組賽。雖然科隆今季最終不幸降班收場，但大迫上陣25場入4球，以亞洲球員嚟講算係唔錯。 大迫無咩方面係突出，但相對2位前鋒係狀態比較穩定嘅一位，再加埋喺德國學到嘅團隊合作，令佢可以更服從教練西野朗嘅指示。 •世盃分析 今屆H組堪稱係另類嘅「死亡之組」，4支國家隊包括日本、波蘭、塞內加爾以及哥倫比亞實力比較平均。而且呢組係唯一一隊無冠軍國家隊嘅小組。另外，各隊都有重心球員，從而形成類似今屆A組嘅局面，四隊國家隊都有機會殺入16強。 首輪日本開波就用十二碼先開記錄，及後憑住打多一人嘅情況下，最終以2：1擊敗哥倫比亞。呢次勝仗亦都係首次有亞洲球隊喺世盃決賽週擊敗南美洲球隊。次輪日本喺2度落後情況下，2：2迫和塞內加爾，日本得4分兼贏根據黃牌數量計算嘅「公平競技」，暫處H組榜首。 去到H組最後一輪比賽，出綫形勢已經比一清二楚。首先第一種子波蘭兩連敗，成為第一支出局嘅第一種子。而日本係最後一輪，將對戰波蘭隊。當時拎到4分嘅日本隊基本上只要和波，就可以「坐山觀虎鬥」睇住拎4分嘅塞內加爾同埋3分在手嘅哥倫比亞殊死一搏。 最終，日本隊0：1不敵已經提前出局嘅波蘭，雖然「藍武士」喺比賽尾段Hea踢態度令好多球迷失望，但同組哥倫比亞1：0小勝塞內加爾，賽後日本同塞內加爾同樣4分，而且得失球同對賽成績都係打和，最終日本以「公平競技」上騎過塞內加爾。導致日本以小組第二身份，喺時隔4年後再次闖入16強淘汰賽。另外，日本都係今屆第四檔種子入面唯一一支出綫國家隊。 日本喺16強將會遇上奪冠熱門比利時，佢哋對上一次喺世盃決賽週對決已經係2002年嘅日韓世界盃。當時雙方打成2：2平手。不過今次對決雙方實力差天共地，如果日本可以做到90分鐘不失，相信一眾國民已經好滿意。其實喺對波蘭嗰場比賽已經見到，日本球員身型輸蝕，對歐洲球隊真係無咩章法。 •日本世界盃小組賽賽程表： H組 6月19號20 :00哥倫比亞VS日本摩度維亞球場 6月25號02:00 波蘭VS 哥倫比亞喀山球場 6月28號20:00日本VS波蘭伏爾哥格勒球場 •世盃小組賽首輪對哥倫比亞陣容(4-2-3-1) ： 門將：川島永嗣 後防：長友佑都，昌子源，吉田麻也，酒井宏樹 防中：柴崎岳、長谷部誠 前場：乾貴士，香川真司，原口元氣 前鋒：大迫勇也 全民俾LIKE 人人「些牙」！ ...

文/William Luk 塞內加爾足球代表隊(法文：Équipe du Sénégal de football) 世界排名：27 教練：阿利奧‧施斯(Aliou Cissé) 今屆外圍賽成績：非洲區外圍賽第三圈D組首名 歷屆出席世界盃決賽週次數：2次 (2002年 & 2018年) 歷屆最佳成績：8強 (2002年) 外圍賽最佳射手：沙高、文尼 & 尼度耶(2球) 今屆訓練基地：卡盧加(俄文：Калуга) 塞內加爾足球代表隊 (法文：Équipe du Sénégal de football) 非洲「黑馬」塞內加爾係今屆其中一支最早公佈23人大名單嘅32強之一，早喺5月17號佢哋就對外公佈23人大名單。但喺6月17號，沙利奧‧施斯(Saliou )因傷退隊，由後備球員麥賓治(Adama Mbengue)頂替。 塞內加爾23人大名單 ： 門將： 1.阿卜杜拉耶‧迪亞路(雷恩)、16.卡甸‧尼迪亞耶(自由報競技) 、22.艾費特‧高美斯(史帕爾) 後衛： 2.麥賓治 (卡昂)、3.高列巴利 (拿破里)、4.麥保積 (安德列治)、6.沙利夫‧辛尼 (漢諾威) 、21. 加沙馬 (阿拉尼亞體育)、22. 華基 (歐本)、12. 沙巴利 (波爾多) 中場： 5.I.古耶 (愛華頓) 、8.高耶迪 (韋斯咸)、11.尼度耶 (伯明翰)、13.艾費特‧尼度耶 (狼隊)、17.巴度‧尼迪亞耶 (史篤城) 前鋒 7.蘇維 (貝沙)、9.馬美迪奧夫 (史篤城)、10.沙迪奧文尼 (利物浦)、14. 干拿迪 (亞眠)、15.迪亞法沙高 (雷恩)、18. 伊斯美拿‧沙亞 (雷恩)、19.麥巴耶‧尼安 (拖連奴)、20. 基達巴迪 (摩納哥) 非洲代表塞內加爾有大量海外兵，有9位球員喺海外出世。首先，後防坐擁拿破里中堅高列巴利(Kalidou Koulibaly)，而5位入選中場球員悉數效力英超同埋英冠，另外前線更有利物浦前鋒沙迪奧·文尼(Sadio Mané)，亦有不少其他响英超、法甲、意甲搵食嘅球員，實力不容忽視，至於會否好似近年黑馬冰島咁突破重圍，令人拭目以待！ 塞內加爾上次亮相世盃決賽週係2002年日韓世界盃，當時係佢哋首次庭加。呢支非洲「黑馬」喺揭幕戰1:0擊敗衛冕冠軍法國，再喺16強以2：1淘汰當時實力雄厚嘅瑞典隊晉級到8強。但佢哋喺8強畀另一支「黑馬」土耳其淘汰，但好多香港球迷仍然記得呢支非洲「黑馬」。而往後23名大名單嘅球員，好多都去咗歐洲搵食，例如達奧夫(El Hadji Diouf)。 而現時塞內加爾教頭係42歲嘅阿利奧‧施斯，佢喺球員生涯就以隊長身份帶領塞內加爾參加過2002年日韓世界盃。退役之後喺2012年開始擔任塞內加爾U23助理教練，並一年後成為主教練，對現時呢班球員瞭如指掌。直到2015年，施斯正式成為塞內加爾主教練。及後喺2017年非洲盃，佢帶領塞內加爾打入8強，喺短短2年就有咁嘅成績已經令人喜出望外。 成個外圍賽塞內加爾都係用4-3-3陣式，意味住「特蘭加雄獅」係主打進攻戰術，雖然陣中冇一位前鋒可以攻入超過兩球，但幾乎每位前場球員都至少入到一球，反映前線競爭激烈同埋唔係主打一人核心。最終塞內加爾喺非洲區第三圈外圍賽D組入6戰4勝2和入10球失3球嘅成績，殺入今屆世盃決賽週，而施斯都成為目前少數既踢過世界杯又以教練身份參加世盃決賽週嘅人。以下係塞內加爾今屆世盃戰績： -外圍賽非洲區第2圈： 馬達加斯加2：2塞內加爾 塞內加爾3：0馬達加斯加 -外圍賽非洲區第3圈D組： 塞內加爾2：0佛得角 塞內加爾0：0布基納法索 布基納法索2：2塞內加爾 佛得角0：2塞內加爾 南非0：2塞內加爾* 塞內加爾2：1南非 *重賽 •陣中主力 年僅26歲嘅沙迪奧‧文尼，早年喺奧地利班霸薩爾斯堡紅牛出道，幫助球隊連續兩季拎到奧地利聯賽同埋盃賽「雙冠王」，佢嘅出色表現好快吸引到歐洲主首聯賽球隊注意。 隨後文尼加盟英超球隊修咸頓，喺為「聖人」效力嘅第一個球季，呢位非洲快馬就為修咸頓攻入10球。最令筆者印象深刻係喺2015年5月16號對阿士東維拉嘅比賽，佢喺開賽初段僅僅用咗唔洗3分鐘就上演「帽子戲法」，打破咗英超一個最快戴帽紀錄。而呢一季修咸頓表現出色，曾經長期佔據聯賽第2位，但最終板凳深度唔夠，過完英超快車就表現下滑，但最後都拎到個歐霸盃參賽席位。 目前文尼效力緊英超豪門利物浦，呢位快馬目前喺利物浦同埃及沙拿(Mohamed Salah)以及巴西費明奴(Roberto Firmino)組成歐洲最強「進攻三叉戟」。文尼憑住佢出色嘅爆發力、身體對抗同埋射門能力，令到佢成為目前歐洲當紅翼鋒之一。筆者相信佢會好影響塞內加爾喺今屆世盃嘅表現。 •塞內加爾世界盃小組賽賽程表： H 組 6月19號 23:00 波蘭 VS...

文/William Luk 哥倫比亞足球代表隊 (西班牙文：Selección de fútbol de Colombia) 世界排名：16 教練：荷西‧柏卡文 (José Pékerman） 今屆外圍賽成績：南美區第四名 歷屆出席世界盃決賽週次數：6次 (1962年、1990年、1994年、1998年、2014年以及2018年) 歷屆最佳成績：8強 (2014年) 外圍賽最佳射手：菲臘比‧卡些度(7球) 今屆訓練基地：韃靼斯坦共和國上烏斯隆斯基(俄文：Верхнеусло́нский райо́н). 南美洲代表哥倫比亞係近年世界球壇其中一隊「黑馬」，愈嚟愈多球員喺歐洲大球會效力，實力自然比上屆更強。筆者相信今屆哥倫比亞目標至少都要同上屆一樣，殺入八強。上屆一個J.洛迪古斯就風魔萬千少女，今屆又會有咩賣點呢??? 哥倫比亞喺5月14號公佈35人初選名單，並喺同月21號公佈23人大名單。但喺6月9號因為後防主力左閘法巴拉(Frank Fabra) 膝頭韌帶撕裂，而補上迪亞斯(Farid Díaz)。 今屆23人名單有9位球員參加過上屆世界盃決賽週。另外有13位球員目前效力歐洲頂級聯賽，包括巴卡(Carlos Bacca)、奧斯賓拿(David Ospina)、戴雲遜·山齊士(Davinson Sanchez)、伊斯基亞度(Jose Izquierdo )、 J.洛迪古斯(James Rodriguez) 、古亞達度(Juan Cuadrado) 以及法卡奧(Radamel Falcao)。 23人大名單： 門將： 1.奧斯賓拿 (阿仙奴)、12.卡美路‧華加斯 (卡利體育)、22.費南度‧古亞達度 (卡爾達斯) 後衛： 2.薩柏達 (AC米蘭)、3.梅里路 (帕丘卡)、4.艾利亞斯 (PSV燕豪芬)、13. 耶利‧米拿 (巴塞隆拿)、17.摩希卡 (基朗拿)、18.迪亞斯 (巴拉圭奧林比亞) 、23. 戴雲遜·山齊士 (熱刺) 中場：5.巴利奧斯 (小保加)、6.卡洛士‧山齊士 (費倫天拿)、8.阿古拿 (卡利體育)、10.J.洛迪古斯 (拜仁慕尼黑)、11.古亞達度 (祖雲達斯)、16.拿馬 (利雲特) 、20.昆迪路 (河床)、 前鋒： 7.巴卡 (維拉利爾)、9.法卡奧 (摩納哥)(C)、14.梅利爾 (西維爾)、19.保查 (彭美拉斯)、21.伊斯基亞度 (白禮頓) •回顧 哥倫比亞喺上屆世界盃發揮出色，雖然缺少咗因傷缺陣嘅頭號球星法卡奧，不過仍然憑住新星J.洛迪古斯嘅神勇發揮，幫助「咖啡農」喺世界盃決賽週有所突破，成功打入8強。上屆J.洛迪古斯射入5球，成為上屆世盃神射手，大放異彩後，畀西甲豪門皇馬簽入其下。 如今4年過去，J.洛迪古斯已經離開皇馬，雖然目前效力拜仁嘅J.洛迪古斯依然稱得上係頂級球星之一，不過遠遠未達到眾人期望。 哥倫比亞喺今屆南美洲外圍賽戰績遜於預期，雖然可以連續兩屆晉身世盃決賽週。但到最後一輪以一分力壓秘魯同智利拎到第四名最後一個直接出線席位，以18戰7勝6和5負，入21球失19球嘅成績，直接晉身今屆世盃決賽週。 哥倫比亞現任教頭係柏克曼，呢位原阿根廷籍教頭之前已經入籍哥倫比亞。佢過往帶領過阿根廷參加2005年洲際盃同2006年德國世界盃決賽週，當中喺世盃6：0大炒塞黑係佢嘅代表作。不過柏克曼喺8強對東道主德國嘅比賽調動失誤，導致阿根廷最終落敗告終。隨後柏克曼都因此辭職。 柏克曼喺之後幾年執教過2隊墨西哥球隊，就休息咗接近3年，直到2012年開始執起哥倫比亞教鞭。呢位中場出身嘅教頭，非常注重中場控制力，加上過去十年哥倫比亞出現一班實力雄厚嘅中場人員，非常適合以4-2-3-1作為常規陣容，同柏克曼戰術理念不謀而合，令佢帶領哥倫比亞可以更加得心應手。不過老實講，「咖啡農」喺今屆外圍賽嘅表現同埋成績真係冇咩說服力。以下係哥倫比亞今屆世盃外圍賽成績： 哥倫比亞2：0秘魯 烏拉圭3：0哥倫比亞 智利1：1哥倫比亞 哥倫比亞0：1阿根廷 玻利維亞2：3哥倫比亞 哥倫比亞3：1厄瓜多爾 哥倫比亞2：0委內瑞拉 巴西2：1哥倫比亞 巴拉圭0：1哥倫比亞 哥倫比亞2：2烏拉圭 哥倫比亞0：0智利 阿根廷3：0哥倫比亞 哥倫比亞1：0玻利維亞 厄瓜多爾0：2哥倫比亞 委內瑞拉0：0哥倫比亞 哥倫比亞1：1巴西 哥倫比亞1：2巴拉圭 秘魯1：1哥倫比亞 •主力分析 今屆哥倫比亞後防人員變動極大。首先，老將耶比斯(Mario Yepes)早已掛靴，而上屆正選柏保路·艾美路 (Pablo...

文/William Luk 克羅地亞打氣歌:”Bježite ljudi, bježite iz grada, stiže ekipa pijana, Bježite ljudi dok postoji nada, jer ovdije igra HRVATSKA, Ale-ale ale-ale ale-ale…”   克羅地亞足球代表隊(克羅地亞文：Hrvatska nogometna reprezentacija) 世界排名：20 教練：達歷(Zlatko Dalić） 今屆外圍賽成績：歐洲區I組次名(附加賽兩回合4：1擊敗希臘) 歷屆出席世界盃決賽週次數：5次(1998年、2002年、2006年、2014年以及2018年) 歷屆最佳成績：季軍(1998年) 外圍賽最佳射手：文素基治(5球) 今屆訓練基地：列寧格勒州盧仙拿(俄文：Ро́щино) 克羅地亞喺上世紀90年代南斯拉夫解體之後獨立成國，喺獨立唔夠10年就打入1998年法國世界盃決賽週，並且一嗚驚人。喺名宿比拉斯域(Miroslav Blažević)帶領下，「格仔軍團」第一次打入世界盃決賽週就拎到季軍，但之後都無辦法拎到啲咩更好成績。 當年呢班克羅地亞「黃金一代」至今都令人懷念，包括蘇加 (Davor Šuker)、史米 (Dario Šimić)、華奧域 (Goran Vlaović) 、杜陀 (Igor Tudor)、羅拔·贊尼 (Robert Jarni) 、比歷 (Slaven Bilić)、波班 (Zvonimir Boban)、蘇度 (Zvonimir Soldo)、史坦歷 (Mario Stanić)、史迪馬 (Igor Štimac)、阿辛奴域 (Aljoša Asanović) 、普辛尼基 (Robert Prosinečki)。呢班名宿今日喺歐洲球壇都有一定嘅影響力。 筆者遺憾1998年世界盃決賽週仲係幼稚園學生，已經對呢啲嘢感到好矇矓。我只係記得碧咸畀人紅牌趕出場嗰一幕。去到2002年世盃，克羅地亞都打入32強，但喺小組賽表現飄忽，將次名出綫席位拱手相讓畀意大利(不過諗返都好彩，如果唔係好多球迷會話當年克羅地亞淘汰賽畀人黑哨黑走)。之後接近5年，克羅地亞一直處於青黃不接嘅階段。直到2008年歐國盃，呢隊「格仔軍團」又再度重現喺觀眾眼前，嗰屆8強同土耳其上演咗一次「過山車式」嘅加時賽，筆者至今歷歷在目，隨住近年呢班克羅地亞80後喺歐洲主流聯賽踢得風生水起，筆者自己都去過克羅地亞睇波，發覺呢個國家啲人對足球真係好執着。 「格仔軍團」克羅地亞喺5月14號公佈今屆俄羅斯世界盃決賽週32人初選名單，並喺同月21號減到24人。而最終23人名單喺6月4號公佈。 呢23人名單入面無咩太大驚喜，因為當中大部分球員對香港球迷呢嚟並唔陌生。包括摩迪 (Luka Modric)，拉傑迪 (Ivan Rakitic)，佩利錫 (Ivan Perisic)以及文素基治 (Mario Mandzukic)，甚至英超球會利物浦嘅中堅路夫雲(Dejan Lovren)都入選23人大名單。而一啲效力過英超嘅球員，包括哥路卡 (Vedran Corluka)以及卡拉馬歷 (Andrej Kramaric )都悉數入選。 順帶一提，23人大軍入面有13位球員參加過上屆巴西世界盃，具有豐富大賽經驗。 克羅地亞23人大名單： 門將： 1.利華高域(薩格勒布戴拿模)、 12. L.卡連歷(真特)、23.蘇巴錫 (摩納哥) 後防： 2.維沙積高(馬德里體育會)、3.史捷歷(森多利亞)、5.哥路卡(莫斯科火車頭)、6.路夫雲(利物浦)、13.謝華積(利華古遜)、15.卡列達卡(薩爾斯堡紅牛)、21.維達(比錫達斯)、22.比華歷(基輔戴拿模) 中場:  7.拉傑迪(巴塞隆拿)、8.高華錫(皇家馬德里)、10.莫迪(皇家馬德里)(C)、11.保素域(國際米蘭)、14.巴拉達歷(列積卡)、19.巴迪積(費倫天拿) 前鋒:  4.佩利鍚(國際米蘭)、 9.卡拉馬歷(賀芬咸)、*16.卡連歷(AC米蘭)、 17.文素基治(祖雲達斯) 、18.列比治(法蘭克福)、20.比查卡(史浩克04) *卡連歷因為喺6月17號對陣尼日尼亞嘅比賽拒絕後備身份入場，被領隊達歷直接踢出23人名單。 ‧回顧...