0 Items

Category: 32強逐個睇

2018年俄羅斯世界盃D組:「超霸鷹」尼日利亞 中前場絕對夠殺

文/William Luk 尼日利亞足球代表隊(英文:Nigeria national football team) 世界排名:48 教練: 格諾特·路亞(Gernot Rohr) 今屆外圍賽成績:非洲區第三圈B組首名 出席世界盃決賽週次數:6次(1994年、1998年、2002年、2010年、2014年以及2018年) 歷屆最佳成績:16強(1994年、1998年以及2014年) 外圍賽最佳射手:米基爾、伊禾比& 伊恩拿祖(2球) 今屆訓練基地:葉先圖基(俄文:Ессентуки́) 講起尼日利亞,好多香港球迷會即時聯想起1998年法國世界盃。呢支以1996年亞特蘭大奧運會金牌成員為主力嘅「超霸鷹」喺當時有一班「黃金一代」球員,包括隊長奧高查(Austin Okocha)、芬尼迪(Finidi George)、簡奴(Nwankwo Kanu )、奧利殊(Sunday Oliseh)、威斯(Taribo West)同埋伊比巴(Victor Ikpeba)。 尼日利亞喺5月14號公佈30人初選名單。並喺5月27號因為摩西斯‧西蒙(Moses Simon)大髀受傷退隊而減至29人。隨後喺25號將名單減到25人,而最終名單喺6月3號公佈。 今屆世盃尼日利亞23人名單入面有好多香港球迷認識嘅球員,當中以中前場為甚,包括梅沙(Ahmed Musa)、尼迪迪(Wilfred Ndidi)、米基爾(John Obi Mikel)、恩哈路(Odion Ighalo)、摩西斯(Victor Moses)同伊恩拿祖(Kelechi Iheanacho)。 尼日利亞23人名單如下: 門將: 1.伊辛華(安耶巴)、16.艾比爾(茨普帕聯)、23.烏素荷(拉科魯尼亞) 後防: 2.伊度胡(阿馬卡)、3.艾治積利(色格拉布魯日)、5.威廉‧杜路斯-伊干(貝沙)、6.巴路根(白禮頓)、12.阿卜杜拉‧施胡(貝沙)、20.艾華施安(南特)、21.伊布希(ADO海牙)、22.奧美羅(卡森柏沙) 中場: 4.尼迪迪(李斯特城)、8.伊迪保(拉斯彭馬斯)、10.米基爾(天津泰達)(C)、17.安拿斯(特拉布宗)、15.祖爾‧奧比(拖連奴)、19.約翰‧奧古(別是巴工人), 前鋒: 7.梅沙(中央陸軍)、9.恩哈路(長春亞泰)、11.摩西斯(車路士)、13.施美(克羅托尼)、14.伊恩拿祖(李斯特城)、18.伊禾比(阿仙奴) •回顧 尼日利亞係近屆世界盃決賽週嘅常客。呢支非洲「超霸鷹」喺世盃決賽週表現出色,其中喺1994年美國世盃決賽週16強,如果唔係臨完場前派膠,一早踢咗該屆亞軍意大利出局。 今屆外圍賽開始前,尼日利亞喺2014年之後已經換咗5位教頭,其實近10年尼日利亞嘅中前場人強馬壯,但後防一直弱雞到無眼睇,上屆世盃唔係後防差可能可以更進一步入到16強。而且,非洲球隊一直存在嘅各打各問題,都係佢哋一直喺國際大賽拎唔到好成績嘅原因之一。 最終,尼日利亞足總委任德國籍教練路亞成為「超霸鷹」教頭,而對上一位外籍教頭已經係10年嘅德國名宿福士(Hans Hubert Vogts)。由於路亞球員生涯司職後防,加上德國民族嘅紀律性。終於解到咗尼日尼亞纏繞多年嘅防守問題。 最終「超霸鷹」係做到攻守平衡,加上近年出產一班效力歐洲頂級聯賽嘅中前場球員嘅情況下,喺非洲區外圍賽第3區B組以6戰4勝1和1負,入11球失6球成績位處榜首,力壓喀麥隆同阿爾及利亞呢兩支傳統勁旅,殺入今屆世界盃32強。以下係尼日利亞今屆世盃外圍賽戰績: -非洲區第2圈: 斯威士蘭0:0尼日利亞 尼日利亞2:0斯威士蘭 兩回合計2:0晉級 -非洲區第3圈B組: 贊比亞1:2尼日利亞 尼日利亞3:1阿爾及利亞 尼日利亞4:0喀麥隆 喀麥隆:1尼日利亞 尼日利亞1: 0贊比亞 阿爾及利亞3:0尼日利亞* *賽果本來係1:1,但尼日利亞派咗唔合資格球員上場,畀FIFA判罰0:3輸波 •主力分析 今屆世盃我哋再見唔到門神安耶馬(Vincent Enyeama),取而代之嘅係年僅19歲嘅小將烏素荷(Francis Uzoho)。呢位小將效力西班牙拉科魯尼亞,喺上年10月以18歲又352日成為西甲最年輕正選門將。佢反應極大,而且封位一流,絕對係一個可造之材。 拉科魯尼亞來季會降落西乙,相信烏素荷如果喺今次世盃有好表現,唔愁無一個「新東家」。 巴路根(Leon Balogun),爸爸係尼日利亞人,媽咪係德國人。呢位將喺來季效力英超白禮頓嘅中路守將係今屆尼日利亞嘅後防重心。 巴路根身高達1米9,重88公斤。身體強壯,攔截率高,加上廣闊嘅制空能力,面對一啲擅長高空轟炸嘅國家隊,巴路根必定為「超霸鷹」挺身而出。不過呢位29歲中堅控球能力方面較弱,喺效力德甲緬恩斯期間都試過出現一啲「蝦祿」鏡頭。 現時效力中超天津泰達嘅尼日利亞隊長米基爾喺初出茅廬嗰時曾經引起英超曼聯同車路士兩支豪門你爭我奪。雖然呢位中場球員生涯履歷表閃閃發亮,拎過兩屆英超同聯賽盃冠軍、4奪足總盃、仲有社區盾、歐聯同歐霸盃各1次。但米基爾其實一一個問題多多嘅中場球員。 筆者平心而論,米基爾防守一直唔錯,而傳球成功率一直亦能保持85%或者以上,但佢經常喺關鍵時刻犯錯,加上進攻能力欠佳,一直未能喺車路士中場企穩陣腳。但佢已經算係近年尼日利亞最出色嘅中場,相信佢嘅防守能力可以減輕尼日利亞嘅後防壓力。 現年27歲嘅前鋒摩西斯效力英超豪門車路士,其實佢細個父母遇交通意外身亡,之後就去咗英國申請政治庇護,並被寄養喺劍橋郡其中一個小鎮嘅普通家庭入面。喺求學其間開始足球生涯。 摩西斯除咗前鋒之外都名以勝任邊路位置,呢位尼日利亞球員以速度聞名,佢嘅巨大優勢在於肯同對方閘位近距離嘅埋身肉搏以及願意做非洲球員少見嘅個人突破,經常有一啲令人大跌眼鏡嘅靚傳波。不過摩西斯間中又會派下「膠」,相信好多車迷會明筆者講緊乜。 梅沙,呢位曾經效力英超「黑馬」李斯特城嘅球員,曾經被人寄予厚望,但上季喺球會表現一般,更被外借返去前球會俄超中央陸軍。 梅沙擁有飛快嘅速度,加埋摩西斯絕對係尼日利亞打反攻嘅最佳利器。 目前效力阿仙奴嘅伊禾比係今屆尼日利亞前場主力球員之一,擁有雙重國籍嘅佢曾經幫過英格蘭U18上陣,但之後佢決定為「超霸鷹」效力。而值得一提係伊禾比叔叔就係尼日利亞上世紀90年代名宿奧高查(Augustine Okocha)。 呢位年僅22歲嘅翼鋒出身自英超阿仙奴青訓系統,近年成為啱啱離任嘅前教頭雲加嘅愛將,上陣機會多不勝數,令佢閱讀大賽能力不斷增加。 伊禾比喺今屆世盃外圍賽佢上場四次就射2球,幫助國家隊晉身今屆俄羅斯決賽週。佢有一定嘅控球技術同埋傳波能力,可以幫助「超霸鷹」前場帶來更多威脅同創造力。 •小組分析 今屆尼日利亞籤運一般,編入D組,其中同阿根廷再度喺小組賽狹路相逢,同組仲有新丁冰島同埋克羅地亞。 筆者預計尼日利亞喺D組可以力爭次名。首先,「超霸鷹」係非洲一支老牌強隊,加上近年有唔少高質素嘅年輕球員湧現,今屆23人大名單比起前幾屆相對好好多。而且尼日利亞大賽經驗豐富,喺過去5屆參加世盃賽事入面,雖然只都係16強行人止步,但佢係某幾場嘅爆發力仍然令到全球球迷目瞪口呆。 但始終非洲國家隊存在獎金,欠缺紀律性等問題,亦都係非洲國家隊喺世盃表現欠缺穩定嘅主原。不過世盃開賽前,尼日利亞已經同呢班球員達成獎金協議,相信有助提升隊內士氣。 但首場對克羅地亞,上半場佢哋最弱嘅後防線已經頂唔到對手進攻,先由防中伊迪保(Oghenekaro Etebo)自擺烏龍。再喺下半場再輸一球12碼,最以0:2落敗。 呢場敗仗主要歸究於排陣問題,前場恩哈路獨力難支表現低迷,而且要唔擅攻嘅米基爾擔任進攻中場,筆者已經覺得匪夷所思,。另外,教練路亞臨場反應慢,要去到下半場中段先換入梅沙同伊恩拿祖加強攻力,已經係為時已晚。 筆者睇完尼日利亞首場比賽之後,原本估計佢哋今次好難再喺小組賽中殺出重圍。點知第二輪同冰島嘅交鋒,尼日利亞竟然打出漂亮一仗,喺上半場捱打嘅情況下,憑住下半場兩次反擊,由梅沙個人梅開二度,以2:0擊敗冰島,重燃出綫希望。 呢場比賽尼日利亞贏在肯變陣,起用3-5-2陣式,將米基爾退後一格打返防中,再由尼迪迪同伊迪保兩人幫手掃波,從而加強中場控制。同埋冰島有主力受傷,令整體戰術大受影響。另外,冰島可能喺對阿根廷嗰場比賽博到盡,成隊波體能喺下半場尾段係完場跟唔上尼日利亞嘅快速節奏,令到梅沙同摩西斯喺前場如入無人之境。 由於尼日利亞喺上場成功碎「冰」,已經拎咗小組出綫主動權,不過同時救咗阿根廷一命。筆者喺度作個假設,今晚尼日利亞對阿根廷只要贏波或者和波而冰島失分,咁佢哋會以小組次名出綫16強。而「超霸鷹」喺16強好大機會會對C組兼上屆16強對手法國,相信要再進一步,恐怕難如登天。 講返今晚場波,尼日利亞喺歷史上同阿根廷交戰過7次,其中喺世界盃決賽週交戰過4次,阿根廷4戰全勝佔據絕對優勢。不過以阿根廷而家嘅團隊士氣,尼日利亞絕對有力創造歷史新一頁,喺世界決賽週上第一次擊敗南美洲球隊。 值得一提係,上屆世盃兩隊都係同處一組,當時阿根廷以3:2擊敗尼日利亞(Link: https://www.youtube.com/watch?v=9-8_rM9WcS8),兩隊一齊攜手出戰16強。但今屆兩隊只能活一隊,甚至有機會和波齊齊出局,鹿死誰手,今晚就一清二楚。 •尼日利亞世界盃小組賽賽程表: D  組 6 月1...

Read More

2018年俄羅斯世界盃H組:無奈嘅利雲 無奈嘅波蘭

文/William Luk 波蘭足球代表隊(波蘭文:Reprezentacja Polski w piłce nożnej) 世界排名:8 教練:阿當‧拿華爾卡(Adam Nawałka) 今屆外圍賽成績:歐洲區E組首名 出席世界盃決賽週次數:8次(1938年、1974年、1978年、1982年、1986年、2002年、2006年以及2018年) 歷屆最佳成績:季軍(1974年& 1982年) 外圍賽最佳射手:利雲度夫斯基(16球) 今屆訓練基地:索契 波蘭係近年歐洲足壇一次異軍突起嘅國家隊,近5-6年出產好多出色球員,效力歐洲各大頂尖聯賽。其實早喺上個世紀70-80年代,呢支「東歐鐵騎」係歐洲一支勁旅,曾經喺世界盃決賽週屢創佳績,並打入4強。 筆者3月喺波蘭逗留咗一個禮拜,同啲當地人去到邊講波經講到邊,由老到幼,每一個國民都對自己國家隊有好大嘅期望。畢竟呢班黃金一代令到頹咗廿幾年嘅波蘭人見到一絲曙光,有啲甚至緊握拳頭同我講,我哋要喺淘汰賽對德國或者俄羅斯(因為歷史原因,波蘭人好憎德國同俄羅斯),然後擊敗佢哋。 波蘭喺5月11號公佈今屆世盃決賽週35人初選名單,去到18號再減到32人。最終23人大名單喺6月4號公佈。 波蘭23人大名單: 門將: 1.施捷斯尼(祖雲達斯)、12.比亞爾高夫斯基(葉士域治)、23.法比安斯基(史雲斯)、 後防: 2.柏斯丹(華沙歷基亞)、3.積達薛斯克(華沙歷基亞)、4.施安尼克(史帕爾)、5.比特拿歷克(修咸頓) 、15.基歷(摩納哥)、18.比利斯恩斯基(森多利亞)、20比斯錫(多蒙特) 中場: 6.高拉爾斯基(盧多格德斯)、8.連尼提(森多利亞)、10.基祖華克(西布朗)、11.高斯基(侯城)、13 .賴布斯(莫斯科火車頭)、16.巴錫高夫斯基(禾夫斯堡)、17.比斯高(格但斯克萊酣基亞)、19.施連斯基(拿玻里)、 21.古沙華(戈爾尼克) 前鋒: 7.米歷克(拿玻里)、9.利雲度夫斯基(拜仁慕尼黑) 、14.泰奧多斯克(安德烈治) 、23.高拿基(森多利亞) 今屆23人名單入面有15位球員參加過2016年歐國盃,有一定嘅大賽經驗。名單入面有唔少香港球迷較為熟悉嘅球員,包括門將施捷斯尼(Wojciech Szczęsny)、巴鍚高夫斯基(Jakub Błaszczykowski)以及拜仁神鋒利雲度夫斯基(Robert Lewandowski)。 但後防中堅主力基歷(Kamil Glik),喺早前訓練玩倒勾落地整親膊頭,缺少呢個主力中堅對波蘭嚟講會係災難性打擊,但佢仍然喺23人大名單。 •回顧 自千禧年起,波蘭喺任何國際大賽決賽週都喺小組賽行人止步,一直都被人認為係陪跑份子。時任教頭拿華爾卡喺2013年起執教呢支「波蘭鐵騎」,呢位波蘭教頭喺球員生涯正正代表過波蘭參加1978年世界盃,幫助波蘭拎到季軍。 呢個中場出身嘅教頭用人得宜,做到攻守平衡,解決咗波蘭過去十幾年攻唔到守唔穩嘅問題,再加上波蘭80後「黃金一代」嘅崛起,國家隊成績突飛猛進,喺2016年歐國盃終於出人頭地,先喺小組賽一場不敗突圍而出,最終只係喺8強互射12碼輸畀該屆冠軍葡萄牙。 今屆波蘭喺外圍賽身處I組,同組實力較強嘅只有丹麥同黑山。最終波蘭喺教練拿華爾卡帶領下,喺I組過5關斬6將,最終以8勝1和1負入28球失14球嘅成績位處榜首,闊別十二年之後再一次殺入世界盃決賽週。以下係波蘭今屆世盃外圍賽成績: 哈薩克2:2波蘭 波蘭3:2丹麥 波蘭2:1亞美尼亞 羅馬尼亞0:3 黑山1:2波蘭 波蘭3:1羅馬尼亞 丹麥4:0波蘭 波蘭3:0哈薩克 亞美尼亞1:6波蘭 波蘭4:2黑山 •球員分析 今屆波蘭主力陣容同2年前變化唔大,球員又有多幾年時間夾,團隊發揮應更為流暢。 然而,筆者喺今屆外圍賽睇到波蘭幾個問題,首先係波蘭喺戰術、排陣同用人上面似乎無咩新鮮感,下下都係搵利雲,其他球員都唔多肯跑動。 其次係波蘭前場火力猛,但後防唔夠穩。波蘭成個外圍賽入28球但係失14球,比2-4名嘅國家隊都要多2-6球,唔係利雲度夫斯基撐起前場,波蘭未必可以力壓丹麥首名出綫。 最後,波蘭面對主力球員年紀偏大,今屆球員平均年齡係27.91歲,筆者好擔心佢哋喺下半場中後段會攻守失衡。 門將只係會喺施捷斯尼同法比安斯基(Łukasz Fabiański)2揀一。而後防如果基歷克無傷一定會搵佢拍返柏斯丹(Michał Pazdan),中場基祖華克主力負責掃波,但佢過去一季由法甲巴黎聖日門外借到英超西布朗嘅表現平平無奇,球隊最後都降班收場。至於前鋒方面預計會用返2016年歐國盃同今屆外圍賽嘅米歷克(Arkadiusz Milik)以及利雲度夫斯基。米歷克(Arkadiusz Milik)喺前場作用係牽制對方防守球員,幫利雲度夫斯基拉開空位射門。 32歲嘅中場巴鍚高夫斯基以往喺德甲多蒙特係球隊絕對主力。佢嘅能傳能射、突破力同速度亦都造就咗利雲度夫斯基。但近年隨著年紀漸大,Kuba嘅傷患問題日益嚴重,自從離開多蒙特之後,狀態一直都起伏不定。 今季佢只喺德甲禾夫斯堡上陣9場,入波同助攻都不復當年勇。雖然Kuba回塘已成事實,但佢豐富嘅大賽經驗以及同利雲默契依然存在,令佢喺波蘭地位顯得相對重要。 利雲度夫斯基(Robert Lewandowski)係目前球壇公認嘅神射手之一,呢位效力拜仁慕尼黑嘅前鋒都係今屆世界盃外圍賽嘅神射手,一共射入15球。 呢位波蘭近年最出色前鋒嘅特點係把握力強,有一定嘅制空能力。筆者最記得佢以前效力多蒙特嗰時,佢試過喺歐聯淘汰賽4強對皇馬大四喜,幫助多蒙特殺入歐聯決賽。 利雲球員生涯榮譽無數,唯獨從來未喺國際賽場上證明到自己嘅能力,呢個相信同佢國家隊球員能力有關。 •小組分析 好多球迷都估唔到波蘭會係今屆世界盃決賽週嘅一號種籽國家隊(因為FIFA排名高)。但係波蘭今屆籤運一般,被分到H組。同組有亞洲嘅日本、非洲嘅塞內加爾以及南美洲嘅哥倫比亞。4隊賽力相近被公認為今屆世盃其中一組最難估計嘅小組。 值得興幸嘅係波蘭先苦後甜,喺小組賽賽程入面,波蘭會先對上同組兩隊最強對手塞內加爾以及哥倫比亞,最後先打日本。 但呢支「波蘭鐵騎」喺首場對塞內加爾嘅表現令人失望,全場比賽送咗兩份大禮畀塞內加爾,首先係上半場中堅施安尼克(Thiago Cionek)擺老烏,下半場門將施捷斯尼出迎踢空氣,令球隊當時落後至0:2,就算基祖華克喺尾段入波,波蘭最終都係1:2輸畀塞內加爾。與此同時,塞內加爾拎到今屆非洲隊第一場勝仗,捍衛到非洲足球榮譽。 其實,賽前好多球迷都認為擁有利雲度夫斯基嘅波蘭整體實力高於對手,但要大家要明白呢隊塞內加爾嘅主力球員,除咗門將尼迪亞耶(Khadim N’Diaye)同右閘華基(Moussa Wagué)之外,其他九人全部踢緊歐洲五大聯賽,所以講佢哋係一支「魚腩部隊」係絕對錯誤,甚至可以話塞內加爾係今屆世界盃決賽週5支非洲球隊入面最勁嘅一隊。 筆者對於波蘭第一場比賽有以下評價,攻守不穩,中前後場斷晒節,而且踢法粗糙了,加上一系列低級失誤,完全唔似一支歐洲強隊,如果閣下有睇成場比賽會發覺呢支「波蘭鐵騎」喺戰術同控制場面對比塞內加爾差幾班。不過,筆者都要講返句公道說話,今場波蘭後防無咗主力中堅基歷克,後防實力真係低咗幾班。 今場對哥倫比亞,波蘭許勝許和不許敗。因為日本同塞內加爾打成2:2平手,波蘭呢場和波,喺尾場贏日本仲有出綫希望,一但輸波就係咁先。而呢代波蘭「黃金一代」相信就要同大家講聲再見。 •波蘭世界盃小組賽賽程表: H組 6月19號23:00波蘭VS 塞內加爾 莫斯科斯巴達球場 6月25號02:00 波蘭VS 哥倫比亞 喀山球場 6月28號20:00日本VS波蘭  伏爾哥格勒球場 •世盃小組賽首輪對塞內加爾陣容(4-5-1) : 門將:施捷斯尼 後防:比斯錫,施安尼克,柏斯丹,賴布斯 中場:巴錫高夫斯基,基祖華克,施連斯基,高斯基 前場:米歷克...

Read More

2018年俄羅斯世界盃G組:世盃新丁巴拿馬 零的突破可以嗎?

文/William Luk 巴拿馬足球代表隊(西班牙文:Selección de fútbol de Panamá) 世界排名:55 教練:靴南‧達裡奧‧高美斯(Hernán Darío Gómez) 今屆外圍賽成績:中北美洲第5圈第三名 出席世界盃決賽週次數:1次(2018年) 外圍賽最佳射手:加比爾‧托利斯(3球) 今屆訓練基地:莫爾多瓦共和國沙蘭斯克(俄文:Сара́нск) 喺巴拿馬拎到今屆世界盃決賽週入場券之前,大部分香港球迷對巴拿馬嘅認知,僅限於以前中學讀書聽過下嘅「巴拿馬運河」(Canal de Panamá)。礙於呢次「運河之隊」實力有限,想要喺俄羅斯做隻「攔路虎」並唔容易。 巴拿馬喺5月14號就公佈咗35人初選名單,並喺5月30號公佈23人大名單,算係32強入面比較早公佈23人大名單嘅國家隊。但6月6號,主力球員艾拔圖‧昆達路(Alberto Quintero)因退隊,由列卡度‧艾維拿(Ricardo Ávila)補上。 香港球迷對巴拿馬23人名單無一個會熟悉。今屆巴拿馬23大名單入面有眾多球員效力喺海外聯賽,而美洲地區嘅聯賽係巴拿馬嘅大本營,有6位球員效力緊美職,當中有4位係後防球員,而效力喺西雅圖海灣嘅中堅隊長路文‧托里斯(Roman Torres)係巴拿馬多年嚟嘅防線核心,相信一眾海外球員會成為巴拿馬嘅後防力量。 門將: 1.彭尼度(布加勒斯特戴拿模)、12.荷西‧卡達朗(大學體育聯盟)、22.阿歷斯‧洛迪古斯(聖芳濟各) 後防: 2.米高‧梅利路(紐約紅牛)、3.夏路特‧甘明斯(聖荷西地震)、4.費迪爾‧艾斯高巴(紐約紅牛)、5.洛文‧托利斯(西雅圖超音速)、13.艾度科‧馬查度(侯斯頓戴拿模)、15.艾歷克‧戴維斯(多瑙斯特雷達)、17.路爾斯‧艾華利(洪都拉斯奧林比亞)、23.菲臘比‧巴盧伊(市政) 中場: 6.加比爾‧高美斯(布卡拉曼加競技)、8.巴斯拿斯(塔帕丘拉)、11.艾文度‧谷巴(智利大學)、14.比文泰爾(艾馬多)、19.列卡度‧艾維拿(秘魯體育大學)、20.哥度伊(聖荷西地震)、21.荷西‧路爾斯‧洛迪古斯(真特) 前鋒: 7.巴拉斯‧佩雷斯(市政)、 9.加比爾‧托利斯(侯治柏度)、10.伊斯馬耶‧迪亞斯、 (拉科魯尼亞B隊)、16.阿羅約(阿拉祖蘭斯)、18.路爾斯‧迪查達(體育生) • 回顧 其實巴拿馬上屆世盃外圍賽都差啲出到綫,但係喺關鍵一輪2:3不敵美國,而且有2個失波都係喺下半場加時所失,最終同巴西世盃決賽週刷身而過。 時任教練兼巴拿馬名宿祖利奧華迪斯(Julio Dely Valdés)被炒魷魚,順帶一提,華迪斯球員生涯效力過多間歐洲球會,包括意甲嘅卡利亞裡、法甲嘅巴黎聖日門以及西甲嘅馬拉加。 今屆佢哋喺哥倫比亞籍教練靴南‧高美斯帶領下捲土重來,高美斯球員生涯司職防守中場,曾經效力過國內兩支班霸麥迪連獨立同埋國民競技。正因為佢係防守球員出身,所以佢加強咗巴拿馬成隊嘅整體防守。 好多球迷會認為巴拿馬作為中北美洲一個人口小國,經濟低迷同治安差劣,加上從來無出產過任何世界級球星,點解可以打到入世界盃決賽週?筆者想講嘅係佢哋勝在夠穩定同發揮到教練指定嘅團體戰術。今屆世盃,已經見到團體戰優勝於個人主義。 而且近年巴拿馬喺中北美洲戰績表炳,先喺2013年僅負美國0:1拎到美洲金盃亞軍、再喺2015年拎到美洲金盃季軍以及喺2017年拎到中美洲國家盃亞軍。由此可見,巴拿馬喺在中北美洲一帶已經累積到一定嘅大賽經驗,而且球隊班底無咩大變化,有足夠嘅磨合,從而完成殺入世盃決賽週嘅夢想。 佢哋喺外圍賽第四圈B組以6戰3贏1和2負,僅次於哥斯達黎加出綫第五圈外圍賽,而喺第五圈最後比賽佢哋眾志成城,以2:1反勝哥斯達黎加,從而以1分同得失球差力壓美國同洪都拉斯,以第三名直接晉級2018年世界盃決賽週,呢次都係巴拿馬足球歷史上一個零的突破,自1978年參加外圍賽以嚟,首次成日打入決賽週。以下係巴拿馬今屆世盃外圍賽成績: -中北美洲第四圈B組: 牙買加0:2巴拿馬 巴拿馬1:2巴斯達黎加 海地0:0巴拿馬 巴拿馬1:0海地 巴拿馬2:0牙買加 哥斯達黎加2:1巴拿馬 -中北美洲第五圈: 洪都拉斯0:1巴拿馬 巴拿馬0:0墨西哥 千里達1:0巴拿馬 巴拿馬1:1美國 哥斯達黎加0:0巴拿馬 巴拿馬2:2洪都拉斯 墨西哥1:0巴拿馬 巴拿馬3:0千里達 美國4:0巴拿馬 巴拿馬2:1哥斯達黎加 ‧主力球員 巴拿馬後防有多名經驗豐富嘅老將,就算今次首戰世盃決賽週,相信都唔會點怯場。 門將彭尼度而家效力緊羅馬尼亞布加勒斯特戴拿模。另外,兩位守將米高‧梅利路(Michael Amir Murillo)同F.艾斯哥巴(Fidel Escobar)都喺美職聯效力紐約紅牛。 筆者都想講下巴拿馬目前最大名氣嘅前鋒兼國家隊入球紀錄保持者巴拉斯‧佩雷斯(Blas Pérez),佢而家已經年屆37,而且踢緊危地馬拉聯賽,體能已經成一大疑問。相信入波重任要靠29歲嘅加比爾‧托利斯(Gabriel Torres),佢之前效力過瑞士洛桑,有少量流歐經驗。 至於巴拿馬隊長路文‧托利斯(Román Torres)。呢位「爆炸頭」中堅體重達100公斤,係今屆世盃最重量級球員,呢位大隻佬中堅係至今代表巴拿馬上陣110場,並且射入10球,大賽經驗十分豐富。 佢嘅攔截成功率同禁區覆蓋範圍極高,身型健碩,踢法硬朗。而且有一定嘅後上進攻能力,喺國家隊嘅關鍵時刻屢次成為英雄。呢位32歲中堅最為人津津樂道嘅係今屆外圍賽最後一輪對哥斯達黎加嘅賽事,佢喺下半場88金鐘射入絕殺一球,協助巴拿馬以2:1擊敗對手,歷史性殺入世界盃決賽週。 • 小組分析 巴拿馬首次參加世界盃決賽週,奈何籤運欠佳,慘遭不幸跌入實力強勁嘅G組,同組有兩支歐洲強隊比利時同英格蘭以及北非突尼西亞。 其實筆者覺得巴拿馬首次晉身決賽週,以佢哋嘅實力基本上係無慾無求。巴拿馬今屆志在體驗世盃決賽週之旅,相信好多球員可能喺第一次飛去美洲以外嘅地方,毫無疑問已經係當今球壇嘅一大奇蹟,喺無壓力嘅情況之下絕對可以學下2013年洲際盃嘅大溪地踢出驚喜畀一眾球迷。 巴拿馬喺中北美洲外圍賽第五圈只係射入9球,係3隊直接晉身世今屆世盃國家隊入波最少嘅一隊。欠缺「入波機器」嘅佢哋只可以靠默契配合。而且單論牌面巴拿馬無可能同比利時同埋英格蘭一較高下,唯有寄望同突尼西亞有零的突破。 所以出線,基於呢隊「運河隊」係第一次參加決賽週,加埋能力所限,絕對係無可能嘅事。所以相信巴拿馬喺所有分組賽都會採取主守戰術。 而喺第一場對比利時嘅比賽,上半場巴拿馬門前已經係風聲鶴唳,唔係大隻佬羅曼‧托利斯喺上半場成功封到盧卡古嘅封門,比利時早就拎住1球入返更衣室。 下半場開段失波之後,巴拿馬嘗試壓上進攻,但最終防線大開,再畀比利時連入2球,最終以0:3不敵比利時。 如果今晚巴拿馬輸埋畀英格蘭,呢支「運河球隊」喺G組就出綫無望。雖然下輪對突尼西亞嘅比賽會變成例行公事,但正正係巴拿馬爭取零的突破嘅好機會,絕對有機會同無欲無求嘅突尼西亞上演一場入球Show。 •巴拿馬世界盃小組賽賽程表: G組 6月18號23:00 比利時VS 巴拿馬 索契菲斯特球場 6月24號20:00 英格蘭VS 巴拿馬 下諾夫哥羅德球場 6月29號02:00巴拿馬VS突尼西亞  摩度維亞球場 •世盃小組賽首輪對比利時陣容(4-5-1) : 門將:彭尼度 後防:艾歷克‧戴維斯,費迪爾‧艾斯高巴,洛文‧托利斯,米高‧梅利路 中場:洛迪古斯,哥度伊,加比爾‧高美斯,谷巴,巴斯拿斯 前鋒:巴拉斯‧佩雷斯...

Read More

2018年俄羅斯世界盃G組:無人理會嘅突尼西亞

文/William Luk 突尼西亞足球代表隊(阿拉伯文:منتخب تونس لكرة القدم‎) 世界排名:21 教練:馬奴爾(Nabil Maâloul) 今屆外圍賽成績:非洲區第三圈A組首名 出席世界盃決賽週次數:5次(1978年、1998年、2002年、2006年以及2018年) 歷屆最佳成績:分組賽 外圍賽最佳射手:麥薩尼(4球) 今屆訓練基地:莫斯科 唔少香港球迷對非洲球隊了解有限,除咗南非、喀麥隆、尼日利亞、象牙海岸之外,其實位處北非嘅突尼西亞喺非洲球壇都係一支傳統勁旅。 呢支「迦太基之鷹」由法國屬地獨立出嚟之後,歷史上已經四次殺入世界盃決賽週。但除咗1978年阿根廷世界盃喺分組賽中贏過一場之外,從來未試過喺世界盃有一場勝仗。 突尼西亞喺5月14號就公佈咗29人初選名單。直到6月2號正式公佈23人大名單。當中有幾位球員香港球迷都會比較熟悉,包括效力英超李斯特城嘅中堅賓拿盧安尼(Yohan Benalouane)以及曾經效力新特蘭嘅卡斯利(Wahbi Khazri)。 令人可惜嘅係,國家隊現役入波最多兼今屆外圍賽神射手麥薩尼(Youssef Msakni) 因為2月一次十字韌帶受傷而落選23人大名單。 突尼西亞23 人大名單: 門將: 1.賓-梅斯達菲(艾沙比)、16.馬夫路菲(巴汀) (C)、23.哈辛(查多魯), 後衛: 2.賓-尤素夫(卡森柏沙)、3.賓拿盧安尼(李斯特城)、4.耶辛‧馬裡亞(斯法克斯)、5.哈達迪(迪安) 、6.比杜爾(沙希爾星隊)、11.布朗(真特)、12.阿里‧馬路爾(埃及艾阿里)、23.納古斯(沙馬歷克)、 中場:7.卡奧(特魯瓦)、13.尼沙斯(艾納斯)、14.賓-艾摩(吉達艾阿里)、15. 卡利 (非洲人)、17.斯希里(蒙彼利埃)、20.查拉利(聖毛魯斯)、 前鋒: 9.巴迪利(突尼西亞希望)、8.賓-尤素夫(阿爾伊蒂法克)、 10.卡斯利(雷恩)(VC)、15.卡利法(非洲人) 、18.施拉菲(尼斯)、23.施列迪(迪安) •回顧 主教練馬奴爾喺球員生涯係突尼西亞名宿,代表突尼西亞參加超過70場賽事。佢喺2013年曾經短暫帶領國家隊衝擊巴西世界盃,可惜無功而還,隨後宣佈請辭。 不過,今屆突尼西亞係佢帶領下喺今屆世界盃非洲區外圍賽入面力壓群雄,以4勝2和不敗戰績勇奪小組首名晉身今屆世盃決賽週。以下係突尼西亞今屆世盃外圍賽戰績: -非洲區外圍賽第2圈: 毛里塔尼亞1:2突尼西亞 突尼西亞2:1毛里塔尼亞 兩回合合計4:2 -非洲區外圍賽第3圈A組: 突尼西亞2:0畿內亞 利比亞0:1突尼西亞 突尼西亞2:1剛果民主共和國 剛果民主共和國2:2突尼西亞 畿內亞1:4突尼西亞 利比亞2:2突尼西亞 突尼西亞0:0利比亞 •主力球員 由於突尼西亞係一支球員能力極為平均嘅國家隊,只有一個球員具個人技術。筆者會集中講下以下呢位球員。 副隊長卡斯利係突尼西亞國家中中場絕對主力,呢位喺法國出世嘅突尼西亞裔球員今季喺雷恩入9球2助攻,表現唔錯。 卡斯利有一定嘅控球、罰球同遠射能力。但筆者喺佢效力英超新特蘭期間留意到佢體能一直欠佳,但相信卡斯利嘅表現會決定突尼西亞今屆世界盃嘅成績。 •小組分析 今屆突尼西亞籤運欠佳,身處G組,同組仲有比利時、英格蘭以及新丁巴拿馬。面對歐洲兩支勁旅,好多人都認為突尼西亞同埋巴拿馬都係陪跑份子,突尼西亞要打破5屆分組賽出局嘅宿命一啲都唔簡單。 而且賽程都對佢哋極為不利,先要對陣實力強勁嘅英格蘭同比利時,想喺佢哋身上虎口拔牙,拎到一分已經實屬僥倖。再要確保喺小組實力最弱嘅巴拿馬身上全取三分,困難程度可想而知。 首輪突尼西亞對英格蘭,其實「迦太基之鷹」全場發揮唔錯,打出整體戰術,壓制英格蘭兩邊出波。但英格蘭隊始終有高Q大棍呢招,通過角球戰術由哈利‧簡恩(Harry Kane)頭鎚入波,但係突尼西亞喺上半場結束前通過一個具爭議嘅十二碼板平比數。 下半場比賽強度較低,「迦太基之鷹」一直苦苦尋求一個突破點。但係英格蘭勝在夠大賽經驗同耐性,利用封堵戰術阻止突尼西亞打反擊同埋換人拖時間。而喺下半場補時階段哈利‧簡恩嘅頭鎚絕殺,完全摧毀咗一班突尼西亞球員嘅心理關口,令辛苦咗90分鐘嘅突尼西亞一眾球員一無所獲。 如果今晚輸埋畀比利時,呢隻「迦太基之鷹」喺G組絕對出綫無望,下場對巴拿馬就變成例行公事。 •突尼西亞世界盃小組賽賽程表: G 組  6 月1 9 號02 :00突尼西亞VS英格蘭伏爾哥格勒球場   6月23 號  20:00比利時VS突尼西亞莫斯科斯巴達球場  6月29號02:00巴拿馬VS突尼西亞  摩度維亞球場 •世盃小組賽首輪對英格蘭陣容(4-3-3) : 門將:哈辛 後防:布朗,賓-尤素夫,耶辛‧馬裡亞,阿里‧馬路爾 中場:斯希里,巴迪利,尼沙斯 前鋒:賓-尤素夫,卡斯利,施列迪...

Read More

2018年俄羅斯世界盃D組:冰島首次世界盃之旅 化身大衛打倒哥利亞

文/William Luk 冰島足球代表隊 (冰島文:Íslenska karlalandsliðið í knattspyrnu) 世界排名:22 教練:夏基姆臣(Heimir Hallgrímsson) 今屆外圍賽成績:歐洲區I組首名 歷屆出席世界盃決賽週次數:第1次 外圍賽最佳射手:施古臣 (4球) 今屆訓練基地:卡斯洛達區格連齊克 (俄文:Геленджи́к) 講起冰島,2016年前你我一定異口同聲話古莊臣(Eiður Guðjohnsen),但除咗佢,我哋對呢個國家嘅足球了解唔多。 但短短2年內,冰島成為歐洲一支異軍突起嘅國家隊,呢隊全隊上下都有住「臣」之名嘅國家隊,先喺2016件歐國盃殺入8強,再喺今屆世盃外圍賽再力壓克羅地亞直接殺入決賽週。而冰島全國人口只得33萬人,成為世盃史上人口最少嘅參賽國家,呢次冰島全國上下都對國家隊寄予厚望。兩年轉眼過去,冰島可唔可以再嚟一次類似歐國盃嘅奇蹟?相信好多球迷都磨拳擦掌。 首次出戰決賽週嘅冰島別出心裁,竟然利用Youtube去公佈今屆世盃23人大名單。當中較香港球迷熟悉艾朗根拿臣(Aron Gunnarsson)同埋施古臣(Gylfi Sigurðsson)都喺大名單內,但兩位其實都因為膝傷錯過近幾個月嘅比賽,狀態成疑。而喺2016年歐國盃表現出色嘅法甲南特射手史基賀臣(Kolbeinn Sigþórsson)因傷落選,只被列喺後備名單入面。 而值得一提係,冰島上至教練團下至球員,大部份都係「兼職」踢波。由於國內條件所限,有好多球員都唔係全職運動員,佢哋喺比賽之餘平日都要返工。例如,右閘沙華臣(Birkir Mar Saevarsson),正職係一間包裝鹽工廠嘅工人,今次為咗踢世盃,佢要特登同工廠請假。 冰島23人大名單: 門將: 1.賀度臣 (蘭達斯)、12.舒蘭姆(洛斯基德)、13.隆拿臣 (迪安) 後防: 2.沙華臣 (華魯爾)、5.恩加臣 (羅斯托夫)、6.納拿‧施古臣 (羅斯托夫)、14.阿拿臣 (維京古)、15.伊祖費臣 (索菲亞利夫斯基)、18.賀杜亞‧麥拿臣 (中央陸軍)、23.施古拿臣 (洛格倫體育) 中場: 3.法迪莊臣 (華拉倫加) 、7.古蒙臣 (般尼)、8.比查拿臣 (阿士東維拉)、10.施古臣 (愛華頓)、16.奧拿夫‧施古拿臣 (菲爾基爾)、17. 艾朗‧根拿臣 (卡迪夫城)、19.傑斯拿臣 (辛特侯遜)、20.賀費特臣 (烏甸尼斯) 、21. 特烏斯達臣(馬模) 前鋒: 4.艾拔‧古蒙臣 (PSV燕豪芬)、9.施古達臣 (羅斯托夫)、11.芬保加臣 (奧格斯堡)、22.保特華臣 (雷丁) ‧回顧 早喺2016年歐國盃,首次出現喺國際舞台嘅冰島就以「黑馬」姿態為人令之一振。佢哋先喺外圍賽雙殺荷蘭,令到「橙衣軍團」出唔到綫。繼而喺小組賽表現出色,再喺16強爆冷淘汰咗英格蘭,去到8強先至輸畀東道主法國。呢個只有35萬人口嘅小國,瞬間成為咗眾人焦點。 自2013年起冰島就由夏基姆臣執教,佢嘅正職係一名牙醫,冇足球比賽佢就會返診所做嘢,喺今個月頭仲有幫病人做手術。 冰島喺佢帶領下,FIFA排名節節上升,由6年前嘅第133位,上升到而家嘅第22位。由於長時間嘅執教加上可以選擇嘅球員唔多,令賀基姆臣好了解陣中每一個球員,可以更從容咁發揮冰島團體戰術,加強機動性。 賀基姆臣講過: 「只有足球,先可以將人民團結起嚟!」 冰島喺賀基姆臣帶領下,喺今屆世界盃外圍賽歐洲區I組表現出色,最終以7勝1和2負22分嘅成績,以2分嘅優勢力壓同組最大競爭對手克羅地亞,以小組第一身份直接出綫2018年世界盃決賽週。呢次係冰島足球歷史上第一次拎到世界盃決賽週參賽資格。以下係冰島喺今屆世盃外圍賽嘅戰績: -歐洲區I組: 烏克蘭1:1冰島 冰島3:2芬蘭 冰島2:0土耳其 克羅地亞2:0冰島 科索夫1:2冰島 冰島1:0克羅地亞 芬蘭1:0冰島 冰島2:0烏克蘭 土耳其0:3冰島 冰島2:0科索夫 ‧主力分析 對阿根廷一戰成名嘅34歲門將荷杜臣(Hannes Halldorsson)。佢喺對阿根廷嘅比賽入面全場左飛右撲,下半場仲成功撲出美斯主射嘅12碼,成為冰島今場和波英雄。其實佢正職係一個廣告導演,今屆可口可樂世界盃廣告冰島版就係由佢執導。 佢亦都講明今屆世盃之外會退役,繼續佢嘅導演夢。 *冰島世界盃宣傳片:https://www.youtube.com/watch?v=fdS6lVtzZdw 今屆冰島23人當家球星絕對係施古臣,當年登陸英超就幫助史雲斯擊敗阿仙奴,令筆者瞪口呆,呢個球員到底咩料。 佢喺禁區外比禁區內更為恐怖,筆者喺英超比賽入面已經見識過佢出色嘅罰球同遠射能力。 但今次施古臣係帶傷入選,今季效力愛華頓嘅佢長期飽受傷患困擾。筆者恐怕佢因為受傷時間長,狀態未必可以百分之一百完全恢復,好有可能影響今次冰島喺世界盃嘅成績 ‧小組分析 冰島隊喺世界盃嚟講都算係一支相當陌生嘅國家球隊,而今次打到入世界盃決賽週都係冰島足球歷史上嘅第一次。今屆冰島編入D組,同組仲有阿根廷、尼日利亞同克羅地亞,隊隊都係世界盃老手,要喺呢組突圍而出,毫不簡單。因此,好多人認為冰島係呢組出綫可能性最低嘅的球隊。但其實喺過去幾年,冰島足球成績係非常搶眼。我哋喺上幾PART已經詳細闡述過。 此外,筆者考慮到小組第一場佢哋他們能夠爆冷迫和小組實力最強嘅阿根廷隊,遇強越強,愈戰愈勇唔係冇可能。 雖然外界覺得冰島係一支半業餘球隊,同南美足球強旅阿根廷對決,係無得踢。但全隊上下將士用命,冰島全場防守基本上係無可挑剔,冇任何球員出現失位嘅情況。佢哋分工合作,允其對美斯極為專注。三個中場球員輪流閘死美斯,閘住佢射門空間,再逼佢帶波行向死位,後防再有另外兩、三個球員「冰凍」美斯,逼佢一係射波一係焗扭。 結果冰島一比一迫和呢支南美傳統勁旅,震驚全球觀眾。冰島雖然係小國寡民,但呢場比賽有近一成國民親臨球場場支持,可見冰島國民非常圑結,而且非常投入足球比賽。 今晚小組次輪對尼日利亞嘅比賽係至為關鍵,只要冰島今晚贏到尼日利亞,就會掌握小組出綫主動權,贏唔贏到就先要睇下冰島防守可唔可以好似第一場比賽對阿根廷咁有出色嘅發揮,一但贏波,就可以送阿根廷返南美。 筆者認為冰島團結一致係佢哋嘅殺着,全隊人一齊進攻,一齊防守,非常難搞,絕對係一支好整體性嘅球隊,從無個人主義,每一個球員都係雙刃利器。所以今晚孰勝孰負,團體戰術會起好大作用。 • 冰島世界盃小組賽賽程表: D 組 6月16號  20:00 阿根廷...

Read More

Pin It on Pinterest