2018年俄羅斯世界盃E組:「森巴軍團」襲來,呢次係巴西定巴「閪」?

文/幪頭超人& William Luk 巴西國家足球隊(葡文: Seleção Brasileira de Futebol) 世界排名:2 今屆外圍賽成績:南美洲賽區首名 外圍賽最佳射手:加比爾·捷西斯(7球) 歷年出席世盃決賽週次數:21次(1930年至今) 歷屆最佳成績:5次冠軍(1958年,1962年,1970年,1994年同2002年) 今屆訓練基地:索契 喺呢一屆世界盃32隊裡面,巴西係最早一隊公佈23人大名單之一。巴西足總一早喺5月14號就已經公佈咗出戰俄羅斯世界盃嘅23人大名單。 23人名單如下: 門將: 1.艾利臣(羅馬)、16.卡斯奧(哥連泰斯)、23.艾達臣(曼城)、 後衛: 2.泰亞高·施華(巴黎聖日門)、3.米蘭達(國際米蘭)、4.柏度·基洛美(甘美奧)、6.菲臘比·路易斯(馬德里體育會)12 .馬些路(皇家馬德里)、13.馬昆奴斯(巴黎聖日門)、、14.丹尼路(曼城)、22.法格拿(哥連達斯) 中場: 5.卡斯美路(皇家馬德里)、8.連拿度·奧古斯圖(北京國安)、11.古天奴(巴塞隆拿)、15.保連奴(巴塞隆拿)、17.費蘭甸奴(曼城)、18.費特(薩克達)、19.韋利安(車路士) 前鋒: 7.杜格拉斯·哥斯達(祖雲達斯)、9.加比爾·捷西斯(曼城)、10.尼馬(巴黎聖日門)、20.費明奴(利物浦)、21.泰臣(薩克達) •回顧 2014年世界盃,巴西國家隊喺4強當住全國人面前1:7慘敗俾德國,季軍戰再以0:3慘敗俾荷蘭之後,巴西人需要重新起步。史高拉利被炒魷魚,但係巴西足協,竟然再搵返一個教練生涯,充滿爭議性,而且執教往績唔見出色嘅鄧加再次上任(當然你可以話2007年美洲盃冠軍,2009年洲際國家盃冠軍,2010世界盃八強好出色。)鄧加上任後,跟住下面幾場友誼賽,巴西全勝,呢幾場雞肋比賽,足夠畀鄧加呢個二流教練自Hi。 但係去到真正嘅盃賽-2015年美洲國家盃,巴西止步於八強。當時,巴西人都對於鄧加仍有足夠包容,繼續畀機會呢條友。最終巴西喺世界盃外圍賽跌到第六,再喺2016年百年美洲盃小組賽0:1輸畀秘魯恥辱性出局。 巴西人呢次無浪費時間學2010年咁去清算鄧加,火速炒佢魷魚之後就迅速搵到新教練上任,就係家陣巴西國家主教練堤特(Tite)。講起堤特,其實好多人對佢並唔熟悉,不過估計睇開歐聯嘅球迷都知道,每年歐聯冠軍都會係參加同年底嘅世界冠軍球會盃,世冠盃幾乎每一年都被歐聯冠軍壟斷,但係有一年,係由南美球隊反壟斷成功,就係2012年底,由堤特帶領嘅哥連泰斯,喺世冠盃決賽擊敗咗車路士。 講番堤特執教巴西國家隊,佢重整巴西國家隊,確立左一套固定陣容衝擊世界盃外圍賽,大膽起用新人加比爾捷西斯加入前場三叉戟,中場方面,大膽重用當時喺中超嘅保連奴同奧古斯圖。而且堤特採用隊長輪換制度,每場比賽使用唔同嘅隊長,以加強每個球員對球隊嘅責任感兼且唔會將所有壓力擺係一個球員身上。基本上堤特用以下呢個陣容去衝擊世界盃外圍賽: 守門員:艾歷臣 後衛:馬些路,米蘭達,馬昆奴斯,艾維斯 中場三人:卡斯美路,保連奴,奧古斯圖。 前場三叉戟:尼馬,加比爾·捷西斯,古天奴 而且巴西有韋利安,費明奴,杜格拉斯哥斯達,費蘭甸奴,菲臘比·路易斯同泰亞高·施華呢一班有實力嘅後備球員。喺用人得宜嘅情況下,令到堤特執教下嘅巴西,喺世界盃外圍賽,交出連續11場世界盃外圍賽不敗,以9勝2和,入30球失3球嘅成績,由南美區排名第6上升到排名第1,成為除咗俄羅斯之外第一隊打入2018世界盃決賽週嘅球隊,以下係堤特執教巴西之後嘅世界盃外圍賽戰績: 巴西3:0厄瓜多爾 巴西2:1哥倫比亞 巴西5:0玻利維亞 委內瑞拉0:2巴西 巴西3:0阿根廷 秘魯0:2巴西 烏拉圭1:4 巴西 巴西3:0巴拉圭 巴西2:0厄瓜多爾 哥倫比亞1:1 巴西 玻利維亞0:0 巴西 巴西3:0智利 再補充一點,喺堤特帶領下嘅巴西,亦只有喺一場雞肋友誼賽裡面,0:1輸過俾阿根廷。 •陣容分析 今屆世界盃,輿論上基本都睇好呢次世界盃都會屬於歐洲球隊嘅天下。但係我認為,可以有實力抗衡歐洲球隊嘅其他洲份,正正就係來自南美嘅巴西,以下我會分析一下巴西陣容: -門將:艾利臣(羅馬)、艾達臣(曼城)、卡斯奧(哥連泰斯) 而效力羅馬嘅艾利臣(Alisson),呢個賽季表現可以講係非常之搶眼。喺意甲聯賽代表羅馬出場37場,失球只係28球,其中有17場0失球,而羅馬呢個賽季都係意甲失球第二少嘅球隊,甚至打入歐聯4強,可見艾利臣係「首都狼」嘅功臣之一。有傳啱啱失利歐聯冠軍嘅利物浦對佢有興趣,不過呢啲都要過咗世盃先講。 艾達臣(Ederson),初到曼城就拎到2017-2018賽季英超聯賽冠軍,出場36次,失球數為26,17場0失球。佢嘅臨場反應夠快而且夠果斷,但都因為咁喺對利物浦嘅比賽入面畀塞內加爾國腳沙治奧‧文尼整傷。 如果只係從數據上去睇,上述兩位球員可以講不相伯仲。而且兩位守門員,都有相似之處,兩位球員都擅長控球,而艾利臣則更加註重觀察射門球員嘅節奏以捕捉對方下一步行動。相反,艾達臣習慣主動出擊近距離封鎖對方球員射門。就目前兩位守門員係國家隊以往嘅安排,相信世界盃正選位置應該屬於艾利臣。 而效力於巴甲哥連泰斯嘅卡斯奧(Cássio),名氣上甚至可能實力上都要遜色於前兩位球員,可以講佢應該會毫無疑問屬於第三門將。 -後防:丹尼路(曼城)、法格拿(哥連達斯)、馬些路(皇家馬德里)、菲臘比·路易斯(馬德里體育會)、泰亞高·施華(巴黎聖日門)、馬昆奴斯(巴黎聖日門)、米蘭達(國際米蘭)、柏度·基洛美(甘美奧) 巴西可以講擁有多位出色嘅球員可以選擇,根據過去幾場友誼賽,堤特嘅排兵布陣去睇,國米嘅米蘭達(Miranda)肯定會有正選位置,至於另外一位中堅,將會屬於泰亞高·施華(Thiago Silva)或者馬昆奴斯(Marquinhos)。 左閘方面,雖然後上速度同傳中都唔錯嘅祖記左閘阿歷士·辛度(Alex Sandro)落選會令有啲球迷感到失落,但係馬些路(Marcelo)同菲臘比·路易斯(Felípe Luís),只要壓抑自己喺皇馬同馬體會嘅出擊意欲,亦可以令到巴西左路放心。特別要講下菲臘比,佢喺今年3月一場歐霸淘汰賽入面畀莫斯科火車頭球員艾達(Eder)踢裂左腳腓骨,而順帶一提,艾達係喺2016歐國盃決賽入波嗰個球員。本來菲臘比預計要錯過馬體會餘下比賽同埋2018年世界盃,但佢2個月後極速康復,最終入選到23年大軍。 而右閘方面,因為艾維斯(Daniel Alves)嘅傷退,相信會屬於曼城嘅丹尼路(Danilo),所以右閘反而係巴西最令人擔心嘅地方。 丹尼路,由往績去睇,呢個球員防守唔算穩陣,喺皇馬有好多蝦祿鏡頭出現。而且出擊意欲同落選嘅大衛·雷斯一樣太強,而法格拿(Fagner),屬於巴西國內聯賽球員,以前喺國家隊係作為艾維斯後備,出場時間唔係好多,而且艾維斯因傷退隊之後,教練亦無將主力位置交俾法格拿,所以巴西右路係最令人擔憂嘅地方。 加上泰亞高·施華,米蘭達,菲臘比·路易斯同馬些路,都已經年過三十。所以體能同萬一出現傷病時,巴西後防都幾令人擔憂。不過總體嚟講,巴西後防,實力平均,經驗豐富。可以畀到球迷足夠嘅信心。 -中場:卡斯美路(皇家馬德里)、費蘭甸奴(曼城)、保連奴(巴塞隆拿)、費特(薩克達)、連拿度·奧古斯圖(北京國安) 如果以世界盃外圍賽陣容,巴西一般會採用卡斯美路(Casemiro),保連奴(Paulinho)同連拿度·奧古斯圖(Renato Augusto)呢三位球員作為中場鐵三角。 至於令人比較奇怪嘅係巴西使用效力中超北京國安嘅連拿度·奧古斯圖,其實堤特係執教哥連泰斯期間,連拿度·奧古斯圖係堤特嘅得意弟子,而且由世界盃外圍賽去睇,連拿度·奧古斯圖都中規中矩,而且經常傳到靚波同埋有入波。 至於保連奴雖然曾經效力過中超嘅廣州恆大,但係轉會巴塞之後,亦都同樣有高水平發揮,兼且佢係世界盃外圍賽經常取得入球,對烏拉圭嗰場更加上演帽子戲法。 卡斯美路,相信大家都好熟悉,啱啱以皇家馬德里正選嘅身份攞左歐聯冠軍,甚至皇馬可以歐聯三連冠佢係功不可末嘅一員。而且我認為卡斯美路可以為巴西後防提供足夠嘅保護。 至於替後備居多嘅費蘭甸奴(Fernandinho),雖然技術上存在唔少漏洞,但係亦係一個非常有實力嘅球員,畢竟效力英超豪門曼城嘅佢,肯定見慣大風大浪。 而效力烏克蘭薩克達嘅費特(Fred),相信會係中場最後嘅選擇,畢竟名氣同實力比唔上其餘幾個。而且有必要嘅時候,仲可以擺韋利安係中場,幫助掃蕩防守。 -前鋒:杜格拉斯·哥斯達(祖雲達斯)、尼馬(巴黎聖日門)、泰臣(薩克達)、加比爾·捷西斯(曼城)、費明奴(利物浦),古天奴(巴塞隆拿)、韋利安(車路士) 好多人可能會奇怪,點解我會擺古天奴(Coutinho)同韋利安(Willian)去前鋒呢度,其實有睇開巴西嘅比賽都知道,其實呢兩位球員一直係巴西都係打右翼嘅位置,雖然曾經試過將古天奴擺去中場派牌,或者擺韋利安加強中場防守,但係一般情況下,其實呢兩位球員都係屬於右翼角色。 尼馬(Neymar)雖然大傷初癒,而且一路傳出佢未必可以100%踢到世界盃。甚至喺日前曾經離開國家隊喺英國嘅大本營。但最終,久休復出嘅佢就以後備身份喺前日巴西對克羅地亞嘅熱身賽下半場登場,並且幫助巴西喺利記主場晏菲路先拔頭籌,最後2:0擊敗對手。所以可以睇得出尼馬康復進展良好,相信佢喺世界盃都會交出令人滿意嘅成績。當然,佢需要注意一下脾氣,尼馬喺國家隊其實試過好多次唔夠冷靜做出衝動行為而攞牌。同埋大傷初癒,身體都係一個未知數,教練堤特就叫外界唔好對尼馬有太大期望:「佢今日正式重返綠茵賽場,表現比我預期好。不過,仲未返到最佳水準之前,佢仍然會有唔穩定嘅時候。請唔好因為佢今日嘅表現而對佢有任何期望。」。但老實講,巴西上屆一無咗尼馬就慘敗德國1:7,希望佢可以好似2002年嘅朗拿度一樣浴火重生。 除咗尼馬之外,古天奴都係森巴軍團非常重要嘅一份子,古天奴喺巴西踢外圍賽期間,踢左大部份比賽,而且用精湛嘅球技同出色嘅表現得到教練同球迷嘅信任。古天奴唔單止有出色嘅組織同助攻能力,而且有非常好嘅遠射技術,往往可以幫球隊喺球賽僵持下打開局面。 加比爾·捷西斯(Gabriel Jesus),呢位喺1997年出世嘅年輕球員,已經喺曼城打出屬於自己嘅一片天空。加比爾捷西斯喺10場南美外圍賽裡面射入7球,入球效率非常之高,佢可以喺進攻上分擔尼馬嘅壓力,令到巴西唔會好似2014年世界盃咁得尼馬一個人孤軍作戰,相信捷西斯同古天奴,將會同尼馬一齊,撐起巴西前場,一齊攻城拔寨。 至於後備方面,杜格拉斯·哥斯達(Douglas Costa),費明奴(Firmino)同韋利安都係實力相當好嘅球員,而且韋利安喺前車路士嘅教頭摩連奴嘅改造下仲可以作為中場防守球員,佢嘅中場掃蕩能力,相信大家都應該有目共睹。至於泰臣(Taison),如無意外,應該無咩上場機會,畢竟名氣同實力上,都係前場最弱一個。 •E組獨大 巴西呢屆世界盃小組賽,小組賽對手分別係瑞士,塞爾維亞同哥斯達黎加。喺牌面上睇,呢三隊實力都無辦法同巴西抗衡,所以巴西肯定以小組第一出綫作為第一個目標,甚至佢地會要求三戰全勝。因為如果次名出線有機會對住德國。 當然巴西喺小組賽亦要保持警惕,畢竟類似2010年世界盃嘅第一場,西班牙都意外0-1輸俾瑞士,所以每場巴西都唔可以輕敵同大意。 我相信巴西同球迷都同我有一個希望,就係呢次俄羅斯世盃之旅,可以將大力神盃時隔16年再次帶番去巴西。 巴西小組賽賽程表: E組 6月18號02:00 巴西VS 瑞士羅斯托夫體育場 6月23號02:00 巴西VS 哥斯達黎加聖彼得堡體育場 6月27號02:00 塞爾維亞VS 巴西莫斯科斯巴達體育場...

Read More